ಹೊಸೂರಿನಿಂದ ಬೊಮ್ಮಸಂದ್ರಕ್ಕೆ ಮೆಟ್ರೋ ರೈಲು ಸಂಪರ್ಕ; ಬಜೆಟ್‌ನಲ್ಲಿ ತಮಿಳುನಾಡು ಸರ್ಕಾರ ಘೋಷಣೆ

ಚೆನ್ನೈ: ತಮಿಳುನಾಡು ಸರ್ಕಾರವು ಹೊಸೂರಿನಿಂದ ಕರ್ನಾಟಕದ ಬೊಮ್ಮಸಂದ್ರದವರೆಗೆ ಮೆಟ್ರೋ ರೈಲು ಸಂಪರ್ಕ ಕಲ್ಪಿಸುವ ಪ್ರಸ್ತಾವನೆಯನ್ನು ಪರಿಶೀಲಿಸುತ್ತಿದೆ ಎಂದು ಹಣಕಾಸು ಸಚಿವ ಎನ್. ಮೇರಿ ವಿಲ್ಸನ್ ಬುಧವಾರ ಇಲ್ಲಿ ತಿಳಿಸಿದರು.

ತಮ್ಮ ಬಜೆಟ್ ಭಾಷಣದಲ್ಲಿ, ₹63,246 ಕೋಟಿ ಅಂದಾಜು ವೆಚ್ಚದಲ್ಲಿ ಮೂರು ಕಾರಿಡಾರ್‌ಗಳ ಮೂಲಕ 118.9 ಕಿ.ಮೀ ವ್ಯಾಪ್ತಿಯಲ್ಲಿ ಕೈಗೊಳ್ಳಲಾಗಿರುವ ಚೆನ್ನೈ ಮೆಟ್ರೋ ರೈಲು ಯೋಜನೆಯ ಎರಡನೇ ಹಂತದ ನಿರ್ಮಾಣ ಕಾರ್ಯವು ಭರದಿಂದ ಸಾಗುತ್ತಿದೆ ಎಂದು ಹೇಳಿದರು.

ಅಸ್ತಿತ್ವದಲ್ಲಿರುವ ವಡಪಳನಿ ಮೆಟ್ರೋ ನಿಲ್ದಾಣವನ್ನು ಸಂಪರ್ಕಿಸುವ ಹಾಗೂ 11 ಮೆಟ್ರೋ ನಿಲ್ದಾಣಗಳ ಮೂಲಕ 14.64 ಕಿಮೀ ವ್ಯಾಪ್ತಿಯ, ಪೂನಮಲ್ಲಿ ಬೈಪಾಸ್‌ನಿಂದ ಪೋರೂರ್ ಜಂಕ್ಷನ್‌ವರೆಗಿನ ಎರಡನೇ ಹಂತದ ಮೊದಲ ವಿಭಾಗವು ಶೀಘ್ರದಲ್ಲೇ ಕಾರ್ಯಾರಂಭಗೊಳ್ಳಲಿದೆ.

ರಾಜ್ಯದಿಂದ ಶಿಫಾರಸು ಮಾಡಲಾದ ಚೆನ್ನೈ ವಿಮಾನ ನಿಲ್ದಾಣ-ಕಿಲಂಬಕ್ಕಂ, ಕೊಯಾಂಬೆಡು-ಪಟ್ಟಾಭಿರಂ (ಅವಡಿ ಮಾರ್ಗ) ಮತ್ತು ಪೂನಮಲ್ಲಿ-ಸುಂಗುವರ್ಚತಿರಂ (ಶ್ರೀಪೆರಂಬದೂರ್ ಮಾರ್ಗ) ಮೆಟ್ರೋ ರೈಲು ಯೋಜನೆಗಳು ಕೇಂದ್ರ ಸರ್ಕಾರದ ಸಕ್ರಿಯ ಪರಿಗಣನೆಯಲ್ಲಿವೆ. ಈ ಹೆಚ್ಚುವರಿ ಮೆಟ್ರೋ ರೈಲು ಮಾರ್ಗಗಳಿಗೆ ಭಾರತ ಸರ್ಕಾರದಿಂದ ಶೀಘ್ರ ಅನುಮೋದನೆ ಪಡೆಯಲು ರಾಜ್ಯ ಸರ್ಕಾರವು ಎಲ್ಲ ರೀತಿಯ ಕ್ರಮಗಳನ್ನು ಕೈಗೊಳ್ಳುತ್ತಿದೆ ಎಂದು ಅವರು ಹೇಳಿದರು.

