ನಡೆಯದ ಕೃಷ್ಣ ಸೋನಿಯಾ ಭೇಟಿ

ನವದೆಹಲಿ: ಕರ್ನಾಟಕದ ಆಡಳಿತಾರೂಢ ಕಾಂಗ್ರೆಸ್‍ನಲ್ಲಿ ಭಾರಿ ಬದಲಾವಣೆ ತರಲಿದೆ ಎಂದೇ ಭಾವಿಸಲಾಗಿದ್ದ ಮಾಜಿ ವಿದೇಶಾಂಗ ಸಚಿವ ಎಸ್. ಎಂ. ಕಷ್ಣ ಅವರ ದೆಹಲಿ ಭೇಟಿಯ ಮೊದಲ  ದಿನ ಯಾವ ಅಚ್ಚರಿಯೂ ನಡೆಯಲಿಲ್ಲ.

ಮಧ್ಯಾಹ್ನದ ವೇಳೆ ದೆಹಲಿಗೆ ಆಗಮಿಸಿದ ಎಸ್.ಎಂ.ಕೃಷ್ಣ ಅವರು ಖಾಸಗಿ ಹೋಟೆಲ್‍ಗೆ ತೆರಳಿದರು. ತಡರಾತ್ರಿವರೆಗೂ ಅವರು ಎಐಸಿಸಿ ಅಧ್ಯಕ್ಷೆ ಸೋನಿಯಾಗಾಂಧಿ ಅವರನ್ನಾಗಲೀ, ಉಪಾಧ್ಯಕ್ಷ ರಾಹುಲ್‍ಗಾಂಧಿ ಅವರನ್ನಾಗಲೀ, ಕರ್ನಾಟಕ ಉಸ್ತುವಾರಿ ದಿಗ್ವಿಜಯ್  ಸಿಂಗ್ ಅವರನ್ನಾಗಲೀ ಭೇಟಿ ಮಾಡಲಿಲ್ಲ. ಶುಕ್ರವಾರ ಅವರು ದಿಗ್ವಿಜಯ್  ಸಿಂಗ್ ಅವರನ್ನು ಭೇಟಿ ಮಾಡುವ  ನಿರೀಕ್ಷೆ ಇದೆ. ಆದರೆ, ಸೋನಿಯಾಗಾಂಧಿ ಮತ್ತು ರಾಹುಲ್‍ಗಾಂಧಿ ಅವರನ್ನು ಯಾವಾಗ ಭೇಟಿ ಮಾಡುತ್ತಾರೆಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಭೇಟಿಗೆ ಮಹತ್ವ: ಸೆ.24 ರಂದು ಸೋನಿಯಾ ಅವರನ್ನು ಭೇಟಿ ಮಾಡಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು, ಬಿಬಿಎಂಪಿ ಚುನಾವಣೆಗಳ ವಿದ್ಯಮಾನಗಳ ಬಗ್ಗೆ ವಿವರಿಸಿದ್ದರು.

ಪತ್ರಕರ್ತರಿಗೆ ಅಚ್ಚರಿ: ಜನಪಥ ರಸ್ತೆಯಲ್ಲಿರುವ ಸೋನಿಯಾ ಗಾಂಧಿ ನಿವಾಸಕ್ಕೆ ತೆರಳಿ ಮಾಜಿ ವಿದೇಶಾಂಗ ಸಚಿವ ಎಸ್. ಎಂ.ಕೃಷ್ಣ ಅವರಿಗಾಗಿ ಕಾಯುತ್ತಿದ್ದ ಪತ್ರಕರ್ತರಿಗೆ ಅಚ್ಚರಿಯೋ  ಅಚ್ಚರಿ! ಏಕೆಂದರೆ, ಸೋನಿಯಾಗಾಂಧಿ ಅವರ ನಿವಾಸದಿಂದ ಹೊರ ಬಂದಿದ್ದು ಕೃಷ್ಣ ಅಲ್ಲ, ಚಿತ್ರನಟಿ, ಮಾಜಿ ಸಂಸದೆ ರಮ್ಯಾ!! ಎಸ್.ಎಂ. ಕಷ್ಣ ಅವರು ದೆಹಲಿಗೆ ಬರುವ ಮುನ್ನವೇ ರಾಜಧಾನಿಗೆ ಆಗಮಿಸಿದ್ದ ರಮ್ಯಾ ಸೀದಾ ಸೋನಿಯಾಗಾಂಧಿ ಅವರನ್ನು ಭೇಟಿ ಮಾಡಿದ್ದಾರೆ. ಸುಮಾರು 10 ನಿಮಿಷಗಳ ಕಾಲ ಚರ್ಚಿಸಿದ್ದಾರೆ. ಚರ್ಚೆ ವೇಳೆ ಮಂಡ್ಯದಲ್ಲಿ ರಾಹುಲ್ ಭೇಟಿ ಮತ್ತು ನಂತರದ ವಿದ್ಯಮಾನಗಳನ್ನು ವಿವರಿಸಿದ್ದಾರೆ ಎನ್ನಲಾಗಿದೆ. ಭೇಟಿ ಬಗ್ಗೆ ಮಾಧ್ಯಮಗಳ ಜತೆ ಮಾತನಾಡಲು ನಿರಾಕರಿಸಿದ್ದಾರೆ. ನಂತರ  ಎಸ್.ಎಂ. ಕೃಷ್ಣ ಅವರನ್ನು ಭೇಟಿ ಮಾಡಿದ್ದಾರೆ.