ನಾಭಿ ಕಮಲ

ಇದು ಬ್ರಹ್ಮ ಸೃಷ್ಟಿಸಿದ ಕಮಲವೋ ಬ್ರಹ್ಮನಿಗಾಗಿ ಸೃಷ್ಟಿಯಾದ ಕಮಲವೋ ಯಾರಿಗೂ ತಿಳಿಯದು. ಈ ಹೂವಿನೊಂದಿಗೆ ಪುರಾಣಗಳ ನಂಟು ಇದೆ. ಪವಿತ್ರ ಭಾವನೆಯಿದೆ. ಸೃಷ್ಟಿಕರ್ತ ಬ್ರಹ್ಮ ವಿಷ್ಣುವಿನ ನಾಭಿಯಿಂದ ಹೊರಬರುವಾಗ ಶ್ವೇತವರ್ಣದ ಕಮಲದ ಮೇಲೆ ಕುಳಿತಿದ್ದ. ಆ ಹೂವೇ ಈ ಬ್ರಹ್ಮ ಕಮಲ ಎಂಬ ಕತೆಯೂ ಇದೆ. ಏನೇ ಇರಲಿ ಈ ಹೂವಿನ ಸೌಂದರ್ಯಕ್ಕೆ ಮನಸೋಲದವರೇ ಇಲ್ಲ.
ಹಿಮಾಲಯ, ಉತ್ತರಾಖಂಡ, ಚೀನಾ ಮತ್ತು ಬರ್ಮಾಗಳಲ್ಲಿ ಹೆಚ್ಚಾಗಿ ಬೆಳೆಯುವ ಈ ಹೂ ಈಗ ಇತರ ಭಾಗಗಳಲ್ಲೂ ಕಂಡುಬರುತ್ತದೆ. ಇದನ್ನು ಕುಂಡಗಳಲ್ಲಿ ಹಾಕಿ ಬೆಳೆಸುತ್ತಾರೆ. 2ರಿಂದ 3 ಅಡಿ ಎತ್ತರ ಬೆಳೆಯುತ್ತದೆ. ಹೂ ಬಿಡುವುದು ವರ್ಷದಲ್ಲಿ ಒಂದೇ ಬಾರಿ. ಕ್ರಿಮಿ ಕೀಟಗಳಿಂದ ಪರಾಗಸ್ಪರ್ಶವಾಗುತ್ತದೆ. ಗಿಡ ಔಷಧಿಯ ಗುಣಗಳನ್ನೂ ಹೊಂದಿದ್ದು ನರ ಸಂಬಂಧಿ ಸಮಸ್ಯೆಗಳಿಗೆ ಔಷಧಿಯಾಗಿ ಉಪಯೋಗಿಸುತ್ತಾರೆ.
ಹಾಲು ಬಿಳುಪಿನ ಬಣ್ಣ, ಮತ್ತೇರಿಸುವ ಸುವಾಸನೆ ಈ ಹೂವಿನ ವೈಶಿಷ್ಟ್ಯ. ಪೂರ್ತಿ ಕತ್ತಲಾದ ಮೇಲೆ ಅರಳಲು ಪ್ರಾರಂಭವಾಗುತ್ತದೆ. ಈ ಹೂವು ಅರಳುವುದನ್ನು ನೋಡುವುದು ಕೂಡಾ ಒಂದು ವಿಶಿಷ್ಟ ಅನುಭವ. ಅರಳುವ ಈ ಪ್ರಕ್ರಿಯೆಯನ್ನು ಅಲ್ಲೇ ಕುಳಿತು ನೋಡಬಹುದು. ಅರಳಿದ ಹೂ 3-4 ಗಂಟೆಗಳಲ್ಲಿ ಮುಚ್ಚಿಬಿಡುತ್ತದೆ. ಬೆಳಗಾದ ಮೇಲೆ ನೋಡಬೇಕೆಂದರೆ ಸಾಧ್ಯವಿಲ್ಲ. ಇದರ ಸೌಂದರ್ಯ ಮತ್ತು ವೈಶಿಷ್ಟ್ಯಗಳಿಂದ ಈ ಹೂ ತುಂಬಾ ಅಪೂರ್ವವೆನಿಸಿದೆ. ಅರಳಿದ ಹೂವನ್ನು ನೋಡುವುದು ದೈವಿಕ ಅನುಭವ, ಅದು ದೇವರ ಆಶೀರ್ವಾದ ಎಂಬ ಭಾವನೆಗಳಿವೆ.
ಸಸ್ಯ ಶಾಸ್ತ್ರದ ಹೆಸರು ಡಛ್ಡಡಡಢ್ಠಜಛ ್ಟಛಿಢಛಟಟಛಡಿಛ. ಉತ್ತರಾಖಂಡ ರಾಜ್ಯ ಈ ಹೂವನ್ನು ರಾಜ್ಯದ ಹೂವಾಗಿ ಪರಿಗಣಿಸಿದೆ. ಆ ಬ್ರಹ್ಮ ಈ ರಾತ್ರಿ ರಾಣಿಗೆ ಯಾಕಿಷ್ಟು ಕ್ಷಣಿಕ ಸೌಂದರ್ಯ ಕೊಟ್ಟನೋ? ಇದರ ಹಿಂದೆ ಪ್ರಕೃತಿಯ ಯಾವ ರಹಸ್ಯವಿದೆಯೋ?

-ವೀಣಾ ಅನಂತ್