ಮೌನದ ಮೆಲುಕುಗಳು

'ಮೌನ ಬಂಗಾರ..' ಎಂಬ ಹೋಲಿಕೆಯ
ಮಾತಿಗೆ ನನ್ನ ಪ್ರತಿಕ್ರಿಯೆ;
'ಅದು ಗಣಿಯಲ್ಲಿ ಅದಿರಾಗಿಯೇ ಇರಬೇಕಿತ್ತು..!'
-
ನಿನ್ನ ಮೌನದ ಗತ್ತಿಗೆ ಮಸೆದ ನನ್ನ ಹಲ್ಲುಗಳ ನೋಡಿ
ಮಸೆಗಲ್ಲು ಕೂಡ ನಾಚಿತು..!
-
ನಿನ್ನ ಮೌನದಿಂದ ನೀರಿಗೆ ಬಾಯಾರಿಕೆ, ತಂಪಿಗೆ ಸೆಖೆ;
ಬರಗಾಲದ ಪರ್ಯಾಯವೇ ನಿನ್ನ ಮೌನ..!
-
ನಿನ್ನ ಮೌನದ ಹಿಂದಣ ಗೊತ್ತಾದಾಗ ಮೌನವಾಗಿರಲು
ನನಗೂ ಹಿಂಜರಿಕೆಯಾಯಿತು..!
-
ನಿನ್ನ ಮೌನದ ಮತ್ತಿಗೆ ಬಲಿಯಾದವರ ರಾಶಿಯಲ್ಲಿ
ಬರೀ ನನ್ನ ಥರದ್ದೇ ಮುಖಗಳು..!
-
ನಿನ್ನ ಮೌನದಿಂದ ಹಗರಣಗಳೆಲ್ಲ ಮುಚ್ಚಿಹೋದವು
ಎಂಬುದು ನಿನ್ನ ತಾತ್ಕಾಲಿಕ ನಂಬಿಕೆಯಷ್ಟೇ..!
-
ನಿನ್ನ ಮೌನ, ಉಸಿರ ಹಾದಿಯ ಮೇಲೆ ನಡೆದ ಹಲ್ಲೆ;
ಹಸಿರ ಕೊರಳಿಗೆ ಒಡ್ಡಿದ ಉರುಳು..!
-
'ಮೌನಕ್ಕೆ ನೂರಾರು ಅರ್ಥ..' ಎನ್ನುವುದಕ್ಕೆ
ನಿನ್ನ ಮೌನ ವ್ಯತಿರಿಕ್ತ..!
-
'ಮೌನವೇ ಮಾತಾಡು..!' ಅಂದೆ.
ಮಾತೋ ಮಾತು;
ಹಗಲಿರುಳು ಸಾಲಾದವು...
ಗುಡ್ಡ ಬೆಟ್ಟ ಗದ್ದೆ ತೋಟ ಹೊಳೆದಂಡೆ ಸಾಗರತೀರ
ಕಾಡು ಮೇಡು ಗೂಡುಗಳ
ಕಿವಿ ತುಳುಕಿದವು...

ಕೊನೆಗೆ ನಾನೇ ಮೌನವಾಗಿಬಿಟ್ಟೆ!
-
ನಿನ್ನ ಮೌನದಲ್ಲಿ
ಕರುಣೆ ಅಕ್ಕರೆ ಒಲವುಗಳೆಲ್ಲವೂ ತುಂಬಿಕೊಂಡಿವೆ
ಎಂದೇ ಭಾವಿಸಿದ್ದೇನೆ ಈ ಕ್ಷಣದವರೆಗೂ..
ಅದು ನಿಜವಾಗಲು ಇನ್ನು ಇನ್ನೂ ನಿನ್ನ ಮೌನವನ್ನೇ
ಬಯಸುತ್ತೇನೆ...
ಮೌನವೇ, ನೀನು ಸಾವಿಗಿಂತಲೂ ಆಪ್ತ;
ಸಾವೇ,
ನೀನು ಮೌನಕ್ಕಿರುವ ಅಂತರಾತ್ಮ ಹೊಂದು,
ನಾನಾಗ ಆಳ ನಿರಾಳ..!
-
ಮೌನ ನೂರು ಚೂರಾಗಿ ಸಿಡಿದಾಗ
ಬಾಂಬುಗಳು ಸಹ ಹಾನಿಗೊಳಗಾದವರ ಪಟ್ಟಿಯಲ್ಲಿದ್ದವು..!
-
ಮಾತು ಸತ್ತ ಮರುದಿನವೇ
ನಿನ್ನ ನಂಟು ಪ್ರಾಪ್ತವಾಯಿತಾದರೂ
ಜೀವ ತೃಪ್ತವಾಗಲಿಲ್ಲ;
ಆಗಲೇ ನಾ ಬಿಳಿಹಾಳೆಗಳ ಮೇಲೆಅಲೆದಾಡುವುದ ರೂಢಿಸಿಕೊಂಡೆ..!
-
ಕಲ್ಲಾಗಿ ಬಿಟ್ಟೆ ಎಂದುಕೊಂಡು ಕಟೆಯ ಹತ್ತಿದೆ;
ಜೀವ ಧರಿಸಿ ನಿಂತೊಡನೆ ಮೌನ ಮೆಟ್ಟಿದೆ!
= ವಿಜಯಕಾಂತ ಪಾಟೀಲ