ರಿಯೋ ಬೆಳ್ಳಿತಾರೆ ಪಿವಿ ಸಿಂಧು 3 ವರ್ಷಗಳಿಗೆ 50 ಕೋಟಿ ರು. ಒಪ್ಪಂದ

ಹೈದರಾಬಾದ್: ರಿಯೋ ಒಲಿಂಪಿಕ್ಸ್ ಬೆಳ್ಳಿ ಪದಕ ವಿಜೇತೆ ಭಾರತದ ಷಟ್ಲರ್ ತಾರೆ ಪಿವಿ ಸಿಂಧು ಅವರು ಭಾರಿ ಮೌಲ್ಯದ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ.

ಕ್ರೀಡಾ ಮ್ಯಾನೇಜ್ ಮೆಂಟ್ ಕಂಪನಿ ಬೇಸ್ ಲೈನ್ ವೆಂಚರ್ಸ್ ಜತೆ ಸಿಂಧು 3 ವರ್ಷಗಳಿಗೆ ಬರೋಬ್ಬರಿ 50 ಕೋಟಿ ರುಪಾಯಿ ಒಪ್ಪಂದ ಮಾಡಿಕೊಂಡಿದ್ದಾರೆ. ಈ ಮೂಲಕ ಸೈನಾ ನೆಹ್ವಾಲ್ ಮತ್ತು ಸಾನಿಯಾ ಮಿರ್ಜಾ ರನ್ನು ಮೀರಿಸಿ ದೇಶದ ಅತ್ಯಂತ ಸಿರಿವಂತ ಮಹಿಳಾ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಸಿಂಧು ಅವರ ಬ್ರಾಂಡ್ ವರ್ಚಸ್ಸು ವೃದ್ಧಿ, ಪರವಾನಗಿ, ಜಾಹೀರಾತು ಮುಂತಾದ ಮಾರುಕಟ್ಟೆ ವ್ಯವಹಾರಗಳನ್ನು ಬೇಸ್ ಲೈನ್ ನೋಡಿಕೊಳ್ಳಲಿದೆ. ಮುಂದಿನ 3 ವರ್ಷಗಳ ಅವಧಿಯಲ್ಲಿ ನಾವು ಸಿಂಧು ಅವರ ಮೌಲ್ಯವನ್ನು ಇನ್ನಷ್ಟು ಹೆಚ್ಚಿಸಲು ಪ್ರಯತ್ನಿಸುತ್ತೇವೆ ಎಂದು ಬೇಸ್ ಲೈನ್ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಹ ಸಂಸ್ಥಾಪಕ ಟುಹಿನ್ ಮಿಶ್ರಾ ತಿಳಿಸಿದ್ದಾರೆ.