ಹಿಂದೂಗಳು ಕಬೀರ್ ದಾಸ್ ಅವರನ್ನು ಗೌರವಿಸುತ್ತಾರೆ, ಆದರೆ ಮುಸ್ಲಿಮರು..: Yogi Adityanath ಹೇಳಿಕೆ ಚರ್ಚೆಗೆ ಗ್ರಾಸ

ಲಖನೌ: ಹಿಂದೂಗಳು ಸಂತ ಕಬೀರ್ ದಾಸ್ ಅವರನ್ನು ಗೌರವಿಸುತ್ತಾರೆ ಮುಸ್ಲಿಮರು ಅವರನ್ನು ಗೌರವಿಸುವುದಿಲ್ಲ ಎಂದು ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಹೇಳಿದ್ದಾರೆ.

ಕಬೀರ್ ದಾಸ್ ಅವರ ಬೋಧನೆಗಳು ಧಾರ್ಮಿಕ ವಿಭಜನೆಗಳನ್ನು ಮೀರಿವೆ ಎಂದು ಯೋಗಿ ಆದಿತ್ಯನಾಥ್ ಪ್ರತಿಪಾದಿಸಿದರು.

684 ಕೋಟಿ ರೂ.ಗಳಿಗಿಂತ ಹೆಚ್ಚು ಮೌಲ್ಯದ 201 ಅಭಿವೃದ್ಧಿ ಯೋಜನೆಗಳನ್ನು ಉದ್ಘಾಟಿಸಿ ಮಾತನಾಡಿದ ಆದಿತ್ಯನಾಥ್ "ಸಂತ ಕಬೀರ್ ನಿರ್ಗುಣ ಸಂಪ್ರದಾಯದವರು. ಅವರು ಇಸ್ಲಾಮಿಕ್ ಮೂಲಭೂತವಾದದ ವಿರುದ್ಧ ಮಾಡಿದಂತೆಯೇ ಹಿಂದೂ ಸಂಪ್ರದಾಯದ ವಿರುದ್ಧವೂ ಮಾತನಾಡಿದರು. ಆದರೆ ಹಿಂದೂಗಳು ಅವರನ್ನು ಪೂಜಿಸಿದರು, ಆದರೆ ಮುಸ್ಲಿಮರು ಅವರನ್ನು ಮುಟ್ಟಲೂ ಇಲ್ಲ. ಇದು ವ್ಯತ್ಯಾಸ" ಎಂದು ಮುಖ್ಯಮಂತ್ರಿ ತಮ್ಮ ಭಾಷಣದಲ್ಲಿ ಹೇಳಿದರು. ಸಂತ ಕಬೀರ್ ದಾಸ್ ಬೂಟಾಟಿಕೆ ಮತ್ತು ಜಾತಿ ವಿಭಜನೆಗಳನ್ನು ದ್ವೇಷಿಸುತ್ತಿದ್ದರು ಎಂದು ಯೋಗಿ ಆದಿತ್ಯನಾಥ್ ಹೇಳಿದ್ದಾರೆ.

"ಸಂತ ಕಬೀರ್ ದಾಸ್ ಜಿ ಬೂಟಾಟಿಕೆ ವಿರುದ್ಧ ಹೋರಾಟವನ್ನು ಪ್ರಾರಂಭಿಸಿ ಇಲ್ಲಿಗೆ ಬಂದರು. ಮಘರ್‌ನಲ್ಲಿ ಸಾಯುವುದು ಒಬ್ಬ ವ್ಯಕ್ತಿಯನ್ನು ನರಕಕ್ಕೆ ಕರೆದೊಯ್ಯುತ್ತದೆ ಎಂದು ಜನರು ನಂಬಿದ್ದರು, ಆದರೆ ಮರಣದ ನಂತರ ಅವನು ಸ್ವರ್ಗವನ್ನು ಪಡೆಯುತ್ತಾನೋ ಅಥವಾ ನರಕವನ್ನು ಪಡೆಯುತ್ತಾನೋ ಅದು ಅವನ ಕಾರ್ಯಗಳನ್ನು ಅವಲಂಬಿಸಿರುತ್ತದೆ ಎಂದು ಕಬೀರ್ ದಾಸ್ ಹೇಳಿದ್ದನ್ನು ಯೋಗಿ ಆದಿತ್ಯನಾಥ್ ಉಲ್ಲೇಖಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿಯವರ ಮಾರ್ಗದರ್ಶನದಲ್ಲಿ ಬಿಜೆಪಿ ಸರ್ಕಾರಗಳು ಕಬೀರ್ ದಾಸ್ ಅವರ ಪರಂಪರೆಯನ್ನು ಸಂರಕ್ಷಿಸಲು ಮತ್ತು ಅವರ ಕುರಿತು ಸಂಶೋಧನೆಯನ್ನು ಉತ್ತೇಜಿಸಲು ಕಬೀರ್ ಅಕಾಡೆಮಿಯನ್ನು ನಿರ್ಮಿಸಿವೆ ಎಂದು ಆದಿತ್ಯನಾಥ್ ಹೇಳಿದರು.