'ಕೃಷ್ಣಗಿರಿ ಜಿಲ್ಲೆಯ ಹೊಸೂರಿನಿಂದ ಕರ್ನಾಟಕದ ಬೊಮ್ಮಸಂದ್ರದವರೆಗಿನ ಮೆಟ್ರೋ ರೈಲು ಮಾರ್ಗದ ಪ್ರಸ್ತಾವನೆಯನ್ನು ಭಾರತ ಸರ್ಕಾರ ಮತ್ತು ಕರ್ನಾಟಕ ಸರ್ಕಾರಗಳೊಂದಿಗೆ ಸರ್ಕಾರವು ಪರಿಶೀಲಿಸುತ್ತಿದೆ' ಎಂದರು.

ಬೊಮ್ಮಸಂದ್ರವು ಬೆಂಗಳೂರು ಮತ್ತು ಹೊಸೂರು ಎರಡಕ್ಕೂ ಹತ್ತಿರದಲ್ಲಿದೆ.

ತಮಿಳುನಾಡಿನ ರಾಜ್ಯ ಸಾರಿಗೆ ಸಂಸ್ಥೆಗಳ ವಾಹನ ಸಮೂಹವನ್ನು ಆಧುನೀಕರಿಸುವ ಅಗತ್ಯವನ್ನು ಸರ್ಕಾರವು ಗುರುತಿಸಿದೆ. ಈ ಉದ್ದೇಶದೊಂದಿಗೆ, ಸರ್ಕಾರವು 'ಒಟ್ಟು ವೆಚ್ಚದ ಗುತ್ತಿಗೆ ಮಾದರಿ'ಯ (gross cost contract model) ಅಡಿಯಲ್ಲಿ ಎಲೆಕ್ಟ್ರಿಕ್ ಬಸ್‌ಗಳನ್ನು ಕಾರ್ಯಾಚರಣೆಗೊಳಿಸಲಿದೆ. ಸದ್ಯದ ಹಣಕಾಸು ವರ್ಷದಲ್ಲಿ, ಚೆನ್ನೈ ಮೆಟ್ರೋಪಾಲಿಟನ್ ಸಾರಿಗೆ ನಿಗಮಕ್ಕಾಗಿ 1,000 ಹೊಸ ಹವಾನಿಯಂತ್ರಿತ ಎಲೆಕ್ಟ್ರಿಕ್ ಬಸ್‌ಗಳನ್ನು ಖರೀದಿಸಲಾಗುವುದು ಎಂದು ಅವರು ಹೇಳಿದರು.

ಬಸ್ ಡಿಪೋಗಳಲ್ಲಿ ಈ ಬಸ್‌ಗಳಿಗೆ ಅಗತ್ಯವಿರುವ ವಿದ್ಯುತ್ ಮತ್ತು ಯಾಂತ್ರಿಕ ಸೌಲಭ್ಯಗಳನ್ನು ಒದಗಿಸಲು ಪರಿಷ್ಕೃತ ಬಜೆಟ್ ಅಂದಾಜಿನಲ್ಲಿ ₹500 ಕೋಟಿ ಮೀಸಲಿಡಲಾಗಿದೆ.

ಪರಿಷ್ಕೃತ ಬಜೆಟ್ ಅಂದಾಜಿನಲ್ಲಿ ರಾಜ್ಯ ಸಾರಿಗೆ ಸಂಸ್ಥೆಗಳಿಗೆ ಸಹಾಯಧನವಾಗಿ ₹7,675 ಕೋಟಿ, ಕಾರ್ಯಕ್ಷಮತೆಯ ಕೊರತೆ ಭರ್ತಿ ನಿಧಿಯಾಗಿ (performance gap funding) ₹2,650 ಕೋಟಿ ಹಾಗೂ ಷೇರು ಬಂಡವಾಳ ನೆರವಿನ ರೂಪದಲ್ಲಿ ₹1,005 ಕೋಟಿ ಒದಗಿಸಲಾಗಿದೆ. ಪರಿಷ್ಕೃತ ಬಜೆಟ್ ಅಂದಾಜಿನಲ್ಲಿ ಸಾರಿಗೆ ಇಲಾಖೆಗೆ ₹13,561 ಕೋಟಿ ಮೀಸಲಿಡಲಾಗಿದೆ.