ಏಷ್ಯನ್ ಗೇಮ್ಸ್ 2026: ಚೀನಾ ವಿರುದ್ಧ ಸೋತ ಭಾರತೀಯ ಪುರುಷರ ಬ್ಯಾಡ್ಮಿಂಟನ್ ತಂಡ; ಕಂಚಿನ ಪದಕಕ್ಕೆ ತೃಪ್ತಿ!

ನಗೋಯಾ: ಜಪಾನ್ ನಲ್ಲಿ ನಗೋಯಾದಲ್ಲಿ ಬುಧವಾರ ನಡೆದ ಏಷ್ಯನ್ ಗೇಮ್ಸ್‌ನ ಸೆಮಿಫೈನಲ್‌ನಲ್ಲಿ ಭಾರತೀಯ ಪುರುಷರ ಬ್ಯಾಡ್ಮಿಂಟನ್ ತಂಡ ಚೀನಾ ವಿರುದ್ಧ 1-3 ಅಂತರದಲ್ಲಿ ಸೋಲನುಭವಿಸಿತು. ಇದರಿಂದ ಕಂಚಿನ ಪದಕಕ್ಕೆ ತೃಪ್ತಿಪಡಬೇಕಾಯಿತು.

ಸಿಂಗಲ್ಸ್ ಸ್ಪರ್ಧಿಗಳಾದ ಲಕ್ಷ್ಯ ಸೇನ್ ಮತ್ತು ಆಯುಷ್ ಶೆಟ್ಟಿ ತಮ್ಮ ಕ್ವಾರ್ಟರ್-ಫೈನಲ್ ಪ್ರದರ್ಶನವನ್ನು ಪುನರಾವರ್ತಿಸಲು ವಿಫಲರಾಗಿ ಸೋಲನ್ನು ಕಂಡರು. ಮಾಜಿ ವಿಶ್ವ ನಂ. 1 ಆಟಗಾರ ಶಿ ಯು ಕ್ವಿ ವಿರುದ್ಧದ ಪಂದ್ಯದಲ್ಲಿ ಲಕ್ಷ್ಯ 16-21, 18-21 ಅಂತರದಲ್ಲಿ ಸೋತರು. ಇದರಿಂದಾಗಿ ಹಾಲಿ ಚಾಂಪಿಯನ್ ಚೀನಾ ಮುನ್ನಡೆ ಸಾಧಿಸಿತು.

ಇತ್ತೀಚಿನ ಚೀನಾ ಮಾಸ್ಟರ್ಸ್ ಕೂಟದ ವಿಜೇತರಾದ ಸಾತ್ವಿಕ್‌ಸಾಯಿರಾಜ್ ರಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಅವರ ಡಬಲ್ಸ್ ಜೋಡಿಯು, ದಿನದ ಎರಡನೇ ಪಂದ್ಯದಲ್ಲಿ ಲಿಯಾಂಗ್ ವೈಕೆಂಗ್ ಮತ್ತು ವಾಂಗ್ ಚಾಂಗ್ ವಿರುದ್ಧ ನೇರ ಗೇಮ್‌ಗಳಲ್ಲಿ (21-11, 22-20) ಜಯಗಳಿಸುವ ಮೂಲಕ ಪಂದ್ಯವನ್ನು ಸಮಬಲಗೊಳಿಸಿತು.

ಆದಾಗ್ಯೂ, ಜಪಾನ್‌ನ ಕೋಕಿ ವಟನಾಬೆ ವಿರುದ್ಧ ಉತ್ತಮ ಜಯ ಸಾಧಿಸಲು ತಾಳ್ಮೆಯ ಆಟವಾಡಿದ್ದ ಆಯುಷ್, ಎರಡನೇ ಪುರುಷರ ಸಿಂಗಲ್ಸ್ ಪಂದ್ಯದಲ್ಲಿ ಲಿ ಶಿಫೆಂಗ್ ವಿರುದ್ಧ ಸೋತಿದ್ದರಿಂದ ಭಾರತ ಮತ್ತೆ ಹಿನ್ನಡೆ ಅನುಭವಿಸಿತು.

