ಮುಂದುವರೆದ ರೈತರ ಆತ್ಮಹತ್ಯೆ ಸರಣಿ: ಮತ್ತಿಬ್ಬರ ಸಾವು

ಬೆಂಗಳೂರು: ರೈತರ ಸರಣಿ ಆತ್ಮಹತ್ಯೆ ಮುಂದುವರೆದಿದ್ದು, ರಾಜ್ಯದಲ್ಲಿ ಮತ್ತೆ ಇಬ್ಬರು ರೈತರು ಆತ್ಮಹತ್ಯೆ ಶರಣಾಗಿರುವ ಘಟನೆ ಪ್ರತ್ಯೇಕ ಸ್ಥಳಗಳಲ್ಲಿ ವರದಿಯಾಗಿದೆ.
ವಿಜಯಪುರ ಜಿಲ್ಲೆ ಮುದ್ದೇಬಿಹಾಳ ತಾಲೂಕಿನ ಪಡೆಕನೂರಿನ ಗ್ರಾಮದ ಶರಣಗೌಡ ಭೀಮನಗೌಡ ಬಸರಕೋಡ್ (32) ಆತ್ಮಹತ್ಯೆಗೆ ಶರಣಾದ ರೈತ. ಸಾಲಬಾಧೆಯಿಂದ ಬೇಸತ್ತು ಜಮೀನಿನಲ್ಲಿ ವಿಷಸೇವಿಸಿದ್ದ ಈತನನ್ನು ಬಸವನಬಾಗೇವಾಡಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಿಸದೇ ರೈತ ಶರಣಗೌಡ ಬಸರಕೋಡ್ ಸಾವನ್ನಪ್ಪಿದ್ದಾನೆ. ಶರಣಗೌಡ ಅವರು ದವಳಗಿಯ ಸಿಂಡಿಕೇಟ್ ಬ್ಯಾಂಕಿನಲ್ಲಿ ರು.1 ಲಕ್ಷ ಸಾಲ ಹಾಗೂ ರು.3 ಲಕ್ಷ ಕೈಸಾಲ ಪಡೆದಿದ್ದರೆಂದು ಕುಟುಂಬದವರು ಮಾಹಿತಿ ನೀಡಿದ್ದಾರೆ. ಮುದ್ದೇಬಿಹಾಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇನ್ನು ಚೆನ್ನರಾಯಪಟ್ಟನದ ಕುರುವಂಕ ಗ್ರಾಮದ ರೈತ ತಿಮ್ಮೇಗೌಡ(38) ಎಂಬುವರು ಸಾಲಬಾಧೆ ತಾಳದೆ ಸೋಮವಾರ ತಡರಾತ್ರಿ ಜಮೀನಿನಲ್ಲಿ ಕ್ರಿಮಿನಾಶಕ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ಐದೂವರೆ ಎಕರೆ ಜಮೀನು ಹೊಂದಿದ್ದ ತಿಮ್ಮೇಗೌಡ ಅವರು ಕಬ್ಬು, ಟೊಮೆಟೊ, ಬಾಳೆ ಬೆಳೆಯುತ್ತಿದ್ದರು. ಪ್ರಸ್ತುತ ಎರಡೂವರೆ ಎಕರೆಯಲ್ಲಿ ಬಾಳೆ ಹಾಕಿದ್ದು, ಬಾಳೆ ಬೆಳೆ ನೀರಿಲ್ಲದೇ ಒಣಗುತ್ತಿತ್ತು. ನೀರಿಗಾಗಿ ಆರು ಕೊಳವೆ ಬಾವಿ ಕೊರೆಸಿದ್ದಾರೆ. ಎಲ್ಲವೂ ವಿಫಲವಾಗಿತ್ತು.
ತಿಮ್ಮೇಗೌಡ ಅವರು ಪ್ರಾಥಮಿ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ ರು.45 ಸಾವಿರ ಸಾಲ ಪಡೆದಿದ್ದರು. ಬಾಗೂರು ಕೆನರಾ ಬ್ಯಾಕ್ ನಿಂದ 2005ರಲ್ಲಿ ತಂದೆ ಹೆಸರಲ್ಲಿದ್ದ ಸಾಲ ರು.49 ಸಾವಿರ ತೀರಿಸುವಂತೆ ತಂದೆಯ ನಿಧನದ ನಂತರ ಮಗನಿಗೆ ನೊಟಿಸ್ ಬಂದಿದೆ. ಹೀಗಾಗಿ, ತಿಮ್ಮೇಗೌಡ ಅವರು ಸಾಲಬಾಧೆ ತಾಳದೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ.
ತಿಮ್ಮೇಗೌಡ ಅವರು ತಮ್ಮ ಜಮೀನಿನಲ್ಲಿ ಕ್ರಿಮಿನಾಶಕ ಸೇವಿಸಿದ್ದಾರೆ. ಅವರನ್ನು ಚನ್ನರಾಯಪಟ್ಟಣದ ಆಸ್ಪತ್ರೆಗೆ ದಾಖಲಾಯಿಸಿತಾದರು,ಚಿಕಿತ್ಸೆ ಫಲಕಾರಿಯಾಗದೆ ಅವರು ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ.