ನಾವು ಹೆಚ್ಚಿನ ಸಂಬಳ ಪಡೆಯುತ್ತಿದ್ದೇವಾ? ಸ್ಪೀಕರ್ ಹಾಗೂ ಸಿಎಂ ಗೆ ಶಾಸಕರ ಪತ್ರ

ಬೆಂಗಳೂರು: ದೆಹಲಿ ಹಾಗೂ ತೆಲಂಗಾಣ ರಾಜ್ಯದ ಶಾಸಕರಂತೆ ನಮಗೂ ವೇತನ ಹೆಚ್ಚಿಸಿ ಎಂದು ರಾಜ್ಯ ಶಾಸಕರು ಸಿಎಂ ಸಿದ್ದರಾಮಯ್ಯ ಮತ್ತು ಸ್ಪೀಕರ್ ಕೆ.ಬಿ ಕೋಳಿವಾಡ ಅವರಿಗೆ ಪತ್ರ ಬರೆದಿದ್ದಾರೆ.

ಈಗಾಗಲೇ ಶಾಸಕರು ಹೆಚ್ಚಿನ ವೇತನ ಪಡೆಯುತ್ತಿದ್ದಾರೆ ಎಂದು ಸಾರ್ವಜನಿಕರ ಅಭಿಪ್ರಾಯವಾಗಿದೆ. ಹೀಗಾಗಿ ತಾವು ಹೆಚ್ಚು ವೇತನ ಪಡೆಯತ್ತಿಲ್ಲ ಎಂಬುದನ್ನು ರಾಜ್ಯದ ನಾಗರಿಕರಿಗೆ ತಿಳಿಸುವ ಸಲುವಾಗಿ ಶಾಸಕರ ಒಂದು ಗುಂಪು ಪತ್ರ ಬರೆದಿದೆ.

ದೆಹಲಿ ಹಾಗೂ ತೆಲಂಗಾಣ ಸರ್ಕಾರಗಳು ಇತ್ತೀಚೆಗೆ ತಮ್ಮ ಶಾಸಕರ ವೇತನ ಹೆಚ್ಚಿಸಿದ್ದು, ಕರ್ನಾಟಕ ರಾಜ್ಯದ ಶಾಸಕರ ದುಃಖಕ್ಕೆ ಕಾರಣವಾಗಿದೆ. ದೇಶದ ಎಲ್ಲಾ ರಾಜ್ಯಗಳ ಶಾಸಕರುಗಳಿಗಿಂತ ಕರ್ನಾಟಕ ಶಾಸಕರು ಹೆಚ್ಚಿನ ವೇತನ ಪಡೆಯುತ್ತಿದ್ದ ಕಾಲವಿತ್ತು.

15 ಜನರ ಶಾಸಕರ ಗುಂಪೊಂದು ಪತ್ರ ಬರೆದಿದ್ದು ಜೊತೆಗೆ ತೆಲಂಗಾಣ ಹಾಗೂ ದೆಹಲಿ ಶಾಸಕರ ವೇತನ ಪಟ್ಟಿಯನ್ನು ಕೂಡ ಲಗತ್ತಿಸಿ ಸಿಎಂ ಹಾಗೂ ಸ್ಪೀಕರ್ ಗೆ ರವಾನಿಸಿದೆ. ಇತ್ತೀಚೆಗೆ ನಡೆದ ಮುಂಗಾರು ಅಧಿವೇಶದಲ್ಲಿ ಡಿವೈಎಸ್ಪಿ ಗಣಪತಿ ಆತ್ಮಹತ್ಯೆ ಪ್ರಕರಣವನ್ನು ಟಾರ್ಗೆಟ್ ಮಾಡಿಕೊಂಡ ವಿರೋಧ ಪಕ್ಷದ ಶಾಸಕರು ಒಂದು ದಿನವೂ ಅಧಿವೇಶನ ಸರಾಗವಾಗಿ ನಡೆಯಲು ಬಿಡಲಿಲ್ಲ,

ಕೆ.ಜೆ ಜಾರ್ಜ್ ಅವರ ರಾಜೀನಾಮೆಗೆ ಒತ್ತಾಯಿಸಿ ಸದನವನ್ನು ಮುಂದೂಡವಂತೆ ಮಾಡಿದ್ದವು. ಈಗ ತಮ್ಮ ವೇತನ ಹೆಚ್ಚಿಸುವಂತೆ ಮಾಡಿರುವ ಪ್ರಸ್ತಾಪದಿಂದ ಶಾಸಕರು ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗುವುದರಲ್ಲಿ ಸಂಶಯವಿಲ್ಲ.

ಹೀಗಾಗಲೇ ರಾಜ್ಯದ ಶಾಸಕರು ಹೆಚ್ಚಿನ ವೇತನ ಪಡೆಯುತ್ತಿದ್ದಾರೆ ಎಂದು ಸಾರ್ವಜನಿಕರಲ್ಲಿ ತಪ್ಪು ಗ್ರಹಿಕೆ ಮೂಡಿದೆ. ಹಾಗಾಗಿ ಈ ತಪ್ಪು ಗ್ರಹಿಕೆಯನ್ನು ಹೋಗಲಾಡಿಸಲು ತಾವು ಸ್ಪೀಕರ್ ಗೆ ವೇತನ ಹೆಚ್ಚಿಸುವಂತೆ ಪತ್ರ ಬರೆದಿರುವುದಾಗಿ ಜೆಡಿಎಸ್ ಶಾಸಕ ಬಿಬಿ ನಿಂಗಯ್ಯ ತಿಳಿಸಿದ್ದಾರೆ. ಬೇರೆ ರಾಜ್ಯಗಳ ಶಾಸಕರ ವೇತನದ ಜೊತೆಗೆ ನಾವು ಪಡೆಯುತ್ತಿರುವ ಸಂಬಳವನ್ು ಹೋಲಿಕೆ ಮಾಡಿ. ಪ್ರಕಟಿಸಿದರೇ ನಾಗರಿಕರಿಗೆ ನಾವು ಹೆಚ್ಚಿನ ವೇತನ ಪಡೆಯುತ್ತಿದ್ದೇವೆ ಎಂಬ ತಪ್ಪು ಪರಿ ಕಲ್ಪನೆ ಹೋಗುತ್ತದೆ ಎಂದು ಅವರು ಹೇಳಿದ್ದಾರೆ.

ತೆಲಂಗಾಣ ಶಾಸಕರು ಪ್ರಸಕ್ತವಾಗಿ 2.5 ಲಕ್ಷ ವೇತನ ಪಡೆಯುತ್ತಿದ್ದಾರೆ. ಮೂಲ ವೇತನ 20 ಸಾವಿರ, ಕ್ಷೇತ್ರ ಭತ್ಯೆ 2.3 ಲಕ್ಷ ಸೇರಿ ಒಟ್ಟು 2.5 ಲಕ್ಷ ಪಡೆಯುತ್ತಿದ್ದಾರೆ. ಇನ್ನು ದೆಹಲಿ ಶಾಸಕರು 2.10 ಲಕ್ಷ ವೇತನ ಪಡೆಯುತ್ತಿದ್ದಾರೆ.