ದಾಲ್ಮಿಯಾ ನಿಧನ: ಬಿಸಿಸಿಐ ಅಧ್ಯಕ್ಷ ಸ್ಥಾನದ ಗೊಂದಲ

ನವದೆಹಲಿ: ಜಗಮೋಹನ್ ದಾಲ್ಮಿಯಾ ಅವರ ನಿಧನದ ನಂತರ ತೆರವಾಗಿರುವ ಬಿಸಿಸಿಐ ಅಧ್ಯಕ್ಷ ಸ್ಥಾನವನ್ನು ತುಂಬುವ ಬಗ್ಗೆ ಈಗ ಸಾಕಷ್ಟು ಗೊಂದಲಗಳು ಮೂಡಿವೆ.

ಬಿಸಿಸಿಐ ಸಂವಿಧಾನದ ಪ್ರಕಾರ, ಅಧಿಕಾರದ ಅವಧಿಯ ಮಧ್ಯದಲ್ಲಿ ಮಂಡಳಿಯ ಅಧ್ಯಕ್ಷರು ವಿಧಿವಶರಾದರೆ, ಸಂಸ್ಥೆಯ ಕಾರ್ಯದರ್ಶಿ 15 ದಿನಗಳ ಒಳಗಾಗಿ ವಿಷೇಶ ಮಹಾ ಸಭೆಯನ್ನು ಕರೆದು ನೂತನ ಅಧ್ಯಕ್ಷರನ್ನು ಆಯ್ಕೆ ಮಾಡಬೇಕು.

ಮೃತಪಟ್ಟ ಅಧ್ಯಕ್ಷ ಯಾವ ವಲಯದಿಂದ ಆಯ್ಕೆಯಾಗಿರುತ್ತಾರೊ ಆ ವಲಯದ ಬೆಂಬಲದಿಂದ, ಅವಧಿ ಪೂರ್ಣಗೊಳ್ಳುವವರೆಗೂ ಹೊಸ ಅಧ್ಯಕ್ಷ ಆಯ್ಕೆಯಾಗಬೇಕು. ಇನ್ನು ಈಗಾಗಲೇ ನಡೆಯಬೇಕಿದ್ದ ವಾರ್ಷಿಕ ಮಹಾ ಸಭೆಯನ್ನು ಶ್ರೀನಿವಾಸನ್ ಭಾಗವಹಿಸುವಿಕೆಯ ಬಗ್ಗೆ ಸುಪ್ರೀಂ ಕೋರ್ಟ್‍ನಿಂದ ಸ್ಪಷ್ಟನೆ ಪಡೆಯುವವರೆಗೂ ನಡೆಸಲಾಗುತ್ತಿಲ್ಲ.

ಈ ಮಧ್ಯೆ ಈ ವಿಷೇಶ ಮಹಾ ಸಭೆಯನ್ನು ನಡೆಸುವ ಬಗ್ಗೆ ಕಾರ್ಯದರ್ಶಿ ಅನುರಾಗ್ ಠಾಕೂರ್ ಯಾವ ರೀತಿ ನಿರ್ಧಾರ ಕೈಗೊಳ್ಳಲಿದ್ದಾರೆ ಎಂಬುದು ಗೊಂದಲ ಮೂಡಿಸಿದೆ.