ಬಿಎಸ್‌ಪಿಯಲ್ಲಿ ಮಹತ್ವದ ಬದಲಾವಣೆ: ಸೋದರಳಿಯ ಇಶಾನ್ ಆನಂದ್ ಗೆ ಪ್ರಮುಖ ಜವಾಬ್ದಾರಿ ನೀಡಿದ ಮಾಯಾವತಿ!

ಲಖನೌ: ಬಿಎಸ್‌ಪಿಯಲ್ಲಿ ಮಹತ್ವದ ಬದಲಾವಣೆ ಮಾಡಲಾಗಿದೆ. ಇಂದು ನಡೆದ ರಾಷ್ಟ್ರೀಯ ಕಾರ್ಯಕಾರಿಣಿ ಸಭೆಯಲ್ಲಿ ತಮ್ಮ ಸೋದರಳಿಯ ಇಶಾನ್ ಆನಂದ್ ಅವರನ್ನು ಪಕ್ಷದ ರಾಷ್ಟ್ರೀಯ ಸಂಯೋಜಕರನ್ನಾಗಿ ನೇಮಕ ಮಾಡಿದರು.

ಮುಂಬರುವ ವಿಧಾನಸಭಾ ಚುನಾವಣೆಗಾಗಿ ಬಿಎಸ್‌ಪಿ ಸಿದ್ಧತೆಗಳನ್ನು ಚುರುಕುಗೊಳಿಸುತ್ತಿರುವ ಸಂದರ್ಭದಲ್ಲೇ ಈ ಬೆಳವಣಿಗೆ ನಡೆದಿದೆ.

ತಳಮಟ್ಟದಲ್ಲಿ ಪಕ್ಷ ಸಂಘಟನೆಯನ್ನು ಬಲಪಡಿಸುವಂತೆ ಮತ್ತು ಸರ್ಕಾರ ರಚನೆಯತ್ತ ಗಮನಹರಿಸುವಂತೆ ಮಾಯಾವತಿ ಪದಾಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ. ಈ ನೇಮಕದೊಂದಿಗೆ ಇಶಾನ್ ಆನಂದ್ ಅವರು ಪ್ರಮುಖ ಸಾಂಸ್ಥಿಕ ಹುದ್ದೆಯನ್ನು ಅಲಂಕರಿಸಿದಂತಾಗಿದೆ. ಈ ಹಿಂದೆ ಈ ಹುದ್ದೆಯನ್ನು ಅವರ ಹಿರಿಯ ಸಹೋದರ ಆಕಾಶ್ ಆನಂದ್ ನಿರ್ವಹಿಸುತ್ತಿದ್ದರು.

ಸಭೆಯಲ್ಲಿ ಆಕಾಶ್ ಆನಂದ್ ಹೊಂದಿದ್ದ ರಾಷ್ಟ್ರೀಯ ಸಂಯೋಜಕ ಹುದ್ದೆಯನ್ನು ಇಶಾನ್ ಆನಂದ್ ಅವರಿಗೆ ಮಾಯಾವತಿ ನೀಡಿದರು. ರಾಷ್ಟ್ರೀಯ ಮಟ್ಟದಲ್ಲಿ ಪ್ರಮುಖ ಜವಾಬ್ದಾರಿಯನ್ನು ವಹಿಸಿಕೊಂಡಿರುವ ಇಶಾನ್ ಅವರನ್ನು, ಪಕ್ಷದ ಕಾರ್ಯಕರ್ತರು ಈಗ ಬಿಎಸ್‌ಪಿಯ ಉದಯೋನ್ಮುಖ ಯುವ ಮುಖವಾಗಿ ನೋಡುತ್ತಿದ್ದಾರೆ.

ಮುಂದಿನ ವಿಧಾನಸಭಾ ಚುನಾವಣೆಗೆ ಸಿದ್ಧತೆ ನಡೆಸುತ್ತಿರುವ ಪಕ್ಷಕ್ಕೆ ಈ ನೇಮಕ ಮಹತ್ವದ್ದಾಗಿದೆ. ಹೆಚ್ಚಿನ ಸಾಂಸ್ಥಿಕ ಜವಾಬ್ದಾರಿಯೊಂದಿಗೆ, ಚುನಾವಣಾ ರಂಗದಲ್ಲಿ ಬಿಎಸ್‌ಪಿಯ ಅಸ್ತಿತ್ವವನ್ನು ವಿಸ್ತರಿಸಲು ಮತ್ತು ತಳಮಟ್ಟದಲ್ಲಿ ಪಕ್ಷದ ಬೆಂಬಲದ ನೆಲೆ (support base)ಯನ್ನು ಬಲಪಡಿಸಲು ಇಶಾನ್ ಅವರು ನೆರವಾಗಬೇಕಿದೆ.

ಸಭೆಗೂ ಮುನ್ನ, ಇಶಾನ್ ಆನಂದ್ ಅವರು ಮಾಯಾವತಿ ಅವರ ಪಾದಗಳನ್ನು ಸ್ಪರ್ಶಿಸಿ ಆಶೀರ್ವಾದ ಪಡೆಯುತ್ತಿರುವುದು ಕಂಡುಬಂದಿತು. ಮಾಯಾವತಿ ಅವರು ಅವರ ಬೆನ್ನಿನ ಮೇಲೆ ಕೈಯಿಟ್ಟು ಆಶೀರ್ವದಿಸಿದರು. ಮಾಯಾವತಿ ಅವರ ಕುಟುಂಬದೊಳಗೆ ಭಿನ್ನಾಭಿಪ್ರಾಯಗಳಿವೆ ಎಂಬ ವರದಿಗಳ ನಡುವೆಯೇ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದು ಗಮನಾರ್ಹವಾಗಿತ್ತು.

ಜೌನ್‌ಪುರದ ಮುಂಗ್ರಾ ಬಾದ್‌ಶಾಹಪುರ ವಿಧಾನಸಭಾ ಕ್ಷೇತ್ರದ ಬಿಎಸ್‌ಪಿ (BSP) ಅಭ್ಯರ್ಥಿ ವಿನೋದ್ ಮಿಶ್ರಾ ಅವರು, ಮಾಯಾವತಿ ಅವರನ್ನು ಮತ್ತೆ ಅಧಿಕಾರಕ್ಕೆ ತರುವ ಪಕ್ಷದ ಪ್ರಯತ್ನಗಳಿಗೆ ಬ್ರಾಹ್ಮಣ ಸಮುದಾಯವು ಬೆಂಬಲ ನೀಡಲಿದೆ ಎಂದು ಹೇಳಿದರು.

ಸರ್ಕಾರದ ವೈಫಲ್ಯಗಳೆಂದು ಆರೋಪಿಸಲಾದ ವಿಷಯಗಳನ್ನು ಜನರ ಮುಂದಿರಿಸುವಂತೆ ಹಾಗೂ ಬಿಎಸ್‌ಪಿಯ ಸ್ಥಾನಗಳ ಸಂಖ್ಯೆಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಶ್ರಮಿಸುವಂತೆ ಪಕ್ಷದ ಕಾರ್ಯಕರ್ತರಿಗೆ ಸೂಚನೆ ನೀಡಲಾಗಿದೆ ಎಂದು ಮಿಶ್ರಾ ತಿಳಿಸಿದರು.