"ಬೆಳ್ಳಿ"ತಾರೆ ಪಿವಿ ಸಿಂಧುಗಾಗಿ ಬಿರಿಯಾನಿ, ಮೈಸೂರು ಪಾಕ್ ಸಿದ್ಧ ಪಡಿಸಿದ ತಾಯಿ

ಹೈದರಾಬಾದ್: ರಿಯೊ ಒಲಿಂಪಿಕ್ಸ್ ನಲ್ಲಿ ಬೆಳ್ಳಿ ಪದಕ ಗೆದ್ದು ತವರಿಗೆ ವಾಪಸ್ ಆಗಿರುವ "ಬೆಳ್ಳಿ"ತಾರೆ ಪಿವಿ ಸಿಂಧುಗಾಗಿ ಅವರ ತಾಯಿ ವಿಜಯ ಅವರು ಸ್ಪೆಷಲ್ ಬಿರಿಯಾನಿ ಹಾಗೂ ಮೈಸೂರು  ಪಾಕ್ ಸಿದ್ಧಪಡಿಸಿದ್ದಾರಂತೆ.

ಕೋಚ್ ಪುಲ್ಲೆಲ ಗೋಪಿಚಂದ್ ಆಜ್ಞೆ ಮೇರೆಗೆ ಒಲಿಂಪಿಕ್ಸ್ ಗಾಗಿ ಕಳೆದ ನಾಲ್ಕು ತಿಂಗಳಿನಿಂದ ಕಠಿಣ ಡಯಟ್ ನಲ್ಲಿದ್ದ ಪಿವಿ ಸಿಂಧು ಅವರು ಇಂದು ತಮ್ಮ ಡಯಟ್ ಅನ್ನು ಮುರಿಯಲಿದ್ದು, ಕೋಚ್  ಗೋಪಿಚಂದ್ ರೊಂದಿಗೆ ಔತಣಕೂಟದಲ್ಲಿ ಭಾಗಿಯಾಗಿ ತಮಗಿಷ್ಟದ ತಿನಿಸುಗಳನ್ನು ಸವಿಯಲಿದ್ದಾರೆ. ಪದಕ ವಿಜೇತ ಪುತ್ರಿ ಸಿಂಧುಗಾಗಿ ಅವರ ತಾಯಿ ವಿಜಯ ಅವರು ಹಲವು ತಿನಿಸುಗಳನ್ನು  ತಯಾರಿಸಿದ್ದು, ವಿಶೇಷವಾಗಿ ಹೈದರಾಬಾದ್ ಸ್ಪೆಷಲ್ ಬಿರಿಯಾನಿ ಹಾಗೂ ಮೈಸೂರು ಪಾಕ್ ಸಿದ್ಧಪಡಿಸಿದ್ದಾರಂತೆ.

ಇಂದು ಸಂಜೆ ಸಿಂಧು ಅವರ ಹೈದರಾಬಾದ್ ನ ಕೋಕಾಪೇಟಾ ನಿವಾಸದಲ್ಲಿ ನಡೆಯಲಿರುವ ಔತಣಕೂಟದಲ್ಲಿ ಕೋಚ್ ಗೋಪಿಚಂದ್ ಸೇರಿದಂತೆ ಸಿಂಧುರೊಂದಿಗೆ ರಿಯೋ ಗೆ ತೆರಳಿದ್ದ ಕ್ರೀಡಾ  ಇಲಾಖೆಯ ಸಹ ಅಧಿಕಾರಿಗಳು ಪಾಲ್ಗೊಳ್ಳಲ್ಲಿದ್ದಾರೆ.