'ನನಗೆ ನರೇಂದ್ರ ಅನ್ನೋ ಹೆಸರು ಇಷ್ಟ ಆಗಲ್ಲ': ಮೋದಿ ಭೇಟಿ ವೇಳೆ ಪಾಕ್ ಎದುರಾಳಿಯ ಕಥೆ ಹಂಚಿಕೊಂಡ ಭಾರತೀಯ ಬಾಕ್ಸರ್; ಪ್ರಧಾನಿ ಪ್ರತಿಕ್ರಿಯೆ ಏನು?

ಕಾಮನ್ವೆಲ್ತ್ ಕ್ರೀಡಾಕೂಟದಲ್ಲಿ ಪದಕ ಗೆದ್ದ ನಂತರ ಪ್ರಧಾನಿ ಮೋದಿ ಅವರು ಭಾಗಿಯಾಗಿದ್ದ ಸನ್ಮಾನ ಸಮಾರಂಭದಲ್ಲಿ ಭಾರತೀಯ ಬಾಕ್ಸರ್ ನರೇಂದರ್ ಬೆರ್ವಾಲ್ 2015 ರ ವಿಶ್ವ ಮಿಲಿಟರಿ ಕ್ರೀಡಾಕೂಟದ ಕಥೆಯೊಂದನ್ನು ಹಂಚಿಕೊಂಡಿರುವುದು ಈಗ ಎಲ್ಲೆಡೆ ವೈರಲ್ ಆಗತೊಡಗಿದೆ.

ಕ್ರೀಡಾ ವೇದಿಕೆಗಳು ಕೇವಲ ಕಠಿಣ ಸ್ಪರ್ಧೆಗಳನ್ನು ಸೃಷ್ಟಿಸುವುದಿಲ್ಲ; ಅವು ದಶಕಗಳ ಕಾಲ ನೆನಪಿಸಿಕೊಳ್ಳುವಂತಹ ಮೈದಾನದ ಹೊರಗಿನ ಕಥೆಗಳನ್ನು ಸಹ ಸೃಷ್ಟಿಸುತ್ತವೆ. ಕಾಮನ್ವೆಲ್ತ್ ಕ್ರೀಡಾಕೂಟದಿಂದ ಬೆಳ್ಳಿ ಪದಕದೊಂದಿಗೆ ಹಿಂದಿರುಗಿದ ಭಾರತೀಯ ಬಾಕ್ಸರ್ ನರೇಂದರ್ ಬೆರ್ವಾಲ್ ಅಂತಹ ಒಂದು ಕಥೆಯನ್ನು ಹಂಚಿಕೊಂಡಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿಯವರ ನಿವಾಸದಲ್ಲಿ ನಡೆದ ಸನ್ಮಾನ ಸಮಾರಂಭದಲ್ಲಿ ಮಾತನಾಡಿರುವ ಬೆರ್ವಾಲ್, 2015 ರಲ್ಲಿ ವಿಶ್ವ ಮಿಲಿಟರಿ ಕ್ರೀಡಾಕೂಟದಲ್ಲಿ ಪಾಕಿಸ್ತಾನದ ಬಾಕ್ಸರ್ ಜೊತೆ ಹೋರಾಡಿದ ಘಟನೆಯ ಒಂದು ಸಣ್ಣ ಕಥೆಯನ್ನು ಹಂಚಿಕೊಂಡರು. ಬೆರ್ವಾಲ್ ಪಂದ್ಯವನ್ನು ಗೆದ್ದ ನಂತರ, ತಮ್ಮ ಪಾಕಿಸ್ತಾನಿ ಎದುರಾಳಿಯೊಂದಿಗೆ ಹಾಸ್ಯಮಯ ಸಂಭಾಷಣೆಯಲ್ಲಿ ತೊಡಗಿದ್ದರು. ಅವರು ಅಲ್ಲಿ ನಡೆದಿದ್ದನ್ನು ವಿವರಿಸುತ್ತಿದ್ದಂತೆ, ಪ್ರಧಾನಿ ಮೋದಿ ಕೂಡ ಅಚ್ಚರಿಗೊಂಡು ಪ್ರತಿಕ್ರಿಯೆ ನೀಡಿದ್ದಾರೆ.

ಭಾರತ ಮತ್ತು ಪಾಕಿಸ್ತಾನದ ನಡುವಿನ ರಾಜಕೀಯ ಸಂಬಂಧಗಳು ದಶಕಗಳಿಂದ ಉದ್ವಿಗ್ನವಾಗಿವೆ. ಇಂತಹ ಸಮಯದಲ್ಲೇ ನಡೆದ ಕಥೆಯನ್ನು ಹೇಳಿರುವ ಬೆರ್ವಾಲ್, ಎರಡು ರಾಷ್ಟ್ರಗಳ ನಡುವೆ ನಡೆಯುತ್ತಿರುವ ಗಡಿ ಸಂಘರ್ಷಗಳನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ಸೇನೆಯು ತನ್ನ ಎದುರಾಳಿಯ ವಿರುದ್ಧ ಸೋಲದಂತೆ ಹೇಗೆ ಎಚ್ಚರಿಸಿತು ಎಂಬುದನ್ನು ಬೆರ್ವಾಲ್ ಬಹಿರಂಗಪಡಿಸಿದರು.

