ಮೊದಲ ಟಿ 20: ಜಿಂಬಾಬ್ವೆ ವಿರುದ್ಧ ಭಾರತಕ್ಕೆ 54ರನ್ ಗೆಲುವು

ಹರಾರೆ: ಜಿಂಬಾಬ್ವೆ ವಿರುದ್ಧದ ಏಕದಿನ ಸರಣಿಯನ್ನು ಕ್ಲೀನ್‍ಸ್ವೀಪ್ ಮಾಡಿಕೊಂಡಿದ್ದ ಟೀಂ ಇಂಡಿಯಾ, ಇಂದು ಹರಾರೆಯಲ್ಲಿ ನಡೆದ ಮೊದಲ ಟಿ20 ಪಂದ್ಯದಲ್ಲೂ 54 ರನ್‌ಗಳ ಭರ್ಜರಿ ಜಯ ಗಳಿಸಿದೆ.

ಟಾಸ್ ಗೆದ್ದು, ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದ ಟೀಂ ಇಂಡಿಯಾ, ನಿಗದಿತ 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 178 ರನ್ ಗಳಿಸಿತ್ತು. ಭಾರತದ 179 ರನ್ ಬೆನ್ನಟ್ಟಿದ್ದ ಜಿಂಬಾಬ್ವೆ, ನಿಗದಿತ 20 ಓವರ್‌ಗಳಲ್ಲಿ, ಏಳು ವಿಕೆಟ್ ನಷ್ಟಕ್ಕೆ ಕೇವಲ 124 ರನ್‌ ಗಳಿಸಿತು.

ಅಜೇಯ ರಾಬಿನ್‌ ಉತ್ತಪ್ಪ 35 ಬಾಲ್‌ಗಳಲ್ಲಿ, ನಾಲ್ಕು ಬೌಂಡರಿ ಹೊಡೆದು, 39 ರನ್ ಗಳಿಸಿದರು. ಎರಡು ಬೌಂಡರಿಗಳೊಂದಿಗೆ ನಾಯಕ ಅಜಿಂಕ್ಯ ರಹಾನೆ 32 ಬಾಲ್‌ಗಳಲ್ಲಿ, 33 ರನ್ ಗಳಿಸಿದರೆ, ಮುರಳಿ ವಿಜಯ್ 19 ಬಾಲ್‌ಗಳಲ್ಲಿ ಒಂದು ಸಿಕ್ಸ್ ಹಾಗೂ ನಾಲ್ಕು ಬೌಂಡರಿಗಳೊಂದಿಗೆ ಭಾರತದ ರನ್ ರೇಟ್ ಹೆಚ್ಚಿಸಿದರು. ಸಿಕಂದರ್ ರಾಜಾ ಬಾಲಿಗೆ ಮುರಳಿ ರನ್ಔಟ್ ಆದರು.

ಜಿಂಬಾಬ್ವೆಯ ಕ್ರಿಸ್ ಎಂಪೌಫು ನಾಲ್ಕು ಓವರ್‌ಗಳಲ್ಲಿ, 33 ರನ್ ನೀಡಿ ಮೂರು ವಿಕೆಟ್‌ಗಳನ್ನು ಪಡೆದರೆ, ಗ್ರೇಮ್ ಕ್ರೀಮರ್, ನಾಲ್ಕು ಓವರ್‌ಗಳಲ್ಲಿ 20 ರನ್‌ಗಳನ್ನು ನೀಡಿ, ಒಂದು ವಿಕೆಟ್‌ ಪಡೆಯುವಲ್ಲಿ ಯಶಸ್ವಿಯಾದರು.