'ಕಾವೇರಿ' ಕಲಾಪ ಆರಂಭ: ಪ್ರತಿಪಕ್ಷಗಳಿಂದಲೇ ಪ್ರಸ್ತಾವನೆ ಮಂಡನೆ

ಬೆಂಗಳೂರು: ಕಾವೇರಿ ವಿವಾದ ಕುರಿತಂತೆ ನಡೆಸಲಾಗುತ್ತಿರುವ ವಿಶೇಷ ಅಧಿವೇಶನ ಶುಕ್ರವಾರ ಆರಂಭಗೊಂಡಿದ್ದು,  ಪ್ರತಿಪಕ್ಷಗಳ ನಾಯಕರೇ ಸದನದಲ್ಲಿ ಕಾವೇರಿ ವಿಚಾರವನ್ನು ಪ್ರಸ್ತಾವನೆ ಮಾಡಲಿದ್ದಾರೆ.

ಸದನಕ್ಕೆ ಸ್ಪೀಕರ್ ಕೋಳಿವಾಡ ಆಗಮಿಸಿದ ನಂತರ ವಂದೇ ಮಾತರಂ ಗೀತೆಯನ್ನು ಹಾಡುವ ಮೂಲಕ ಕಲಾಪವನ್ನು ಆರಂಭ ಮಾಡಲಾಯಿತು. ನಂತರ ಮಾತನಾಡಿದ ಸ್ಪೀಕರ್ ಕೋಳಿವಾಡ ಅವರು ಅಗಲಿದ ಗಣ್ಯರಿಗೆ ಹಾಗೂ ದೇಶಕ್ಕಾಗಿ ಪ್ರಾಣವನ್ನೇ ಮುಡಿಪಾಗಿಟ್ಟು ಕಾಶ್ಮೀರದಲ್ಲಿ ಕಾದಾಡಿದ ಹುತಾತ್ಮ ಯೋಧರಿಗೆ ಸಂತಾಪ ಸೂಚಿಸಿದರು.

ಸದನದಲ್ಲಿ ಬಿಜೆಪಿಯೇ ಕಾವೇರಿ ವಿಚಾರದ ಪ್ರಸ್ತಾವನೆ ಮಂಡನೆ ಮಾಡಲಿದ್ದು, ಪ್ರತಿಪಕ್ಷ ನಾಯಕ ಜಗದೀಶ್ ಶೆಟ್ಟರ್ ಅವರು ಮಂಡನೆ ಮಾಡಲಿದ್ದಾರೆ. ಬಿಜೆಪಿಯ ಈ ಪ್ರಸ್ತಾವವನ್ನು ಜೆಡಿಎಸ್ ಅನುಮೋದನೆಗೊಳಿಸಲಿದೆ. ಸದನದಲ್ಲಿ ಮಾತನಾಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಕಾಶ್ಮೀರದಲ್ಲಿ ಉಗ್ರರು ನಡೆಸಿದ ದಾಳಿಯನ್ನು ಖಂಡಿಸಿದ್ದಾರೆ.

ಅಧಿವೇಶನದಲ್ಲಿ ತಮಿಳುನಾಡು ರಾಜ್ಯಕ್ಕೆ ಕಾವೇರಿ ನೀರು ಬಿಡಲು ಸಾಧ್ಯವಿಲ್ಲ ಎಂಬ ಒಂದು ಸಾಲಿನ ನಿರ್ಣಯ ತೆಗೆದುಕೊಳ್ಳಲು ಸಲಹಾ ಸಮಿತಿ ಸಭೆಯಲ್ಲಿ ಈಗಾಗಲೇ ನಿರ್ಧರ ಕೈಗೊಳ್ಳಲಾಗಿದ್ದು, ನಿಯಮ 159ರ ಅಡಿಯಲ್ಲಿ ಕಾವೇರಿ ನೀರು ಬಿಡಲು ಸಾಧ್ಯವಿಲ್ಲ ಎಂಬ ನಿರ್ಣಯವನ್ನು ಸದನದಲ್ಲಿ ಅಂಗೀಕರಿಸಲು ಸಭೆ ಒಮ್ಮತಕ್ಕೆ ಬಂದಿದೆ.

ಸದನದಲ್ಲಿ ಸುಪ್ರೀಂಕೋರ್ಟ್ ನ ಆದೇಶದ ಬಗ್ಗೆಯಾಗಲೀ, ಕಾನೂನೂ ವಿಚಾರಗಳ ಬಗ್ಗೆಯಾಗಲೀ ಚರ್ಚೆ ನಡೆಸದಿರಲು ತೀರ್ಮಾನಿಸಲಾಗಿದ್ದು, ಕಾವೇರಿ ನೀರು ಬಿಡಲು ಸಾಧ್ಯವಿಲ್ಲ ಎಂಬುದರ ಬಗ್ಗೆಯಷ್ಟೇ ಚರ್ಚೆ ನಡೆಸಿ ನಿರ್ಣಯವನ್ನು ಅಂಗೀಕರಿಸಲು ಸಭೆಯಲ್ಲಿ ತೀರ್ಮಾನಿಸಲಾಗಿದೆ. ಅಲ್ಲದೆ. ಸದನದಲ್ಲಿ 9 ಶಾಸಕರಿಗೆ ಮಾತ್ರ ತಲಾ 5 ನಿಮಿಷ ಭಾಷಣ ಮಾಡುವುದಕ್ಕೆ ಅವಕಾಶವನ್ನು ನೀಡಲಾಗಿದೆ.