"ನಾವು ಪಾಕಿಸ್ತಾನದ ಬಗ್ಗೆ ಮಾತನಾಡುತ್ತಿದ್ದಾಗ, ನನಗೆ ಒಂದು ಕಥೆ ನೆನಪಿಗೆ ಬಂತು ಸರ್. ಅದು 2015 ರ ವಿಶ್ವ ಮಿಲಿಟರಿ ಕ್ರೀಡಾಕೂಟ, ಮತ್ತು ನನ್ನ ಮೊದಲ ಹೋರಾಟ ಪಾಕಿಸ್ತಾನದ ಬಾಕ್ಸರ್ ವಿರುದ್ಧ ನಿಗದಿಯಾಗಿತ್ತು. ಅದು ಮಿಲಿಟರಿ ಕ್ರೀಡಾಕೂಟವಾದ್ದರಿಂದ, 'ನೀವು ಪಾಕಿಸ್ತಾನದ ವಿರುದ್ಧ ಸೋಲಬಾರದು' ಎಂದು ಅಧಿಕಾರಿಗಳಿಂದ ನನಗೆ ಕರೆಗಳು ಬಂದಿದ್ದವು" ಎಂದು ಅವರು ಬಹಿರಂಗಪಡಿಸಿದರು.

ಬೆರ್ವಾಲ್ ಪಂದ್ಯವನ್ನು ಗೆದ್ದರು, ಆದರೆ ಇಬ್ಬರೂ ಹೋರಾಟಗಾರರಿಗೆ ಮುಖದ ಮೇಲೆ ಗಾಯಗಳಾಗಿದ್ದವು, ಇದರಿಂದಾಗಿ ಅವರು ಒಟ್ಟಿಗೆ ಆಸ್ಪತ್ರೆಗೆ ಭೇಟಿ ನೀಡಿದರು.

"ನಾನು ಮೊದಲ ಸುತ್ತನ್ನು 4-1 ಮತ್ತು ಎರಡನೇ ಸುತ್ತನ್ನು 3-2 ರಲ್ಲಿ ಗೆದ್ದೆ, ಆದರೆ ನಮ್ಮಿಬ್ಬರಿಗೂ ಗಾಯಗಳಾಗಿತ್ತು. ನಾನು ಪಂದ್ಯವನ್ನು ಗೆದ್ದೆ, ಮತ್ತು ನಂತರ, ನಾವಿಬ್ಬರೂ ಹೊಲಿಗೆ ಹಾಕಿಕೊಳ್ಳಲು ಆಸ್ಪತ್ರೆಗೆ ಹೋದೆವು." ಎಂದು ಹಣಾಹಣಿಯನ್ನು ಬೆರ್ವಾಲ್ ವಿವರಿಸಿದರು.

ಕಥೆಯನ್ನು ಮುಂದುವರೆಸಿರುವ ಬೆರ್ವಾಲ್, "2014 ರಲ್ಲಿ, ನೀವು [ಪ್ರಧಾನಿ ಮೋದಿಯನ್ನು ಉಲ್ಲೇಖಿಸಿ] ಮೊದಲ ಬಾರಿಗೆ ಪ್ರಧಾನಿಯಾದಿರಿ. ನಮ್ಮೊಂದಿಗಿದ್ದ ಸೇನಾ ತರಬೇತುದಾರನ ಹೆಸರು ನರೇಂದ್ರ ರಾಣಾ. ಪಾಕಿಸ್ತಾನಿ ಬಾಕ್ಸರ್ ಸ್ವಲ್ಪ ಹೊತ್ತು ಯೋಚಿಸಿ ನಂತರ ನನಗೆ, 'ಸಹೋದರ, ನಾನು ಏನಾದರೂ ಹೇಳಬಹುದೇ?' ಎಂದು ಪ್ರಶ್ನಿಸಿದರು. ನಾನು ಅನುಮತಿಸಿದೆ.

ನಂತರ ಪಾಕಿಸ್ತಾನಿ ಬಾಕ್ಸರ್ ಮಾತನಾಡುತ್ತಾ, ನಿಮ್ಮ ಹೆಸರು ನರೇಂದರ್, ನಿಮ್ಮ ಕೋಚ್ ಹೆಸರೂ ನರೇಂದರ್, ನಿಮ್ಮ ಪ್ರಧಾನ ಮಂತ್ರಿ ಹೆಸರೂ ನರೇಂದ್ರ, ಈ ನರೇಂದ್ರ ಎಂಬ ಹೆಸರನ್ನು ನಾನು ಇಷ್ಟಪಡುವುದಿಲ್ಲ ಎಂದು ಹೇಳಿದ್ದನ್ನು ಬರ್ವಾಲ್ ಹಂಚಿಕೊಂಡರು. ಈ ಕಥೆಯನ್ನು ಕೇಳಿದ ಪ್ರಧಾನಿ ಮೋದಿಗೆ ನಗು ತಡೆಯಲು ಸಾಧ್ಯವಾಗಲಿಲ್ಲ.

ತಮ್ಮ ನಿವಾಸದಲ್ಲಿ, ಪ್ರಧಾನಿ ಮೋದಿ ಅವರು ಹಲವಾರು ಕ್ರೀಡಾಪಟುಗಳೊಂದಿಗೆ ಒಬ್ಬರಿಗೊಬ್ಬರು ಸಂವಾದ ನಡೆಸಿದರು, ಭಾರತದ ಕ್ರೀಡಾ ಪ್ರಯಾಣವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯಲು ಅವರ ಕೊಡುಗೆಗಳನ್ನು ಶ್ಲಾಘಿಸಿದರು.