ಸಾನಿಯಾ- ಹಿಂಗಿಸ್ ಗೆ ಮತ್ತೊಂದು ಗರಿ

ಗುವಂಗ್ಜೌ: ಪ್ರಚಂಡ ಫಾರ್ಮ್ ನಲ್ಲಿರುವ ಭಾರತದ ಸಾನಿಯಾ ಮಿರ್ಜಾ ಹಾಗೂ ಸ್ವಿಜರ್ಲೆಂಡ್ ನ ಮಾರ್ಟಿನಾ ಹಿಂಗಿಸ್ ಈ ಋತುವಿನಲ್ಲಿ ಮತ್ತೊಂದು ಪ್ರಶಸ್ತಿಯನ್ನು ಜಯಿಸಿ ಸಂಭ್ರಮಿಸಿದೆ.

ಶನಿವಾರವಷ್ಟೇ ಮುಕ್ತಾಯಗೊಂಡ ಗುವಂಗ್ಜೌ ಡಬ್ಲ್ಯೂಟಿಎ ಪಂದ್ಯಾವಳಿಯ ಮಹಿಳೆಯರ ಡಬಲ್ಸ್ ವಿಭಾಗದಲ್ಲಿ ಈ ಇಂಡೋ-ಸ್ವಿಸ್ ಜೋಡಿ ಚಾಂಪಿಯನ್ ಎನಿಸಿತು. ಪ್ರಶಸ್ತಿ ಸುತ್ತಿನ ಸೆಣೆಸಾಟದಲ್ಲಿ ಅಗ್ರಶ್ರೇಯಾಂಕಿತ ಜೋಡಿಯಾದ ಸಾನಿಯಾ ಮತ್ತು ಹಿಂಗಿಸ್ ಶ್ರೇಯಾಂಕ ರಹಿತ ಆಟಗಾರ್ತಿಯಾದ ಚೀನಾದ ಶಿಲಿನ್ ಕಸು ಹಾಗೂ ಕ್ಸಿಯೋಡಿ ಯು ವಿರುದ್ಧ 6 -3 ,6 -1 ರ ಎರಡು ನೇರ ಸೆಟ್ ಗಳ ಆಟದಲ್ಲಿ ಮಣಿಸಿ ಪ್ರಶಸ್ತಿ ಪಡೆದರು.

ಕಳೆದ 2015 ಮಾರ್ಚ್ ತಿಂಗಳಿನಲ್ಲಿ ಜತೆಯಾದ ಕ್ಷಣದಿಂದಲೂ ಅದ್ವಿತೀಯ ಪ್ರದರ್ಶನ ನೀಡುತ್ತಾ ಸಾಗಿರುವ ಸಾನಿಯಾ ಮತ್ತು ಹಿಂಗಿಸ್ ಕೇವಲ 58 ನಿಮಿಷಗಳಲ್ಲೇ ಪಂದ್ಯವನ್ನು ಕೈವಶಮಾಡಿಕೊಂಡರು. ಈಗಾಗಳೇ ಈ ಋತುವಿನಲ್ಲಿ ವಿಂಬಲ್ಡನ್, ಯುಎಸ್ ಓಪನ್ ಗ್ರಾಂಡ್ ಸ್ಲಾಮ್ ಪ್ರಶಸ್ತಿಗಳನ್ನು ಜಯಿಸಿದ ಸಾನಿಯಾ- ಹಿಂಗಿಸ್, ಇಂಡಿಯನ್ ವೇಲ್ಸ್, ವಿಯಾಮಿ ಹಾಗೂ ಚಾಲೆಸ್ಟನ್ ಪಂದ್ಯಾವಳಿಗಳಲ್ಲಿಯೂ ಪ್ರಶಸ್ತಿ ಪಡೆದಿತ್ತು.