ಟರ್ಕಿ, ಅಜರ್‌ಬೈಜಾನ್‌ ಜೊತೆಗಿನ ಪಂಜಾಬ್ ವಿವಿ ಒಪ್ಪಂದ ರದ್ದು!

ಜಲಂಧರ್‌: ಪಂಜಾಬ್‌ನ ಲವ್ಲಿ ಪ್ರೊಫೆಷನಲ್ ವಿಶ್ವವಿದ್ಯಾಲಯವು ಟರ್ಕಿ ಮತ್ತು ಅಜರ್‌ಬೈಜಾನ್‌ನಲ್ಲಿರುವ ಸಂಸ್ಥೆಗಳೊಂದಿಗಿನ ಎಲ್ಲಾ ಒಪ್ಪಂದಗಳನ್ನು ರದ್ದುಗೊಳಿಸಿದೆ.

ಪಾಕಿಸ್ತಾನಕ್ಕೆ ಬೆಂಬಲ ನೀಡಿದ ಟರ್ಕಿಯ ಇತ್ತೀಚಿನ ರಾಜಕೀಯ ಬೆಳವಣಿಗೆ ಭಾರತದ ರಾಷ್ಟ್ರೀಯ ಹಿತಾಸಕ್ತಿಗೆ ವಿರುದ್ಧವಾಗಿದೆ ಎಂದು ಉಲ್ಲೇಖಿಸಿ ಪಂಜಾಬ್‌ ವಿವಿ ಒಪ್ಪಂದಗಳನ್ನು ರದ್ದುಗೊಳಿಸಿದೆ.

ಟರ್ಕಿ ಪಾಕಿಸ್ತಾನವನ್ನು ಬೆಂಬಲಿಸುತ್ತಿರುವ ಹಿನ್ನೆಲೆಯಲ್ಲಿ ಮತ್ತು ನೆರೆಯ ದೇಶ ಹಾಗೂ ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿನ ಭಯೋತ್ಪಾದಕ ಶಿಬಿರಗಳ ಮೇಲೆ ಭಾರತ ನಡೆಸಿದ ಆಪರೇಷನ್ ಸಿಂಧೂರ್ ಅನ್ನು ಖಂಡಿಸಿದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.

ಜಲಂಧರ್‌ನಲ್ಲಿರುವ ಲವ್ಲಿ ಪ್ರೊಫೆಷನಲ್ ವಿಶ್ವವಿದ್ಯಾಲಯ(ಎಲ್‌ಪಿಯು)ವು, ಟರ್ಕಿ ಮತ್ತು ಅಜರ್ಬೈಜಾನ್‌ನಲ್ಲಿರುವ ಸಂಸ್ಥೆಗಳೊಂದಿಗಿನ ಸಂಬಂಧವನ್ನು ಕಡಿತಗೊಳಿಸಿದ ಭಾರತದ ಮೊದಲ ಖಾಸಗಿ ವಿಶ್ವವಿದ್ಯಾಲಯವಾಗಿದೆ.

"ನಮ್ಮ ಧೈರ್ಯಶಾಲಿ ಸಶಸ್ತ್ರ ಪಡೆಗಳು ತಮ್ಮ ಜೀವಗಳನ್ನು ಪಣಕ್ಕಿಡುತ್ತಿರುವಾಗ - ರಹಸ್ಯ ಕಾರ್ಯಾಚರಣೆಗಳಲ್ಲಿ, ವಾಯು ರಕ್ಷಣೆಯಲ್ಲಿ ಅಥವಾ ನಮ್ಮ ಗಡಿಗಳಲ್ಲಿ ಗಸ್ತು ತಿರುಗುವಾಗ - ನಾವು ಒಂದು ಸಂಸ್ಥೆಯಾಗಿ ಅಸಡ್ಡೆ ತೋರಲು ಸಾಧ್ಯವಿಲ್ಲ. ಎಲ್‌ಪಿಯುನ ಧ್ಯೇಯವು ಯಾವಾಗಲೂ ಭಾರತದ ಬೆಳವಣಿಗೆ ಮತ್ತು ಸಮಗ್ರತೆಗೆ ಹೊಂದಿಕೊಂಡಿದೆ. ಭಾರತದ ಸಾರ್ವಭೌಮತ್ವವನ್ನು ದುರ್ಬಲಗೊಳಿಸುವ ಯಾವುದೇ ಸಂಸ್ಥೆಯೊಂದಿಗೆ ನಾವು ಎಂದಿಗೂ ಸಹಭಾಗಿತ್ವ ವಹಿಸುವುದಿಲ್ಲ" ಎಂದು ಎಲ್‌ಪಿಯು ಸಂಸ್ಥಾಪಕ ಕುಲಪತಿ ಮತ್ತು ರಾಜ್ಯಸಭಾ ಸದಸ್ಯ ಅಶೋಕ್ ಕುಮಾರ್ ಮಿತ್ತಲ್ ಹೇಳಿದ್ದಾರೆ.

ಈ ನಿರ್ಧಾರವು ವಿದ್ಯಾರ್ಥಿ ಮತ್ತು ಅಧ್ಯಾಪಕರ ವಿನಿಮಯ ಕಾರ್ಯಕ್ರಮಗಳು, ಜಂಟಿ ಸಂಶೋಧನಾ ಯೋಜನೆಗಳು, ಡ್ಯುಯಲ್ ಪದವಿ ಉಪಕ್ರಮಗಳು ಮತ್ತು ಎರಡೂ ದೇಶಗಳ ಸಂಸ್ಥೆಗಳೊಂದಿಗೆ ಇತರ ಎಲ್ಲಾ ಶೈಕ್ಷಣಿಕ ಸಹಯೋಗವನ್ನು ತಕ್ಷಣವೇ ರದ್ದುಗೊಳಿಸುವುದನ್ನು ಒಳಗೊಂಡಿದೆ.