ಕೇಂದ್ರದ ಆದೇಶವನ್ನೇ ಧಿಕ್ಕರಿಸಿದ ಕೇರಳ: IFFK ಯಲ್ಲಿ ನಿರ್ಬಂಧಿತ ಎಲ್ಲಾ ಚಲನಚಿತ್ರ ಪ್ರದರ್ಶಿಸಲು ಆದೇಶ!

ತಿರುವನಂತಪುರಂ: ಕೇಂದ್ರದ ಅನುಮೋದನೆಗಾಗಿ ಕಾಯದೆ 2025ರ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ (IFFK) ಆಯೋಜಕರಿಗೆ ಎಲ್ಲಾ ಚಲನಚಿತ್ರಗಳನ್ನು ಪ್ರದರ್ಶಿಸುವಂತೆ ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ನಿರ್ದೇಶಿಸಿದ್ದಾರೆ. 19ನೇ ಶತಮಾನದ ಸೋವಿಯತ್ ಕ್ಲಾಸಿಕ್ ಬ್ಯಾಟಲ್‌ಶಿಪ್ ಪೊಟೆಮ್‌ಕಿನ್ ಮತ್ತು ಕೆಲವು ಪ್ಯಾಲೇಸ್ಟಿನಿಯನ್ ಚಲನಚಿತ್ರಗಳು ಸೇರಿದಂತೆ 19 ಚಲನಚಿತ್ರಗಳನ್ನು IFFK ಪ್ರದರ್ಶಿಸದಂತೆ ಕೇಂದ್ರ ಸರ್ಕಾರವು ಅವುಗಳ ಪ್ರದರ್ಶನಕ್ಕೆ ಅನುಮೋದನೆಯನ್ನು ತಡೆಹಿಡಿದಿತ್ತು.

ಸಂಘ ಪರಿವಾರದ ಕಾರ್ಯಸೂಚಿಯಿಂದಾಗಿ ಕೇಂದ್ರವು ಚಲನಚಿತ್ರಗಳನ್ನು ಪ್ರದರ್ಶಿಸಲು ನಿರಾಕರಿಸಿದೆ ಎಂದು ಮುಖ್ಯಮಂತ್ರಿ ಆರೋಪಿಸಿದ್ದು ಎಲ್ಲಾ ಚಲನಚಿತ್ರಗಳನ್ನು ಪ್ರದರ್ಶಿಸುವಂತೆ ಸಂಘಟಕರಿಗೆ ನಿರ್ದೇಶನ ನೀಡಿದರು. ಚಲನಚಿತ್ರೋತ್ಸವದ ಸೆನ್ಸಾರ್‌ಶಿಪ್ ಬಹುತ್ವ ಮತ್ತು ಪ್ರತಿರೋಧದ ಧ್ವನಿಗಳನ್ನು ನಿಗ್ರಹಿಸುವ ಸಂಘ ಪರಿವಾರದ ಕಾರ್ಯಸೂಚಿಯನ್ನು ಹೇರುವ ಪ್ರಯತ್ನವಾಗಿದೆ. ಇದು ಸರ್ವಾಧಿಕಾರದ ಮತ್ತೊಂದು ಉದಾಹರಣೆಯಾಗಿದೆ. ಕೇರಳ ಸಮಾಜವು ಇದನ್ನು ಸ್ವೀಕರಿಸುವುದಿಲ್ಲ. ಚಲನಚಿತ್ರೋತ್ಸವಕ್ಕೆ ನಿಗದಿಪಡಿಸಲಾದ ಎಲ್ಲಾ ಚಲನಚಿತ್ರಗಳನ್ನು ಪ್ರದರ್ಶಿಸಲಾಗುತ್ತದೆ.

