SAFF U-17 Women’s championship: ಹಾಕಿ ಬಳಿಕ ಫುಟ್‌ಬಾಲ್‌ನಲ್ಲೂ ಜಾರ್ಖಂಡ್‌ನದ್ದೇ ಮೇಲುಗೈ; ಏಳು ಬಾಲಕಿಯರು ಆಯ್ಕೆ!

ರಾಂಚಿ: ಹಾಕಿಯಲ್ಲಿ ತನ್ನ ಸಾಮರ್ಥ್ಯವನ್ನು ಪ್ರದರ್ಶಿಸಿದ ನಂತರ, ಜಾರ್ಖಂಡ್ ಇದೀಗ ರಾಷ್ಟ್ರೀಯ ಫುಟ್‌ಬಾಲ್‌ನಲ್ಲೂ ಗಮನ ಸೆಳೆದಿದೆ. ಈ ವರ್ಷ ಭೂತಾನ್‌ನಲ್ಲಿ ನಡೆಯಲಿರುವ ಮುಂಬರುವ ದಕ್ಷಿಣ ಏಷ್ಯಾ ಫುಟ್‌ಬಾಲ್ ಫೆಡರೇಶನ್ (SAFF) U-17 ಮಹಿಳಾ ಚಾಂಪಿಯನ್‌ಶಿಪ್‌ಗಾಗಿ ದೇಶದ 23 ಸದಸ್ಯರ ತಂಡದಲ್ಲಿ ರಾಜ್ಯದ ಏಳು ಮಂದಿ ಸ್ಥಾನ ಪಡೆದಿದ್ದಾರೆ.

ಈ ಏಳು ಬಾಲಕಿಯರಲ್ಲಿ, ಐವರು ಗುಮ್ಲಾದ ಒಂದೇ ಶಾಲೆಯವರು ಮತ್ತು ರೈತ ಕುಟುಂಬಗಳಿಗೆ ಸೇರಿದವರು. ಉಳಿದ ಇಬ್ಬರು ರಾಂಚಿ ಮತ್ತು ಹಜಾರಿಬಾಗ್‌ನವರು. ಸೂರಜ್‌ಮುನಿ ಕುಮಾರಿ, ಎಲಿಜಬೆತ್ ಲಾಕ್ರಾ, ಅನಿತಾ ಡಂಗ್‌ಡಂಗ್, ವಿನಿತಾ ಹೀರೋ ಮತ್ತು ಬಿನಾ ಕುಮಾರಿ ಗುಮ್ಲಾ ವಸತಿ ಕೇಂದ್ರದಿಂದ ಆಯ್ಕೆಯಾದ ಆಟಗಾರ್ತಿಯರು. ಅನುಷ್ಕಾ ಕುಮಾರಿ ಹಜಾರಿಬಾಗ್ ವಸತಿ ಬಾಲಕಿಯರ ಫುಟ್‌ಬಾಲ್ ತರಬೇತಿ ಕೇಂದ್ರದವರು ಮತ್ತು ದಿವ್ಯಾನಿ ಲಿಂಡಾ ಸ್ಟಾರ್ ವಾರಿಯರ್ಸ್ ರಾಂಚಿಯವರು.

ಈ ಎಲ್ಲ ಆಟಗಾರ್ತಿಯರು ಆಗಸ್ಟ್ 20 ರಿಂದ 31 ರವರೆಗೆ ಭೂತಾನ್‌ನಲ್ಲಿ ನಡೆಯಲಿರುವ ಸ್ಪರ್ಧೆಗೆ ತಯಾರಿ ನಡೆಸಲು ಸದ್ಯ ಬೆಂಗಳೂರಿನಲ್ಲಿದ್ದಾರೆ. ಗುಮ್ಲಾ ಕೇಂದ್ರದಿಂದ ಐವರು ಆಟಗಾರ್ತಿಯರ ಆಯ್ಕೆ ಇಡೀ ಜಿಲ್ಲೆಗೆ ಹೆಮ್ಮೆಯ ವಿಷಯ ಎಂದು ತರಬೇತುದಾರ ವೀಣಾ ಕೆರ್ಕೆಟ್ಟಾ ಹೇಳಿದರು.

