ಆಟಗಾರನನ್ನು ಬುಕ್ಕಿ ಸಂಪರ್ಕಿಸಿದ್ದು ನಿಜ: ದಾಲ್ಮಿಯಾ

ಮುಂಬೈ: ರಾಜಸ್ತಾನ ತಂಡ ಆಟಗಾರನೊಬ್ಬನನ್ನು ಬುಕ್ಕಿಗಳು ಸಂಪರ್ಕಿಸಿದ್ದು ನಿಜ ಎಂದು ಬಿಸಿಸಿಐ ಅಧ್ಯಕ್ಷ ಜಗಮೋಹನ್ ದಾಲ್ಮಿಯಾ ಹೇಳಿದ್ದಾರೆ.

ರಾಜಸ್ತಾನ ರಾಯಲ್ಸ್ ತಂಡದ ಆಟಗಾರನನ್ನು ಬುಕ್ಕಿಗಳು ಸಂಪರ್ಕಿಸಿದ್ದ ವಿಚಾರಕ್ಕೆ ಸಂಬಂಧಿಸಿದಂತೆ ಸ್ಪಷ್ಟನೆ ನೀಡಿರುವ ಜಗಮೋಹನ್ ದಾಲ್ಮಿಯಾ, ಆಟಗಾರನನ್ನು ರಣಜಿ ಆಟಗಾರನೋರ್ವನ ಮೂಲಕ ಬುಕ್ಕಿಗಳು ಸಂಪರ್ಕಿಸಿರುವುದು ಬೆಳಕಿಗೆ ಬಂದಿದೆ. ಬಿಸಿಸಿಐ ಭ್ರಷ್ಟಾಚಾರ ನಿಗ್ರಹ ದಳ ಈ ಕುರಿತು ತನಿಖೆ ನಡೆಸುತ್ತಿದೆ ಎಂದು ಅವರು ಹೇಳಿದರು.

ಕೋಲ್ಕತಾದಲ್ಲಿ ಮಾತನಾಡಿದ ದಾಲ್ಮಿಯಾ ಅವರು, ಇದು ಒಳ್ಳೆಯ ಬೆಳವಣಿಗೆಯಾಗಿದ್ದು, ಬುಕ್ಕಿ ಆಟಗಾರನನ್ನು ಸಂಪರ್ಕಿಸುತ್ತಿದ್ದಂತೆಯೇ ಆತ ಸಂಬಂಧಪಟ್ಟ ಇಲಾಖೆಗೆ ಮಾಹಿತಿ ನೀಡಿದ್ದಾನೆ. ಐಪಿಎಲ್ ನಲ್ಲಿ ಫಿಕ್ಸಿಂಗ್ ಅನ್ನು ತಡೆಯಲು ನಾವು ಈ ಹಿಂದೆ ಸಾಕಷ್ಟು ಕ್ರಮಗಳನ್ನು ಕೈಗೊಂಡಿದ್ದೆವು. ಅದರ ಶ್ರಮದಿಂದಾಗಿ ಇಂದು ಆಟಗಾರರು ಬುಕ್ಕಿಗಳಿಂದ ದೂರವುಳಿಯುವಂತಾಗಿದೆ. ಇನ್ನು ಪ್ರಸಕ್ತ ಐಪಿಎಲ್ ಸರಣಿಗಾಗಿಯೂ ನಾವು ಸಾಕಷ್ಟು ಮುಂಜಾಗ್ರತಾ ಕ್ರಮಗಳನ್ನು ವಹಿಸಿದ್ದೇವೆ ಎಂದು ಹೇಳಿದರು. ಅಲ್ಲದೆ ಪ್ರಸಕ್ತ ಘಟನೆ ಕುರಿತಂತೆ ಹೆಚ್ಚಿನ ವಿವರ ನೀಡಲು ನಿರಾಕರಿಸಿದ ದಾಲ್ಮಿಯಾ, ಇದೊಂದು ಗಂಭೀರ ವಿಚಾರವಾಗಿದ್ದು, ವಿಚಾರಣೆಯ ಹಂತದಲ್ಲಿ ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡುವುದು ತಪ್ಪಾಗುತ್ತದೆ ಎಂದು ಪ್ರತಿಕ್ರಿಯಿಸಿದ್ದಾರೆ.

ಮುಂಬೈ ಮೂಲದ ರಾಜಸ್ತಾನ ತಂಡದ ಆಟಗಾರನೊಬ್ಬನನ್ನು ಬುಕ್ಕಿಗಳು ಸಂಪರ್ಕಿಸಿದ್ದು, ಫಿಕ್ಸಿಂಗ್ ಮಾಡುವಂತೆ ಪ್ರಚೋದಿಸಿದ್ದರು ಎಂದು ನಿನ್ನೆ ವರದಿಯಾಗಿತ್ತು. ಬಿಸಿಸಿಐನ ಕಾರ್ಯದರ್ಶಿ ಅನುರಾಗ್ ಠಾಕೂರ್ ಅವರೇ ಈ ವಿಚಾರವನ್ನು ಹೇಳಿದ್ದರು. ಪ್ರಸ್ತುತ ಮುಂಬೈ ರಾಜ್ಯದಿಂದ ರಾಜಸ್ತಾನ ರಾಯಲ್ಸ್ ತಂಡವನ್ನು 5 ಮಂದಿ ಪ್ರತಿನಿಧಿಸುತ್ತಿದ್ದು, ಅಜಿಂಕ್ಯಾ ರಹಾನೆ, ಪ್ರವೀಣ್ ತಾಂಬೆ, ದಿನೇಶ್ ಸಾಳುಂಕೆ, ಧವಳ್ ಕುಲಕರ್ಣಿ ಮತ್ತು ಅಭಿಶೇಕ್ ನಾಯರ್ ಅವರು ರಾಜಸ್ತಾನ ತಂಡದ ಪರವಾಗಿ ಆಡುತ್ತಿದ್ದು, ಈ ಐದು ಆಟಗಾರರ ಪೈಕಿ ಓರ್ವ ಆಟಗಾರನನ್ನು ಬುಕ್ಕಿಗಳು ಸಂಪರ್ಕಿಸಿದ್ದಾರೆ ಎಂದು ಹೇಳಲಾಗುತ್ತಿದೆ.