ಟೀಂ ಇಂಡಿಯಾ ಬೌಲಿಂಗ್ ಕೋಚ್ ಆಗಲಿದ್ದಾರಾ ಆಶೀಶ್ ನೆಹ್ರಾ?

ನವದೆಹಲಿ: ಎಡಗೈ ವೇಗಿ ಆಶೀಶ್ ನೆಹ್ರಾ ಅವರು ಟೀಂ ಇಂಡಿಯಾದ  ಬೌಲಿಂಗ್ ಕೋಚ್ ಅಗುವ ಸಾಧ್ಯತೆಯಿದೆ.

ಬೌಲಿಂಗ್ ಕೋಚ್ ಸ್ಥಾನಕ್ಕೆ ವೇಗಿ ಜಹೀರ್ ಖಾನ್ ಹಾಗೂ ನೆಹ್ರಾ ಹೆಸರು ಕೇಳಿ ಬಂದಿದ್ದು, ನೆಹ್ರಾ ಹೆಸರು ಮುಂಚೂಣಿಯಲ್ಲಿದೆ.  ದೆಹಲಿಯ 37 ವರ್ಷ ವಯಸ್ಸಿನ ಆಶಿಶ್ ನೆಹ್ರಾ ಅವರು ಇತ್ತೀಚೆಗೆ ಭಾರತ ಟಿ20 ತಂಡಕ್ಕೆ ಸೇರ್ಪಡೆಯಾಗಿ ಅಚ್ಚರಿ ಮೂಡಿಸಿದ್ದರು. ಇಂಡಿಯನ್ ಪ್ರೀಮಿಯರ್ ಲೀಗ್ 9ರಲ್ಲೂ ನೆಹ್ರಾ ಆಡುತ್ತಿದ್ದಾರೆ.

ಜೂನ್ ತಿಂಗಳಿನಲ್ಲಿ ಜಿಂಬಾಬ್ವೆ ಪ್ರವಾಸ ಕೈಗೊಳ್ಳಲಿರುವ ಟೀಂ ಇಂಡಿಯಾಕ್ಕೆ ಹೊಸ ಕೋಚ್ ಆಗಿ ನೆಹ್ರಾ ಆಯ್ಕೆ ಬಹುತೇಕ ಖಚಿತ ಮೂಲಗಳು ತಿಳಿಸಿವೆ. ಜಿಂಬಾಬ್ವೆ ಪ್ರವಾಸಕ್ಕೆ ತೆರಳುವ ಮುನ್ನ ಮುಖ್ಯ ಕೋಚ್, ಸಹಾಯಕ ಕೋಚ್ ಮತ್ತು ಇತರ ಸಿಬ್ಬಂದಿಯ ಗುತ್ತಿಗೆ ನವೀಕರಿಸಬೇಕಿದೆ.

ಹೀಗಾಗಿ ಕೆಲವರ ಸ್ಥಾನ ಪಲ್ಲಟ, ಹೊಸಬರ ಸೇರ್ಪಡೆ ಅನಿವಾರ್ಯವಾಗಿದೆ. ಆದರೆ, ಟೆಸ್ಟ್, ಏಕದಿನ ಕ್ರಿಕೆಟ್​ನಿಂದ ದೂರ ಉಳಿದಿರುವ ನೆಹ್ರಾ ಅವರು ಇತ್ತೀಚೆಗೆ ಟಿ20 ಪಂದ್ಯಗಳಲ್ಲಿ ಮಾತ್ರ ಆಡುತ್ತಿದ್ದಾರೆ. ಏಷ್ಯಾ ಕಪ್ ಮತ್ತು ವಿಶ್ವ ಟಿ20 ತಂಡದಲ್ಲಿ ಸ್ಥಾನ ಪಡೆದಿದ್ದರು.