ಈ ಎಲ್ಲರು ರೈತ ಕುಟುಂಬಗಳಿಂದ ಬಂದವರು ಮತ್ತು ಕಠಿಣ ಪರಿಸ್ಥಿತಿಗಳ ನಡುವೆಯೂ ಫುಟ್ಬಾಲ್‌ಗಾಗಿ ತಮ್ಮ ಸಮರ್ಪಣೆ ಮತ್ತು ಕಠಿಣ ಪರಿಶ್ರಮದಿಂದ ಈ ಸ್ಥಾನವನ್ನು ತಲುಪಿದ್ದಾರೆ. ಗ್ರಾಮೀಣ ಪ್ರದೇಶಗಳಿಂದ ಬಂದು ಅಂತರರಾಷ್ಟ್ರೀಯ ಮಟ್ಟದ ಸ್ಪರ್ಧೆಯನ್ನು ತಲುಪುವುದು ಅವರ ಉತ್ಸಾಹ ಮತ್ತು ಕಠಿಣ ಪರಿಶ್ರಮದಿಂದ ಮಾತ್ರ ಸಾಧ್ಯ ಎಂದು ಹೇಳಿದರು.

'ಐದೂ ಆಟಗಾರ್ತಿಯರು ಗುಮ್ಲಾದ ಸೇಂಟ್ ಪ್ಯಾಟ್ರಿಕ್ ಪ್ರೌಢಶಾಲೆಯಲ್ಲಿ ಓದುತ್ತಿದ್ದಾರೆ. ಇವರಿಗೆ ಗುಮ್ಲಾ ವಸತಿ ಕೇಂದ್ರದಲ್ಲಿ ನಿಯಮಿತ ತರಬೇತಿ ನೀಡಲಾಗುತ್ತದೆ. ಇಲ್ಲಿ, ಅವರು ಆಟದ ಸೂಕ್ಷ್ಮ ವ್ಯತ್ಯಾಸಗಳ ಜೊತೆಗೆ ಫಿಟ್ನೆಸ್ ಮತ್ತು ಶಿಸ್ತಿನ ಮೇಲೆ ಗಮನ ಕೇಂದ್ರೀಕರಿಸುವಂತೆ ಮಾಡಲಾಗುತ್ತದೆ. ಗುಮ್ಲಾದ ಹೆಣ್ಣುಮಕ್ಕಳು ನಿರಂತರವಾಗಿ ರಾಷ್ಟ್ರ ಮಟ್ಟದಲ್ಲಿ ತಮ್ಮ ಛಾಪು ಮೂಡಿಸುತ್ತಿರುವುದಕ್ಕೆ ಇದೇ ಕಾರಣ' ಎಂದು ಕೆರ್ಕೆಟ್ಟಾ ಹೇಳಿದರು.

ಜಾರ್ಖಂಡ್ ಫುಟ್ಬಾಲ್ ಅಸೋಸಿಯೇಷನ್‌ನ ಪ್ರಧಾನ ಕಾರ್ಯದರ್ಶಿ ಗುಲಾಮ್ ರಬ್ಬಾನಿ ಮಾತನಾಡಿ, 'ಅವರು ತಳಮಟ್ಟದಲ್ಲಿ ಕೆಲಸ ಮಾಡುತ್ತಿದ್ದಾರೆ ಮತ್ತು ಉತ್ತಮ ಫಲಿತಾಂಶಗಳನ್ನು ಪಡೆಯುತ್ತಿದ್ದಾರೆ. ಭಾರತೀಯ ಮಹಿಳಾ ಫುಟ್ಬಾಲ್ ತಂಡದಲ್ಲಿ ಏಳು ಜನ ಆಯ್ಕೆಯಾಗಿರುವುದು ಜಾರ್ಖಂಡ್‌ಗೆ ಒಂದು ದೊಡ್ಡ ಸಾಧನೆಯಾಗಿದೆ ಮತ್ತು ನಾವು ಅದರ ಬಗ್ಗೆ ಹೆಮ್ಮೆಪಡುತ್ತೇವೆ. ರಾಜ್ಯದ ಗ್ರಾಮೀಣ ಪ್ರದೇಶಗಳಲ್ಲಿ ಸಾಕಷ್ಟು ಪ್ರತಿಭೆಗಳಿವೆ, ಆದ್ದರಿಂದ ನಾವು ತಳಮಟ್ಟದಲ್ಲಿ ಕೆಲಸ ಮಾಡುತ್ತಿದ್ದೇವೆ ಮತ್ತು ಈ ಆಟಗಾರರಿಗೆ ವಿಶೇಷ ಗಮನ ನೀಡುತ್ತಿದ್ದೇವೆ' ರಬ್ಬಾನಿ ಹೇಳಿದರು.

ಜಾರ್ಖಂಡ್ ಬಾಲಕಿಯರ ಫುಟ್‌ಬಾಲ್‌ನಲ್ಲಿ ಬಲವಾದ ಹಿನ್ನೆಲೆಯನ್ನು ಹೊಂದಿದೆ. ರಾಜ್ಯದ ಅನೇಕ ಮಹಿಳಾ ಆಟಗಾರ್ತಿಯರು ಈ ಹಿಂದೆ ಅಂತರರಾಷ್ಟ್ರೀಯ ಪಂದ್ಯಾವಳಿಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದಾರೆ.