ಬೆಟ್ಟಿಂಗ್ ತಡೆ ಕಾನೂನು ಬಲಪಡಿಸಲು ನಿರ್ಧಾರ

ವಿಧಾನಸಭೆ: ಕ್ರಿಕೆಟ್ ಬೆಟ್ಟಿಂಗ್ ಪ್ರಕರಣಗಳ ವ್ಯಾಪ್ತಿ  ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಕರ್ನಾಟಕ ಪೊಲೀಸ್ ಕಾಯ್ದೆಯ ಜೂಜು ನಿಯಂತ್ರಣ ವಿಧಿಯನ್ನು ಬಲಪಡಿಸಲು ರಾಜ್ಯ ಸರ್ಕಾರ ನಿರ್ಧರಿಸಿದೆ. ರಾಜ್ಯದಲ್ಲಿ ನಡೆಯುತ್ತಿರುವ ಬೆಟ್ಟಿಂಗ್ ದಂಧೆ ಬಗ್ಗೆ  ಪ್ರತಿಪಕ್ಷ ನಾಯಕ ಜಗದೀಶ್ ಶೆಟ್ಟರ್ ಅವರು ನಿಯಮ 69ರ ಅನ್ವಯ ನಡೆಸಿದ ಚರ್ಚೆಗೆ ಉತ್ತರ ನೀಡಿದ ಗೃಹ ಸಚಿವ ಕೆ.ಜೆ. ಜಾರ್ಜ್ ವಿಧಾನಸಭೆಯಲ್ಲಿ ಶುಕ್ರವಾರ ಈ ವಿಷಯ ತಿಳಿಸಿದರು.

ಅಗತ್ಯ ಬಿದ್ದರೆ ಬೆಟ್ಟಿಂಗ್ ದಂಧೆಯನ್ನು ಸಿಬಿಐ  ತನಿಖೆಗೆ ವಹಿಸಲು ಸಿದ್ಧ ಎಂದು ಸರ್ಕಾರ ಈ ಹಿಂದೆಯೇ ಸ್ಪಷ್ಟಪಡಿಸಿದೆ. ಇದು ಅಂತಾರಾಷ್ಟ್ರೀಯ ದಂಧೆ. ರಾಜ್ಯದಲ್ಲಿ ಈ ವ್ಯವಹಾರಕ್ಕೆ ಸಂಬಂಧಿಸಿದ ಬುಕ್ಕಿಗಳನ್ನು ನಾವು  ಹಲವೆಡೆ ಬಂಧಿಸಿದ್ದೇವೆ. ಆದರೆ, ಇದರ ನಿಯಂತ್ರಣಕ್ಕೆ ಕರ್ನಾಟಕ ಪೊಲೀಸ್ ಕಾಯ್ದೆಯ ಉಪವಿಧಿಗಳು ಪ್ರಬಲವಾಗಿಲ್ಲ.

ದಂಧೆಕೋರರಿಗೆ 6 ತಿಂಗಳು ಮಾತ್ರ ಸಜೆ ವಿಧಿಸುವ ಅವಕಾಶವಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಸರ್ಕಾರ ಅಗತ್ಯ ತಿದ್ದುಪಡಿ ತರುತ್ತದೆ ಎಂದು ಹೇಳಿದರು.