ಬಗಾನ್ ಗೆ ತತ್ತರಿಸಿದ ಬೆಂಗಳೂರು ಎಫ್ ಸಿ

ಕೋಲ್ಕತಾ: ಅತಿಥೇಯ ಮೋಹನ್ ಬಗಾನ್ ಆಟಗಾರರ ಆಕ್ರಮಣಕಾರಿ ಆಟದ ಮುಂದೆ ಮಂಕಾದ ಬೆಂಗಳೂರು ಎಫ್ ಸಿ ಐ-ಲೀಗ್ ಫುಟ್ಬಾಲ್ ಟೂರ್ನಿಯ ಪಂದ್ಯದಲ್ಲಿ ಹೀನಾಯ ಸೋಲನುಭವಿಸಿದೆ. ಶುಕ್ರವಾರ ವಿವೇಕಾನಂದ ಯುವ ಭಾರತಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೋಹನ್ ಬಗಾನ್ 4-1 ಗೋಲುಗಳ ಅಂತರದಲ್ಲಿ ಬೆಂಗಳೂರು ಎಫ್ ಸಿ ವಿರುದ್ಧ ಗೆಲವು ದಾಖಲಿಸಿತು.

ಈ ಪಂದ್ಯ ಗೆಲ್ಲುವ ಮೂಲಕ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವ ಕನಸು ಕಾಣುತ್ತಿದ್ದ ಬೆಂಗಳೂರು ಎಫ್ ಸಿ, ಪಂದ್ಯದ 8ನೇ ನಿಮಿಷದಲ್ಲಿ ನಾಯಕ ಸುನೀಲ್ ಛೆಟ್ರಿ ದಾಖಲಿಸಿದ ಗೋಲಿನ ನೆರವನಿಂದ ಪಂದ್ಯದಲ್ಲಿ 1-2 ಮುನ್ನಡೆ ಸಾಧಿಸಿತು. ನಂತರ 31ನೇ ನಿಮಿಷದಲ್ಲಿ ನೋರ್ಡೆ ದಾಖಲಿಸಿದ ಗೋಲ್ ನ ನೆರವಿನಿಂದ ಬಗಾನ್ ತಂಡ 1-1 ರ ಸಮಬಲ ಸಾದಿಸಿತು.

ಆದರೆ ಪಂದ್ಯದ ಅಂತಿಮ ಘಟ್ಟದಲ್ಲಿ ಬಗಾನ್ ತಂಡದ ಸಂಘಟಿತ ದಾಳಿ ನಡೆಸಿ ಕೇವಲ 14 ನಿಮಿಷ ಅಂತರದಲ್ಲಿ 3 ಗೋಲು ದಾಖಲಿಸಿತು. ಪಂದ್ಯದ 76ನೇ ನಿಮಿಷ ನೊರ್ಡೆ, 86ನೇ ನಿಮಿಷ ಯೂಸಾ, 90+2ನೇ ನಿಮಿಷದಲ್ಲಿ ಬಿಕ್ರಮ್ ಜಿತ್ ಗೋಲು ದಾಖಲಿಸಿ ತಂಡಕ್ಕೆ ಅರ್ಹ ಗೆಲವು ತಂದುಕೊಟ್ಟರು.