ಚುಟುಕು ಅನುಭವ ಸಾಕಷ್ಟಿದೆ: ಉತ್ತಪ್ಪ

ಜಿಂಬಾಬ್ವೆ ವಿರುದ್ಧ ಶುಕ್ರವಾರ ನಡೆದ ಟಿ20 ಪಂದ್ಯದಲ್ಲಿ ಭಾರತದ ಐವರು ಯುವ ಆಟಗಾರರಿಗೆ ಆಡುವ ಅವಕಾಶ ಸಿಕ್ಕಿದ್ದು ಮಾಧ್ಯಮಗಳಲ್ಲಿ ದೊಡ್ಡ ಸುದ್ದಿಯಾಗಿತ್ತು. ಆದರೆ, ಇದಕ್ಕೆ ಪ್ರತಿಕ್ರಿಯಿಸಿರುವ ಟೀಂ ಇಂಡಿಯಾದ ಬ್ಯಾಟ್ಸ್ಮನ್ ರಾಬಿನ್ ಉತ್ತಪ್ಪ, ಅಸಲಿಗೆ ಟಿ20ಯಲ್ಲಿ ಆಡುವುದು ನಮ್ಮ ಯುವ ಆಟಗಾರರಿಗೆ ಹೊಸತೇನಲ್ಲ. ಇಂಥ ಪಂದ್ಯಗಳಲ್ಲಿ ಆಗುವ ಮಾನಸಿಕ ಒತ್ತಡವನ್ನು ನಿಭಾಯಿಸುವಷ್ಟು ಅಪಾರ ಅನುಭವ ನಮ್ಮ ಆಟಗಾರರಲ್ಲಿದೆ ಎಂದು ಅವರು ಹೇಳಿದ್ದಾರೆ.

ಬುಧವಾರ ನಡೆದ ಟಿ20 ಪಂದ್ಯದಲ್ಲಿ ಮನೀಶ್ ಪಾಂಡೆ, ಸ್ಟುವರ್ಟ್ ಬಿನ್ನಿ, ಕೇದಾರ್ ಜಾಧವ್, ಸಂದೀಪ್ ಶರ್ಮಾ, ಅಕ್ಷರ್ ಪಟೇಲ್ ಅವರಿಗೆ ಅವ ಕಾಶ ನೀಡಲಾಗಿತ್ತು. ಈ ಬಗ್ಗೆ ಅನಿಸಿಕೆ ವ್ಯಕ್ತಪಡಿಸಿರುವ ರಾಬಿನ್, ``ಈ ಐವರಲ್ಲಿ ಪ್ರತಿಯೊಬ್ಬರೂ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ನಲ್ಲಿ ಕನಿಷ್ಟವೆಂದರೂ 100 ಪಂದ್ಯಗಳನ್ನಾಡಿದ್ದಾರೆ. ಅಲ್ಲದೆ, ಜಗತ್ತಿನ ಸ್ಟಾರ್ ಕ್ರಿಕೆಟಿಗರ ಎದುರು ಆಡಿದ ಅನುಭವವೂ ಇದೆ. ಹಾಗಾಗಿ, ಅವರಿಗೆ ಅಂತಾರಾಷ್ಟ್ರೀಯ ಟಿ20ಯಲ್ಲಿನ ಒತ್ತಡ ಎದುರಿಸುವುದು ಕಷ್ಟವೇನಲ್ಲ'' ಎಂದಿದ್ದಾರೆ.