ಉಗ್ರರೊಂದಿಗೆ ನಂಟು: ಸೆರೆಗೆ ಹೋದಾಗ ಪೊಲೀಸ್ ಗೆ ಇರಿದ ದಂಪತಿ

ಬೆಂಗಳೂರು: ರಾಜ್ಯದಲ್ಲಿ ಆರು ಮಂದಿ ಶಂಕಿತ ಉಗ್ರರನ್ನು ಬಂಧಿಸಿರುವ ಬೆನ್ನಲ್ಲೇ ಭಯೋತ್ಪಾದಕ ಸಂಘಟನೆಯೊಂದಿಗೆ ನಂಟು ಹೊಂದಿರುವ ಆರೋಪದ ಮೇಲೆ ಬೆಂಗಳೂರಿನಲ್ಲಿ ಆಂಧ್ರ ಮೂಲದ ದಂಪತಿಯನ್ನು ತೆಲೆಂಗಾಣ ಎಟಿಎಸ್ ವಶಕ್ಕೆ ಪಡೆದಿದೆ.

ಆದರೆ, ಆಂಧ್ರದ ಭಯೋತ್ಪಾದನೆ ನಿಗ್ರಹ ದಳ ಬಂಧಿಸಲು ತೆರಳಿದಾಗ ಆಂಧ್ರದ ರಫೀಕ್ ದಂಪತಿ ತೆಲಂಗಾಣದ ಪೊಲೀಸ್ ಅಧಿಕಾರಿಯೊಬ್ಬರಿಗೆ ಚಾಕುವಿನಿಂದ ಇರಿದು ಪರಾರಿಯಾಗಲು ಯತ್ನಿಸಿದೆ. ಈ ಸಂದರ್ಭದಲ್ಲಿ ಸ್ಥಳೀಯರೇ ಇವರನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದ ಘಟನೆ ಬೆಂಗಳೂರಿನ ಪರಪ್ಪನ ಅಗ್ರಹಾರ ಸಮೀಪ ನಡೆದಿದೆ.

ಕಳೆದ 5 ವರ್ಷಗಳಿಂದ ಪರಪ್ಪನ ಅಗ್ರಹಾರದ ನಾಗನಾಥಪುರದ ಆಶ್ರಫ್ ಎಂಬುವರ ಮನೆ ಬಾಡಿಗೆಗ ಪಡೆದು ಈ ದಂಪತಿ ವಾಸವಿದ್ದರು. ಆದರೆ, ಇವರು ಅಕ್ಕಪಕ್ಕದವರೊಂದಿಗೆ ಮಾತನಾಡುತ್ತಿರಲಿಲ್ಲ. ರಾತ್ರಿ ವೇಳೆಯಲ್ಲೇ ಹೆಚ್ಚಾಗಿ ಓಡಾಡುತ್ತಿದ್ದರು ಎನ್ನಲಾಗಿದೆ.

ದಂಪತಿಯ ಜಾಡು ಹಿಡಿದು ಶನಿವಾರ ನಗರಕ್ಕೆ ಬಂದ ತೆಲಂಗಾಣದ ಪೊಲೀಸರು, ಸಂಜೆ 5 ಗಂಟೆ ವೇಳೆ ಮನೆ ಮೇಲೆ ದಾಳಿ ನಡೆಸಿ ದಂಪತಿಯನ್ನು ವಶಕ್ಕೆ ಪಡೆಯಲು ಪ್ರಯತ್ನಿಸಿದ್ದಾರೆ. ಆಗ ಇವರು ಪೊಲೀಸ್ ಅಧಿಕಾರಿಯೊಬ್ಬರಿಗೆ ಚಾಕುವಿನಿಂದ ಇರಿದು ಪರಾರಿಯಾಗಲು ಯತ್ನಿಸಿದ್ದಾರೆ. ಚಾಕುವಿನಿಂದ ಇರಿದು ಓಡುತ್ತಿದ್ದ ದಂಪತಿಯನ್ನು ಬೆನ್ನತ್ತಿದ್ದ ಸ್ಥಳೀಯರು ಹಿಡಿದು ಥಳಿಸಿದ್ದಾರೆ. ಈ ವೇಳೆಗೆ ವಿಷಯ ತಿಳಿದು ಸ್ಥಳಕ್ಕಾಗಮಿಸಿದ ಪರಪ್ಪನ ಅಗ್ರಹಾರ ಠಾಣೆ ಪೊಲೀಸರಿಗೆ ದಂಪತಿಯನ್ನು ಒಪ್ಪಿಸಿದ್ದಾರೆ.