ನನಗೆ ಪೂರ್ವದ ದ್ವಾರ, ನನಗೆ ಬೇಕು ಉತ್ತರದ ಬಾಗಿಲು: 'ವಾಸ್ತು' ಕೊಠಡಿಗಾಗಿ ನೂತನ ಶಾಸಕರ ದುಂಬಾಲು!

ಬೆಂಗಳೂರು: ಶನಿವಾರ ಕಾಂಗ್ರೆಸ್ ನೇತೃತ್ವದ ನೂತನ ಸರ್ಕಾರ ರಚನೆಯಾಗುತ್ತಿದ್ದು, ವಿಧಾನಸೌಧ, ವಿಕಾಸಸೌಧ, ಶಾಸಕರ ಗೃಹ ಹಾಗೂ ಮಿನಿಸ್ಟರ್ಸ್ ಕ್ವಾರ್ಟರ್ಸ್‌ನಲ್ಲಿ ಉತ್ತಮ ಕೊಠಡಿಗಳನ್ನು ಪಡೆದುಕೊಳ್ಳಲು ಪೈಪೋಟಿ ಆರಂಭವಾಗಿದೆ.

ಉತ್ತರದ ಕಡೆಗೆ ಇರುವ ಹೈಕೋರ್ಟ್ ಮತ್ತು ಪೂರ್ವಕ್ಕೆ ರಾಜಭವನ ಎದುರಿಗಿರುವ ಕೊಠಡಿಗಳಿಗೆ ಬೇಡಿಕೆ ಹೆಚ್ಚಿದೆ.  ಶಾಸಕರ ಬೆಂಬಲಿಗರು ಕಳೆದ ಕೆಲವು ದಿನಗಳಿಂದ ಶಾಸಕರ ಭವನದ ಕೊಠಡಿಗಳಲ್ಲಿ ಉತ್ತಮವಾದವರನ್ನು ಹಿಡಿಯಲು ಕಸರತ್ತು ನಡೆಸುತ್ತಿದ್ದಾರೆ. ಶಾಸಕರ ಭವನದಲ್ಲಿ 224 ಶಾಸಕರು ಮತ್ತು 75 ಎಂಎಲ್‌ಸಿಗಳಿಗೆ ಸುಮಾರು 300 ಕೊಠಡಿಗಳಿವೆ.

'ಶನಿವಾರ ಹಿಂದಿನ ಸರಕಾರದಿಂದ ಸಂಪೂರ್ಣ ಹಸ್ತಾಂತರ ಆಗುವುದರಿಂದ ವಿಧಾನಸೌಧ ಮತ್ತು ವಿಕಾಸಸೌಧದ ಬಹುತೇಕ ಕಚೇರಿಗಳು, ಎಲ್‌ಎಚ್‌ನಲ್ಲಿ ಕೊಠಡಿಗಳು ಮತ್ತು ಸಚಿವರ ಕ್ವಾಟರ್ಸ್‌ಗಳು ಖಾಲಿಯಾಗಲಿವೆ. ಅದರ ನಂತರ ಕೆಲವನ್ನು ಹಸ್ತಾಂತರಿಸಲಾಗುವುದು ಎಂದು ವಿಧಾನಸೌಧದ ಮೂಲಗಳು ತಿಳಿಸಿವೆ.

ಇದನ್ನೂ ಓದಿ: ಕಾಂಗ್ರೆಸ್ ಕಟ್ಟಾಳುವಿನ ಚಾಣಾಕ್ಷ ನಡೆ: 'ಸಂಪದ್ಭರಿತ' ಖಾತೆ ನೀಡಲು ಒಪ್ಪಿದ ಕೈ ಪಡೆ; ಜಮೀರ್ ಸಂಪುಟ ಸೇರಲು ಡಿಕೆಶಿ ತಡೆ!

ಚುನಾವಣಾ ಫಲಿತಾಂಶ ಪ್ರಕಟವಾದ ನಂತರ ಅಂದರೆ ಮೇ 13 ರಿಂದ ಎಲ್ಲಾ ನಾಮಫಲಕಗಳನ್ನು ತೆಗೆದು ಕೀಗಳನ್ನು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆ (ಡಿಪಿಎಆರ್) ಮತ್ತು ಸಂಬಂಧಿಸಿದ ಸಚಿವಾಲಯದ ಅಧಿಕಾರಿಗಳಿಗೆ ಹಸ್ತಾಂತರಿಸಲಾಗಿದೆ.

ಈ ಎಲ್ಲ ಜಾಗಗಳಲ್ಲಿ ಅಧಿಕಾರಿಗಳು ದಾಸ್ತಾನು ಪರಿಶೀಲಿಸಿದ್ದು, ಹೊಸದಾಗಿ ಬಣ್ಣ ಹಚ್ಚಿದ ಬಳಿಕ ಕೊಠಡಿಗಳನ್ನು ಹೊಸ ಶಾಸಕರಿಗೆ ಹಸ್ತಾಂತರಿಸಲಾಗುವುದು ಎಂದು ಮತ್ತೊಂದು ಮೂಲಗಳು ತಿಳಿಸಿವೆ.

ಇದನ್ನೂ ಓದಿ: 'ಕುರಿ ಕಾಯೋನಿಗೆ ಹಣದ ಬಗ್ಗೆ ಏನ್ ಗೊತ್ತು ಎಂದು ಅವಮಾನಿಸಿದ್ರು, ಚಾಲೆಂಜ್ ಆಗಿ ತಗೊಂಡು 13 ಬಾರಿ ಬಜೆಟ್ ಮಂಡಿಸಿದೆ': ಸಿದ್ದರಾಮಯ್ಯ ಮನದ ಮಾತು

ಮೂರು ಪಕ್ಷಗಳ ಬಹುತೇಕ ಶಾಸಕರು ತಮ್ಮ ಅಸೆಂಬ್ಲಿ ಸ್ಥಾನಗಳನ್ನು ಉಳಿಸಿಕೊಂಡಿದ್ದು, ಶಾಸಕರ ಭವನದ ತಮ್ಮ ಹಿಂದಿನ ಕೊಠಡಿಗಳನ್ನು ಇಟ್ಟುಕೊಂಡಿದ್ದಾರೆ. ಹೊಸ ವಿಧಾನಸಭೆಯ ಮೊದಲ ಅಧಿವೇಶನವನ್ನು ಮೇ 23 ಅಥವಾ 24 ರಂದು ಕರೆಯುವ ಸಾಧ್ಯತೆಯಿದೆ, ಅದಕ್ಕೂ ಮೊದಲು ಕೊಠಡಿ ಹಂಚಿಕೆ  ಕಾರ್ಯ ಪೂರ್ಣಗೊಳ್ಳಲಿದೆ ಎಂದು ಮೂಲಗಳು ತಿಳಿಸಿವೆ.