ಕಾಶ್ಮೀರದಲ್ಲಿ ಅಮೆರಿಕಾದ ಪ್ರಜೆ ಬಂಧನ: ಅಲ್ಲಿ ಆತ ಮಾಡ್ತಿದಿದ್ದೇನು?

ಶ್ರೀನಗರ: ಅಮೆರಿಕದ ಒಬ್ಬ ಪ್ರಜೆ ಹಾಗೂ ಕೋಲ್ಕತ್ತಾದ ಒಬ್ಬ ವ್ಯಕ್ತಿಯನ್ನು ಉಪಗ್ರಹ ದೂರವಾಣಿ (ಸ್ಯಾಟಲೈಟ್ ಫೋನ್) ಹೊಂದಿದ್ದ ಕಾರಣ ಶ್ರೀನಗರ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಅಮೆರಿಕ ನಾಗರಿಕನನ್ನು ಜೆಫ್ರಿ ಸ್ಕಾಟ್ ಪ್ರೇಥರ್ ಎಂದು, ಅವನೊಂದಿಗೆ ಪ್ರಯಾಣಿಸುತ್ತಿದ್ದ ಕೋಲ್ಕತ್ತಾ ನಿವಾಸಿಯನ್ನು ಹಾಲ್ದರ್ ಕೌಶಿಕ್ ಎಂದು ಗುರುತಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಭಾರತದಲ್ಲಿ ಯಾವುದೇ ವಿಧದ ಉಪಗ್ರಹ ದೂರವಾಣಿ (ಸ್ಯಾಟಲೈಟ್ ಫೋನ್) ಬಳಕೆ ಮಾಡಲು ದೂರಸಂಪರ್ಕ ಇಲಾಖೆಯಿಂದ ಪೂರ್ವಾನುಮತಿ ಹಾಗೂ ಪರವಾನಗಿ ಪಡೆಯುವುದು ಕಡ್ಡಾಯ. ಉಪಗ್ರಹ ದೂರವಾಣಿಯನ್ನು ತಮ್ಮ ಪದಾರ್ಥಗಳಲ್ಲಿ ಹೊತ್ತುಕೊಂಡು ಭಾರತಕ್ಕೆ ಬರುವವರು, ಆಗಮಿಸುವ ಕ್ಷಣದಲ್ಲೇ ಅದನ್ನು ಕಸ್ಟಮ್ಸ್ ಅಧಿಕಾರಿಗಳಿಗೆ ಘೋಷಿಸಬೇಕು.

ಈ ಪ್ರಕರಣದಲ್ಲಿ ಇಬ್ಬರು ವ್ಯಕ್ತಿಗಳನ್ನು ಅಧಿಕಾರಿಗಳು ವಿಚಾರಣೆಗೊಳಪಡಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ವಿಶೇಷವಾಗಿ ಜಮ್ಮು ಮತ್ತು ಕಾಶ್ಮೀರ ಪ್ರದೇಶದಲ್ಲಿ ಇದು ಅತ್ಯಂತ ಸಂವೇದನಶೀಲ ವಿಷಯವಾಗಿದ್ದು, ಪಾಕಿಸ್ತಾನ ಬೆಂಬಲಿತ ಉಗ್ರರು ಪರಸ್ಪರ ಸಂಪರ್ಕಕ್ಕಾಗಿ ಉಪಗ್ರಹ ಫೋನ್‌ಗಳನ್ನು ಬಳಸುವ ಸಾಧ್ಯತೆ ಇರುವುದರಿಂದ ಹೆಚ್ಚುವರಿ ಎಚ್ಚರಿಕೆ ವಹಿಸಲಾಗುತ್ತಿದೆ.