ಫೆಡರರ್ಗೆ ಸೋಲು

ಹಂಬರ್ಗ್: ಖ್ಯಾತ ಟೆನಿಸ್ ತಾರೆ ರೋಜರ್ ಫೆಡರರ್ ಜರ್ಮನಿ ಟೆನಿಸ್ ಚಾಂಪಿಯನ್ಷಿಪ್ನ ಸೆಮಿಫೈನಲ್ ಪಂದ್ಯದಲ್ಲಿ ಅರ್ಹತಾ ಸುತ್ತಿನ ಮೂಲಕ ಪ್ರವೇಶ ಪಡೆದಿದ್ದ ಅರ್ಜೆಂಟೀನಾದ ಫೆಡೆರಿಕೋ ಡೆಲ್ಬೋನಿಸ್ ವಿರುದ್ಧ 7-6 (7), 7-6 (4) ನೇರ ಸೆಟ್ಗಳ ಅಂತರದಿಂದ ಪರಾಭವ ಹೊಂದಿದರು.
ಹಂಬರ್ಗ್ನಲ್ಲಿ ನಾಲ್ಕು ಬಾರಿ ಚಾಂಪಿಯನ್ ಎನಿಸಿದ್ದ ಫೆಡರರ್ 114 ರ್ಯಾಂಕಿಂಗ್ ಹೊಂದಿರುವ ಆಟಗಾರನ ವಿರುದ್ಧ ಪರಾಭವ ಹೊಂದಿದರು. ಇದರೊಂದಿಗೆ ಅರ್ಜೆಂಟೀನಾದ ಫೆಡೆರಿಕೋ ಇದೇ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದರು.
'ಫೆಡೆರಿಕೋ ಉತ್ತಮ ಪ್ರದರ್ಶನ ತೋರಿದರು. ಪಂದ್ಯದಲ್ಲಿ ಕೊಂಚ ಆಕ್ರಮಣಕಾರಿ ಆಟ ಪ್ರದರ್ಶಿಸಿದ್ದು ಅವರಿಗೆ ಜಯ ಕಾಣಲು ಸಾಧ್ಯವಾಯಿತು' ಎಂದಿದ್ದಾರೆ ರೋಜರ್ ಫೆಡರರ್.
ವಿಂಬಲ್ಡನ್ ಟೆನಿಸ್ ಚಾಂಪಿಯನ್ಷಿಪ್ನ ದ್ವಿತೀಯ ಸುತ್ತಿನಲ್ಲಿ ಸೋಲನುಭವಿಸಿದ್ದ ಫೆಡರರ್ ಈ ಪಂದ್ಯಾವಳಿಯಲ್ಲಿ ವೈಲ್ಡ್ ಕಾರ್ಡ್ ಮೂಲಕ ಪ್ರವೇಶ ಗಿಟ್ಟಿಸಿದ್ದರು.
ಫೈನಲ್ ಪಂದ್ಯದಲ್ಲಿ ಫೆಡೆರಿಕೋ ಇಟಲಿಯ ಫ್ಯಾಬಿಯೋ ಫೋಗ್ನಿನಿ ಅವರನ್ನು ಎದುರಿಸಲಿದ್ದಾರೆ. ಫೋಗ್ನಿನಿ ಅವರು ಇನ್ನೊಂದು ಸೆಮಿಫೈನಲ್ ಪಂದ್ಯದಲ್ಲಿ ಸ್ಪೇನ್ನ ನಿಕೋಲಾಸ್ ಅಲ್ಮಗ್ರೋ ವಿರುದ್ಧ 6-4, 7-6 (1) ಸೆಟ್ಗಳಿಂದ ಜಯ ಕಂಡುಕೊಂಡಿದ್ದರು.