ಗೆಲವಿನ ನಿರೀಕ್ಷೆಯಲ್ಲಿ ಬಿಎಫ್‌ಸಿ

ಬೆಂಗಳೂರು: ಮಲೇಷ್ಯಾದಲ್ಲಿ ಕೆಲ ದಿನಗಳ ಹಿಂದೆಯಷ್ಟೇ ನಡೆದ ಎಎಫ್ ಸಿ ಚಾಂಪಿಯನ್ಸ್ ಲೀಗ್‌ನ ಪ್ರಾಥಮಿಕ ಸುತ್ತಿನಲ್ಲಿ ಸ್ಥಳೀಯ ಕ್ಲಬ್ ತಂಡದ ವಿರುದ್ಧ ಸೋಲನುಭಾವಿಸಿದರೂ ಗಮನಾರ್ಹ ಪ್ರದರ್ಶನ ತೋರಿದ್ದ ಬೆಂಗಳೂರು ಎಫ್‌ಸಿ ಈಗ ಐ-ಲೀಗ್‌ನ ತನ್ನ ಮುಂದಿನ ಪಂದ್ಯದಲ್ಲಿ ಭಾರತ್ ಎಫ್‌ಸಿ ವಿರುದ್ಧ ಗೆಲವಿನ ಕನಸು ಹೊತ್ತು ಕಣಕ್ಕಿಳಿಯಲು ಸಿದ್ದವಾಗಿದೆ.

ಭಾನುವಾರ ನಗರದ ಕಂಠೀರವ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಬೆಂಗಳೂರು ಎಫ್‌ಸಿ, ಇದೇ ಮೊದಲ ಬಾರಿಗೆ ಐ-ಲೀಗ್ ಪ್ರವೇಶ ಪಡೆದಿರುವ ಭಾರತ್ ಎಫ್‌ಸಿ ಗೆಲವು ದಾಖಲಿಸುವ ನಿರೀಕ್ಷೆ ಇದೆ. ಬಿಎಫ್‌ಸಿ ತಂಡದ ಫಾರ್ಮ್ ಅನ್ನು ಗಮನದಲ್ಲಿಟ್ಟುಕೊಂಡು ನೋಡುವುದಾದರೆ, ಬಿಎಫ್‌ಸಿ ಎದುರು ಭಾರತ್ ಎಫ್‌ಸಿ ದುರ್ಬಲ ತಂಡ ಎಂಬಂತಿದೆ. ಆಡಿರುವ ನಾಲ್ಕು ಪಂದ್ಯಗಳ ಪೈಕಿ 1 ಜಯ, 1 ಡ್ರಾ ಮತ್ತು 2 ಸೋಲಿನ ಫಲಿತಾಂಶ ಅನುಭವಿಸಿರುವ ಬಿಎಫ್‌ಸ ತಂಡ ಒಟ್ಟು 4 ಅಂಕಗಳಿಸಿದೆ. ಮತ್ತೊಂದೆಡೆ ಭಾರತ್ ಎಫ್‌ಸಿ ಆಡಿರುವ 2 ಪಂದ್ಯಗಳ ಪೈಕಿ 1 ಡ್ರಾ ಹಾಗೂ 1 ಸೋಲಿನೊಂದಿಗೆ ಕೇವಲ 1 ಅಂಕದ ಸಂಪಾದನೆಯಲ್ಲಿದೆ.