ಆಯುಷ್ ಉತ್ತಮ ಆರಂಭವನ್ನು ಪಡೆದು, ಮೊದಲ ಗೇಮ್‌ನ ಬಹುಭಾಗದಲ್ಲಿ ಮುನ್ನಡೆಯಲ್ಲಿದ್ದರು. ಆದರೆ, ಲಿ ಪಂದ್ಯದ ಮೇಲೆ ಹಿಡಿತ ಸಾಧಿಸಿ ಮೊದಲ ಗೇಮ್ ಅನ್ನು ತಮ್ಮದಾಗಿಸಿಕೊಂಡರು. ಇದರಿಂದಾಗಿ ನಿರಾಶೆಗೊಂಡ ಆಯುಷ್, ಎರಡನೇ ಗೇಮ್‌ನಲ್ಲಿ ಮತ್ತೆ ಗಮನಹರಿಸಲು ಮತ್ತು ಲಯ ಕಂಡುಕೊಳ್ಳಲು ವಿಫಲರಾದರು. 54 ನಿಮಿಷಗಳ ಈ ಪಂದ್ಯದ ಅಂತ್ಯದಲ್ಲಿ, ಲಿ ಅವರ ಪರವಾಗಿ 21-19, 21-13 ಅಂಕಗಳು ದಾಖಲಾದವು.

ಭಾರತ 1-2 ಅಂತರದಲ್ಲಿ ಹಿನ್ನಡೆಯಲ್ಲಿದ್ದಾಗ, ತಂಡವನ್ನು ಪಾರು ಮಾಡುವ ಜವಾಬ್ದಾರಿ ಹರಿಹರನ್ ಅಮಸಕರುಣನ್ ಮತ್ತು ಎಂ.ಆರ್. ಅರ್ಜುನ್ ಅವರನ್ನೊಳಗೊಂಡ ಎರಡನೇ ಡಬಲ್ಸ್ ಜೋಡಿಯ ಮೇಲಿತ್ತು. ಆದರೆ, ಅವರು ಹೇ ಜಿ ಟಿಂಗ್ ಮತ್ತು ಲಿಯು ಯಿ ಜೋಡಿಯ ವಿರುದ್ಧ ಹಿನ್ನಡೆಯಲ್ಲಿದ್ದುಕೊಂಡೇ ಹೋರಾಡಬೇಕಾಯಿತು.

ಚೀನೀ ಜೋಡಿಯು ಮೊದಲ ಗೇಮ್ ಅನ್ನು 25 ನಿಮಿಷಗಳಲ್ಲಿ ಗೆದ್ದು ಫೈನಲ್ ಪ್ರವೇಶಿಸುವ ಹಂತ ತಲುಪಿತು. ಆದರೆ ಭಾರತೀಯ ಜೋಡಿ ಕಠಿಣ ಪ್ರತಿರೋಧವೊಡ್ಡಿ ಎರಡನೇ ಗೇಮ್ ಅನ್ನು ಗೆದ್ದುಕೊಂಡಿತು. ಆದಾಗ್ಯೂ, ನಿರ್ಣಾಯಕ ಗೇಮ್‌ನಲ್ಲಿ ಭಾರತೀಯರು ಆಯಾಸಗೊಂಡಂತೆ ಕಂಡುಬಂದರು ಮತ್ತು ಅಂತಿಮವಾಗಿ ಚೀನೀ ಜೋಡಿಯು 21-16, 17-21, 21-9 ಅಂತರದಲ್ಲಿ ಜಯ ಸಾಧಿಸಿತು. ಇದರಿಂದಾಗಿ ಭಾರತ ಕಂಚಿನ ಪದಕ ಪಡೆದುಕೊಂಡಿತು.