"ಇಂದು, ಸಂತ ಕಬೀರ್ ದಾಸ್ ಜಿ ಅವರ ಹೆಸರಿನಲ್ಲಿ ಒಂದು ಅಕಾಡೆಮಿಯನ್ನು ನಿರ್ಮಿಸಲಾಗುತ್ತಿದೆ, ಒಂದು ಸಭಾಂಗಣವೂ ಇದೆ ಮತ್ತು ಅದೇ ಸಮಯದಲ್ಲಿ, ಬಾಬಾ ತಮೇಶ್ವರನಾಥ ಧಾಮಕ್ಕೆ ಕಾರಿಡಾರ್ ನಿರ್ಮಾಣಕ್ಕೂ ನಾವು ಕೆಲಸ ಮಾಡುತ್ತಿದ್ದೇವೆ" ಎಂದು ಅವರು ಹೇಳಿದರು.

ಕಾಂಗ್ರೆಸ್ ಮತ್ತು ಸಮಾಜವಾದಿ ಪಕ್ಷದ ಸರ್ಕಾರಗಳ "ಭ್ರಷ್ಟ" ವಿಧಾನಗಳಿಂದಾಗಿ ಜಿಲ್ಲೆಯಲ್ಲಿ ಒಂದು ನೂಲುವ ಗಿರಣಿ (Spinning Mill) ಮುಚ್ಚಲ್ಪಟ್ಟಿದೆ ಆದರೆ ಈಗ ಅದನ್ನು ಪುನರಾರಂಭಿಸಲು ಯೋಜನೆಗಳು ನಡೆಯುತ್ತಿವೆ ಎಂದು ಮುಖ್ಯಮಂತ್ರಿಗಳು ಹೇಳಿದರು,

ಎನ್ಸೆಫಾಲಿಟಿಸ್ ಸಾವುಗಳ ಬಗ್ಗೆಯೂ ಅವರು ಎರಡೂ ಪಕ್ಷಗಳ ಮೇಲೆ ದಾಳಿ ಮಾಡಿ, ಅಧಿಕಾರದಲ್ಲಿದ್ದಾಗ ಅದರ ಹರಡುವಿಕೆಯನ್ನು ತಡೆಯಲು ಅವರು ಏನೂ ಮಾಡಲಿಲ್ಲ ಎಂದು ಹೇಳಿದರು.

"ಈ ಪ್ರದೇಶ ಎನ್ಸೆಫಾಲಿಟಿಸ್‌ನಿಂದ ಭಯಭೀತರಾಗಿದ್ದರು. ಜನರು ಮೆದುಳು ಜ್ವರದಿಂದ ಬಳಲುತ್ತಿದ್ದರು, ಆದರೆ ಕಾಂಗ್ರೆಸ್ ಮತ್ತು ಸಮಾಜವಾದಿ ಪಕ್ಷಗಳು ಅದರ ಬಗ್ಗೆ ಏನನ್ನೂ ಮಾಡಲಿಲ್ಲ. ಬಿಜೆಪಿ ನೇತೃತ್ವದ ಎನ್‌ಡಿಎ ಸರ್ಕಾರ ಅಧಿಕಾರಕ್ಕೆ ಬಂದ ನಂತರ, ನಾವು ಎನ್ಸೆಫಾಲಿಟಿಸ್ ನ್ನು ನಿರ್ಮೂಲನೆ ಮಾಡಿದ್ದೇವೆ ಎಂದು ಆದಿತ್ಯನಾಥ್ ಹೇಳಿದರು.

ಹಬ್ಬಗಳ ಸಮಯದಲ್ಲಿ ಇನ್ನು ಮುಂದೆ ಭಯವಿಲ್ಲ ಎಂದು ಅವರು ಹೇಳಿದರು ಮತ್ತು ಮಹಿಳೆಯನ್ನು ಕಿರುಕುಳ ನೀಡುವ ಅಥವಾ ವ್ಯಾಪಾರಿಯನ್ನು ಲೂಟಿ ಮಾಡುವ ಯಾರಾದರೂ ಜೈಲಿಗೆ ಹೋಗುತ್ತಾರೆ ಅಥವಾ "ನರಕಕ್ಕೆ ಪ್ರಯಾಣ" ಎದುರಿಸಬೇಕಾಗುತ್ತದೆ ಎಂದು ಅವರು ಪ್ರತಿಪಾದಿಸಿದರು. ನಿಧಿ ಹಂಚಿಕೆಗೆ ಬಂದಾಗ ಹಿಂದಿನ ಸರ್ಕಾರಗಳು ತಪ್ಪಾದ ಆದ್ಯತೆಗಳನ್ನು ಹೊಂದಿದ್ದವು ಎಂದು ಯೋಗಿ ಆದಿತ್ಯನಾಥ್ ಹೇಳಿದ್ದಾರೆ.