ಕೋಪನ್ ಹೇಗನ್ ಗುಂಡಿನ ದಾಳಿ, ೨ ಸಾವು, ೫ ಮಂದಿಗೆ ಗಾಯ

ಕೋಪನ್ ಹೇಗನ್: ಪ್ರವಾದಿ ಮಹಮದ್  ಅವರನ್ನು ಚಿತ್ರಿಸಿದ್ದ ಕಲಾವಿದ ಭಾಗವಹಿಸಿದ್ದ ಕಾರ್ಯಕ್ರಮದಲ್ಲಿ ನಡೆದ ಗುಂಡಿನ ದಾಳಿ ಮತ್ತು ಕೆಲವೇ ಘಂಟೆಗಳ ನಂತರ ನಡೆದ ಯಾಹೂದ್ಯರ ಪೂಜ್ಯಮಂದಿರದ ಮೇಲೆ ನಡೆದಿರುವ ಮತ್ತೊಂದು ಗುಂಡಿನ ದಾಳಿಯಲ್ಲಿ ಇಬ್ಬರು ಮೃತಪಟ್ಟಿದ್ದು, ಐದು ಜನ ಪೊಲೀಸರು ಗಾಯಗೊಂಡಿದ್ದಾರೆ. ಪ್ಯಾರಿಸ್ ನ ಚಾರ್ಲಿ ಹೆಬ್ಡೋ ಮೇಲೆ ನಡೆದ ದಾಳಿಯ ನಂತರ ಕೆಲವೇ ದಿನಗಳಲ್ಲಿ ನಡೆದಿರುವ ಈ ದಾಳಿ ಕೋಪನ್ ಹೇಗನ್ ನಲ್ಲಿ ಭಯಭೀತಿ ಸೃಷ್ಟಿಸಿದೆ.

ಶನಿವಾರ ಸಂಜೆ ಈ ಸಾಂಸ್ಕೃತಿಕ ಕಾರ್ಯಕ್ರಮ ಮತ್ತು ಯಹೂದ್ಯರ ದೇವಾಲಯದ ಮೇಲೆ ನಡೆದಿರುವ ದಾಳಿಗಳಿಗೆ ಸಂಬಂಧ ಇದೆಯೇ ಎಂದು ತಿಳಿದು ಬಂದಿಲ್ಲ ಎನ್ನುತ್ತಾರೆ ಪೊಲೀಸರು. ಎರಡೂ ದಾಳಿಗಳಲ್ಲಿ ದಾಳಿ ಮಾಡಿದವ ತಪ್ಪಿಸಿಕೊಂಡಿದ್ದಾನೆ.

ಈ ಭಯೋತ್ಪಾದಕ ದಾಳಿಯನ್ನು ಯೂರೋಪಿನ ಹಲವು ಮುಖಂಡರು ಖಂಡಿಸಿದ್ದಾರೆ. ಡೆನ್ಮಾರ್ಕ್ ಇಡೀ ಕಟ್ಟೆಚ್ಚರಿಕೆ ಘೋಷಿಸಿದ್ದು, ಭಯೋತ್ಪಾದಕರ ಶೋಧನೆ ನಡೆಯುತ್ತಿದೆ. "ಇದು ರಾಜಕೀಯ ದಾಳಿ ಆದುದರಿಂದ ಭಯೋತ್ಪಾದನೆ" ಎಂದಿದ್ದಾರೆ ಡೆನ್ಮಾರ್ಕ್ ಪ್ರಧಾನಿ ಹೆಲ್ಲೆ ಥಾರ್ನಿಂಗ್ ಸ್ಮಿಡ್ತ್.