ಕೆಟ್ಟ ಆರಂಭ ದುಬಾರಿಯಾಯ್ತು: ನಾಯಕ ರೋಹಿತ್ ಶರ್ಮಾ ಸೋಲಿನ ಪರಮರ್ಶೆ

ಅಹ್ಮದಾಬಾದ್: ಪ್ರಸಕ್ತ ಐಪಿಎಲ್ ಟೂರ್ನಿಯಲ್ಲಿ ಆಡಿರುವ ಮೂರೂ ಪಂದ್ಯಗಳನ್ನು ಮುಂಬೈ ಇಂಡಿಯನ್ಸ್ ತಂಡ ಸೋತು ತೀವ್ರ ಮುಖಭಂಗ ಅನುಭವಿಸಿದೆ.

ತಂಡ ಬ್ಯಾಟಿಂಗ್‍ನಲ್ಲಿ ಆರಂಭದಲ್ಲೇ ಕುಸಿತ ಕಾಣುತ್ತಿರುವುದು ಮತ್ತು ಬೌಲಿಂಗ್‍ನಲ್ಲಿ ಶಿಸ್ತುಬದ್ಧ ದಾಳಿಯ ಕೊರತೆ ಸೋಲಿಗೆ ಕಾರಣವಾಗಿದೆ ಎಂದು ನಾಯಕ ರೋಹಿತ್ ಶರ್ಮಾ ಹೇಳಿದ್ದಾರೆ.

ಪ್ರತಿ ಪಂದ್ಯದಲ್ಲೂ ನಾವು ಉತ್ತಮ ಆರಂಭ ಪಡೆದಿಲ್ಲ. ಬ್ಯಾಟಿಂಗ್ ವಿಭಾಗದಲ್ಲಿ ಕಳಪೆ ಪ್ರದರ್ಶನ ಮುಂದುವರಿಸಿದ್ದೇವೆ. ದಾಂಡಿಗರು ಮತ್ತಷ್ಟು ಹೆಚ್ಚು ಜವಾಬ್ದಾರಿ ಹೊತ್ತುಕೊಳ್ಳಬೇಕಿದೆ.

ಅಲ್ಲದೆ ಬೌಲಿಂಗ್ ಪ್ರದರ್ಶನದಲ್ಲಿ ಶಿಸ್ತಿನ ದಾಳಿ ಅಗತ್ಯವಿದೆ ಎಂದು ತಿಳಿಸಿದರು. ರಾಜಸ್ಥಾನ ರಾಯಲ್ಸ್ ವಿರುದ್ಧ ಪಂದ್ಯದಲ್ಲಿ ತಂಡ ಮತ್ತೆ ಹೋರಾಟ ನಡೆಸಲು ನೆರವಾದ ಕೋರಿ ಆ್ಯಂಡರ್ಸನ್ ಹಾಗೂ ಕೀರನ್ ಪೊಲಾರ್ಡ್‍ಗೆ ಧನ್ಯವಾದಗಳು. ಈ ಇಬ್ಬರು ಆಟಗಾರರ ಶತಕದ(104) ಜತೆಯಾಟ ತಂಡ ಗೌರವಯುತ ಮೊತ್ತ ಪೇರಿಸಲು ನೆರವಾಯಿತು. ಸತತ ಮೂರು ಪಂದ್ಯಗಳಲ್ಲಿ ಸೋಲನುಭವಿಸಿರುವುದರಿಂದ ನಾವು ಸುಧಾರಣೆ ಕಾಣಬೇಕಿದೆ ಎಂದರು.

ಫಿಂಚ್ ಹೊರಕ್ಕೆ
ಮುಂಬೈ ಇಂಡಿಯನ್ಸ್ ತಂಡದ ಆರಂಭಿಕ ಬ್ಯಾಟ್ಸ್ ಮನ್ ಎರಾನ್ ಫಿಂಚ್ ಸ್ನಾಯು ಸೆಳೆತದಿಂದ ಬಳುತ್ತಿದ್ದು, ಐಪಿಎಲ್ ಟೂರ್ನಿಯ ಮುಂದಿನ ಪಂದ್ಯಗಳಿಂದ ಹೊರಗುಳಿಯುವುದು ಬಹುತೇಕ ಖಚಿತ ವಾಗಿದೆ. ರಾಜಸ್ಥಾನ ವಿರುದ್ಧ ಪಂದ್ಯದಲ್ಲಿ ಫಿಂಚ್ ಗಾಯಗೊಂಡಿದ್ದರು.