ಕೇಂದ್ರ ಸರ್ಕಾರದ ಇಂತಹ ನಿರ್ಬಂಧಗಳು ಚಲನಚಿತ್ರೋತ್ಸವಗಳ ಆಯೋಜನೆಗೆ ಅಪಾಯವನ್ನುಂಟು ಮಾಡುತ್ತವೆ. ಅದನ್ನು ವಿರೋಧಿಸಬೇಕು ಎಂದು ಕೇರಳದ ಸಾಂಸ್ಕೃತಿಕ ಸಚಿವ ಶಾಜಿ ಚೆರಿಯನ್ ಹೇಳಿದರು. ಕೋಲ್ಕತ್ತಾ ಚಲನಚಿತ್ರೋತ್ಸವದಲ್ಲಿಯೂ ಇದೇ ರೀತಿಯ ಸಮಸ್ಯೆ ಉದ್ಭವಿಸಿದೆ ಮತ್ತು ಪಶ್ಚಿಮ ಬಂಗಾಳ ಸರ್ಕಾರವು ಅವುಗಳನ್ನು ಪ್ರದರ್ಶಿಸಲು ನಿರ್ಧರಿಸಿದೆ ಎಂದರು.

ಏತನ್ಮಧ್ಯೆ, ಕೇಂದ್ರ ಸರ್ಕಾರವು ಮಂಗಳವಾರ ನಾಲ್ಕು ಚಲನಚಿತ್ರಗಳಿಗೆ ಅನುಮತಿ ನೀಡಿತು. ಶ್ರೀ ಥಿಯೇಟರ್‌ನಲ್ಲಿ ಸಂಜೆ 6:30ಕ್ಕೆ ನಿಗದಿಯಾಗಿದ್ದ ಸೆರ್ಗೆಯ್ ಐಸೆನ್‌ಸ್ಟೈನ್ ಅವರ 1925ರ ಚಲನಚಿತ್ರ 'ಬ್ಯಾಟಲ್‌ಶಿಪ್ ಪೊಟೆಮ್‌ಕಿನ್' ಪ್ರದರ್ಶನವನ್ನು ರದ್ದುಗೊಳಿಸಲಾಯಿತು. ಈ ಚಲನಚಿತ್ರವನ್ನು ವಿಶ್ವಾದ್ಯಂತ ಚಲನಚಿತ್ರ ತರಬೇತಿ ಸಂಸ್ಥೆಗಳ ಪಠ್ಯಕ್ರಮದಲ್ಲಿ ಸೇರಿಸಲಾಗಿದೆ. ಇದರ ಕಥಾವಸ್ತುವು 1905ರಲ್ಲಿ ತ್ಸಾರಿಸ್ಟ್ ರಷ್ಯಾ ವಿರುದ್ಧದ ನೌಕಾ ದಂಗೆಯ ಮೇಲೆ ಕೇಂದ್ರೀಕರಿಸುತ್ತದೆ.

ನಿಷೇಧಿತ ಇತರ ಚಲನಚಿತ್ರಗಳಲ್ಲಿ 'ಒನ್ಸ್ ಅಪಾನ್ ಎ ಟೈಮ್ ಇನ್ ದೀಸ್ ಗಾಜಾ, ಪ್ಯಾಲೆಸ್ಟೈನ್ 36, ಎ ಪೊಯೆಟ್: ಅನ್‌ಕನ್ಸೈಲ್ಡ್ ಪೊಯೆಟ್ರಿ, ಬೀಫ್, ಕ್ಲಾಷ್, ವಾಜಿಬ್, ಆಲ್ ದಟ್ ಈಸ್ ಲೆಫ್ಟ್ ಆಫ್ ಯು ಮತ್ತು ಸಂತೋಷ್ ಇತ್ಯಾದಿ ಸೇರಿವೆ. ಕುತೂಹಲಕಾರಿಯಾಗಿ, 'ನಿಷೇಧಿತ' ಕೆಲವು ಚಲನಚಿತ್ರಗಳನ್ನು ಭಾರತ ಸರ್ಕಾರ ನಿಷೇಧಿಸುವ ಕೆಲವೇ ವಾರಗಳ ಮೊದಲು ನಡೆದ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶಿಸಲಾಯಿತು.