ಲಂಕಾ ದಹನ; ಸೆಮೀಸ್ ಗೆ ಲಗ್ಗೆ ಇಟ್ಟ ದಕ್ಷಿಣ ಆಫ್ರಿಕಾ

ಸಿಡ್ನಿ: ವಿಶ್ವಕಪ್ ಕ್ರಿಕೆಟ್ ಟೂರ್ನಿಯ ಮೊದಲ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ದಕ್ಷಿಣ ಆಫ್ರಿಕಾ ತಂಡ 9 ವಿಕೆಟ್ ಗಳ ಭರ್ಜರಿ ಜಯ ಸಾಧಿಸಿದೆ.

ಸಿಡ್ನಿಯಲ್ಲಿ ಇಂದು ನಡೆದ ಮೊದಲ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡ ಕೇವಲ 37.2 ಓವರ್ ಗಳಲ್ಲಿ 133 ರನ್ ಗಳಿಗೇ  ಆಲ್ ಔಟ್ ಆಯಿತು. ಕುಮಾರ ಸಂಗಕ್ಕಾರ (45 ರನ್) ಮತ್ತು ತಿರುಮಾನ್ನೆ (41 ರನ್) ಅವರನ್ನು ಹೊರತು ಪಡಿಸಿದರೆ ತಂಡ ಉಳಿದ ಯಾವುದೇ ಆಟಗಾರರೂ ಕ್ರೀಸ್ ನಲ್ಲಿ ಗಟ್ಟಿಯಾಗಿ ನಿಂತು ಆಡುವ ಧೈರ್ಯ ಮಾಡಲಿಲ್ಲ. ಆರಂಭಿಕ 4 ರನ್ ಗಳ ಅಂತರದಲ್ಲಿಯೇ ಲಂಕಾದ ಆರಂಭಿಕರು

ಪೆವಿಲಿಯನ್ ಸೇರಿಕೊಂಡಿದ್ದು, ದಕ್ಷಿಣ ಆಫ್ರಿಕಾ ತಂಡದ ಪ್ರಭಾವಿ ಬೌಲಿಂಗ್ ಗೆ ಹಿಡಿದ ಕನ್ನಡಿಯಾಗಿತ್ತು. ದಕ್ಷಿಣ ಆಫ್ರಿಕಾ ತಂಡದ ಬೌಲರ್ ಗಳ ಆರ್ಭಟದ ಬೌಲಿಂಗ್ ಮುಂದು ಮಂಕಾದ ಲಂಕಾ ದಾಂಡಿಗರು ಪೆವಿಲಿಯನ್  ಪರೇಡ್ ನಡೆಸಿದರು. ಅಂತಿಮವಾಗಿ ಶ್ರೀಲಂಕಾ ತಂಡ 133 ರನ್ ಗಳಿಗೇ ಆಲ್ ಔಟ್ ಆಯಿತು.

ದಕ್ಷಿಣ ಆಫ್ರಿಕಾ ಪರ ಉತ್ತಮವಾಗಿ ಬೌಲಿಂಗ್ ಮಾಡಿದ ಇಮ್ರಾನ್ ತಾಹಿರ್ (4 ವಿಕೆಟ್), ಜೆಪಿ ಡುಮಿನಿ (3 ವಿಕೆಟ್) ಯಶಸ್ವಿ ಬೌಲರ್ ಎನಿಸಿಕೊಂಡರು. ಉಳಿದಂತೆ ಸ್ಟೈನ್, ಅಬಾಟ್, ಮಾರ್ಕೆಲ್ ತಲಾ 1 ವಿಕೆಟ್ ಗಳಿಸಿದರು.

ಸಾಧಾರಣ ಮೊತ್ತದ ಬೆನ್ನು ಹತ್ತಿದ ದಕ್ಷಿಣ ಆಫ್ರಿಕಾ ತಂಡ ಕೇವಲ 18 ಓವರ್ ಗಳಲ್ಲಿಯೇ ಲಂಕಾ ನಿಡಿದ್ದ 134 ರನ್ ಗಳ ಸಾಧಾರಣ ಮೊತ್ತವನ್ನು ಯಶಸ್ವಿಯಾಗಿ ಗುರಿ ಮುಟ್ಟಿತು. ಆರಂಭಿಕ ಆಟಗಾರ ಹಶೀಂ ಆಮ್ಲಾ 16 ರನ್ ಗಳಿಸಿ ಮಲಿಂಗಾ ಅವರಿಗೆ ವಿಕೆಟ್ ಒಪ್ಪಿಸಿದರು. ಆದರೂ, ಮತ್ತೋರ್ವ ಆರಂಭಿಕ ಆಟಗಾರ ಡಿಕಾಕ್ ಅವರು ಗಟ್ಟಿಯಾಗಿ ಕ್ರೀಸ್ ನಲ್ಲಿ ನಿಂತು ಅಜೇಯ 78 ರನ್ ಗಳಿಸುವ ಮೂಲಕ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಮಧ್ಯಮ ಕ್ರಮಾಂಕದ ಆಟಗಾರ ಡುಪ್ಲೆಸಿಸ್ (21 ರನ್) ಅವರು ಡಿಕಾಕ್ ಅವರಿಗೆ ಉತ್ತಮ ಸಾಥ್ ನೀಡಿದರು.

ಆ ಮೂಲಕ ದಕ್ಷಿಣ ಆಫ್ರಿಕಾ ತಂಡ ಸೆಮಿ ಫೈನಲ್ ಗೆ ಸುಲಭವಾಗಿ ಪ್ರವೇಶ ಪಡೆಯಿತು. ಶ್ರೀಲಂಕಾ ವಿರುದ್ಧ ಉತ್ತಮವಾಗಿ ಬೌಲಿಂಗ್ ಮಾಡಿ ಪ್ರಮುಖ 4 ವಿಕೆಟ್ ಕಬಳಿಸಿದ ದಕ್ಷಿಣ ಆಪ್ರಿಕಾದ ಇಮ್ರಾನ್ ತಾಹಿರ್ ಅರ್ಹವಾಗಿಯೇ ಪಂದ್ಯ ಪುರುಷೋತ್ತಮ ಪ್ರಶಸ್ತಿಗೆ ಭಾಜನರಾದರು.