ನ್ಯೂಯಾರ್ಕ್‌ನಲ್ಲಿ ನೆಹರೂರನ್ನು ಹೊಗಳಲಾಯಿತು, ಆದರೆ ಭಾರತ ಅವಮಾನಿಸುತ್ತಿದೆ: ಪ್ರಿಯಾಂಕಾ

ಚಂಪಾರಣ್: ವಿರೋಧಿಗಳು "ನಮ್ಮ ಪೂರ್ವಜರು ಮಾಡಿದ ತ್ಯಾಗಗಳನ್ನು" ಮೆಚ್ಚಲು ಸಾಧ್ಯವಾಗುತ್ತಿಲ್ಲ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು ಬುಧವಾರ ಬಿಜೆಪಿಯ "ಕುಟುಂಬ ರಾಜಕೀಯ"ದ ಆರೋಪಕ್ಕೆ ತಿರುಗೇಟು ನೀಡಿದರು.

ಇಂದು ಬಿಹಾರದ ಪಶ್ಚಿಮ ಚಂಪಾರಣ್ ಜಿಲ್ಲೆಯ ವಾಲ್ಮೀಕಿ ನಗರದಲ್ಲಿ ರ್ಯಾಲಿಯನ್ನುದ್ದೇಶಿಸಿ ಮಾತನಾಡಿದ ಪ್ರಿಯಾಂಕಾ ಅವರು, ನ್ಯೂಯಾರ್ಕ್‌ ನೂತನ ಮೇಯರ್ ತಮ್ಮ ಮುತ್ತಜ್ಜ ಜವಾಹರಲಾಲ್ ನೆಹರು ಅವರನ್ನು ಹೊಗಳಿದ್ದನ್ನು ಉಲ್ಲೇಖಿಸಿದರು ಮತ್ತು ಭಾರತದ ಮೊದಲ ಪ್ರಧಾನಿ ಅವರ ಸಾವಿನ ನಂತರ ಅವರ ತವರು ನೆಲದಲ್ಲಿ "ಅವಮಾನಗಳನ್ನು" ಎದುರಿಸುತ್ತಿದ್ದಾರೆ ಎಂದು ವಿಷಾದಿಸಿದರು.

"ನಾವು ನಿಮಗೆ ಸೇವೆ ಸಲ್ಲಿಸಲು ಬಯಸುತ್ತೇವೆ. ರಾಷ್ಟ್ರದ ಸಂಪತ್ತು ನಿಮಗೆ ಸೇರಿದೆ ಎಂದು ನಾವು ಅರ್ಥಮಾಡಿಕೊಂಡಿದ್ದೇವೆ. ನಮ್ಮ ಪೂರ್ವಜರು ಸ್ವಾತಂತ್ರ್ಯ ಹೋರಾಟದಲ್ಲಿ ಭಾಗವಹಿಸಿದ್ದರು. ನಿಮ್ಮ ಅನೇಕ ಪೂರ್ವಜರು ಸ್ವಾತಂತ್ರ್ಯಕ್ಕಾಗಿ ತಮ್ಮ ಪ್ರಾಣವನ್ನು ತ್ಯಾಗ ಮಾಡಿದ್ದಾರೆ" ಎಂದು ಪ್ರಿಯಾಂಕಾ ಹೇಳಿದರು.

"ಇಲ್ಲಿನ ಮಣ್ಣು ನಿಮ್ಮ ರಕ್ತ ಮತ್ತು ನಮ್ಮ ರಕ್ತದಿಂದ ತುಂಬಿದೆ. ಆದರೆ ಕುಟುಂಬ ರಾಜಕೀಯವಿದೆ ಎಂದು ವೇದಿಕೆಗಳಿಂದ ಕೂಗುವವರು, ಹುತಾತ್ಮತೆ ಸೇರಿದಂತೆ ಅವರ ತ್ಯಾಗಗಳನ್ನು ಎಂದಿಗೂ ಅರ್ಥಮಾಡಿಕೊಳ್ಳಲು ಸಾಧ್ಯವಿಲ್ಲ. ಇದು ಪರಿವಾರ್ವಾದವಲ್ಲ. ಆದರೆ ರಾಷ್ಟ್ರದ ಕಡೆಗೆ ನಮ್ಮ ಧರ್ಮ" ಎಂದು ವಾದ್ರಾ ಹೇಳಿದರು.

ಅವರ ತಂದೆ ರಾಜೀವ್ ಗಾಂಧಿ ಮತ್ತು ಅಜ್ಜಿ ಇಂದಿರಾ ಗಾಂಧಿ, ಇಬ್ಬರೂ ಮಾಜಿ ಪ್ರಧಾನಿಗಳಾಗಿದ್ದು, ಅವರನ್ನು ಹತ್ಯೆ ಮಾಡಲಾಗಿದೆ.

"ಬೆಳಗ್ಗೆಯಿಂದ ಸಂಜೆಯವರೆಗೆ, ಬಿಜೆಪಿಯ ನಾಯಕರು ನೆಹರೂ ಅವರನ್ನು ನಿಂದಿಸುವುದಲ್ಲಿ ನಿರತರಾಗಿದ್ದಾರೆ. ದೇಶವನ್ನು ಕಾಡುತ್ತಿರುವ ಎಲ್ಲಾ ದುಷ್ಪರಿಣಾಮಗಳಿಗೆ ಅವರನ್ನೇ ದೂಷಿಸುತ್ತಾರೆ. ಅಮೆರಿಕದ ಪ್ರಮುಖ ನಗರವಾದ ನ್ಯೂಯಾರ್ಕ್‌ನಲ್ಲಿ ಚುನಾವಣೆಯಲ್ಲಿ ಗೆದ್ದ ವ್ಯಕ್ತಿಯೊಬ್ಬರು ನೆಹರೂ ಅವರನ್ನು ಸ್ಮರಿಸಿದ್ದಾರೆ. ಆದರೆ ಇಲ್ಲಿ, ನೆಹರೂ ಅವರ ಸ್ವಂತ ದೇಶದಲ್ಲಿ, ನಾವು ಪ್ರತಿದಿನ ಅವರನ್ನು ಅವಮಾನಿಸುವುದನ್ನು ನೋಡುತ್ತಿದ್ದೇವೆ" ಎಂದರು.

ನ್ಯೂಯಾರ್ಕ್‌ನ ನೂತನ ಮೇಯರ್ ಆಗಿ ಆಯ್ಕೆಯಾದ ಜೋಹ್ರಾನ್ ಮಮ್ದಾನಿ ಅವರು, 1947ರಲ್ಲಿ ಭಾರತದ ಸ್ವಾತಂತ್ರ್ಯ ದಿನಾಚರಣೆಯಂದು ಜವಾಹರ್ ಲಾಲ್ ನೆಹರೂ ಮಾಡಿದ್ದ 'ಟ್ರಸ್ಟಿ ವಿತ್ ಡೆಸ್ಟಿನೀ' ಭಾಷಣವನ್ನು ಉಲ್ಲೇಖಿಸಿದರು.