ಅಕ್ರಮ ವಲಸಿಗರಿಗೆ ತಡೆ: ಮ್ಯಾನ್ಮಾರ್-ಭಾರತ 1,643 ಕಿಮೀ ಗಡಿಗೆ ಮುಳ್ಳುತಂತಿ ಬೇಲಿ ನಿರ್ಮಾಣ- ಅಮಿತ್ ಶಾ

ನವದೆಹಲಿ: 1,643 ಕಿಲೋಮೀಟರ್ ಉದ್ದದ ಭಾರತ-ಮ್ಯಾನ್ಮಾರ್ ಗಡಿಗೆ ಬೇಲಿ ಹಾಕಲು ಭಾರತ ನಿರ್ಧರಿಸಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮಂಗಳವಾರ ಘೋಷಿಸಿದ್ದಾರೆ.

ಲೋಕಸಭೆಯಲ್ಲಿ ಇಂದು ಮಾತನಾಡಿದ ಕೇಂದ್ರ ಗೃಹ ಸಚಿವ ಅಮಿತ್ ಶಾ, '1,643 ಕಿಲೋಮೀಟರ್ ಉದ್ದದ ಭಾರತ-ಮ್ಯಾನ್ಮಾರ್ ಗಡಿಗೆ ಬೇಲಿ ಹಾಕಲು ಭಾರತ ನಿರ್ಧರಿಸಿದೆ. ಈ ಕ್ರಮವು ಉಭಯ ದೇಶಗಳ ಗಡಿಯಲ್ಲಿ ಪ್ರಚಲಿತದಲ್ಲಿರುವ ಮುಕ್ತ ಚಲನೆಯ ಆಡಳಿತವನ್ನು ವಾಸ್ತವಿಕವಾಗಿ ಕೊನೆಗೊಳಿಸಬಹುದು. ಅಕ್ರಮ ವಲಸಿಗರಿಗೆ ಕಡಿವಾಣ ಹಾಕಬಹುದು ಎಂದರು.

ಇದನ್ನೂ ಓದಿ: ಪರೀಕ್ಷಾ ಅಕ್ರಮಕ್ಕೆ 10 ವರ್ಷ ಜೈಲು, ಕೋಟಿ ರೂ. ದಂಡ; ಕೇಂದ್ರದಿಂದ ಮಹತ್ವದ ವಿಧೇಯಕ ಪಾಸ್

ಉಭಯ ದೇಶಗಳ ನಡುವಿನ Free Movement Regime (FMR) ಭಾರತ-ಮ್ಯಾನ್ಮಾರ್ ಗಡಿಯ ಸಮೀಪದಲ್ಲಿ ವಾಸಿಸುವ 16 ಕಿ.ಮೀ. ವ್ಯಾಪ್ತಿಯ ಜನರು ಯಾವುದೇ ದಾಖಲೆಗಳಿಲ್ಲದೆ ಪರಸ್ಪರರ ಪ್ರದೇಶಕ್ಕೆ ಮುಕ್ತವಾಗಿ ಓಡಾಡಲು ಅವಕಾಶ ನೀಡುತ್ತದೆ. ಮಿಜೋರಾಂ, ಮಣಿಪುರ, ನಾಗಾಲ್ಯಾಂಡ್ ಮತ್ತು ಅರುಣಾಚಲ ಪ್ರದೇಶದ ಮೂಲಕ ಹಾದುಹೋಗುವ 1,643-ಕಿಮೀ ಉದ್ದದ ಭಾರತ-ಮ್ಯಾನ್ಮಾರ್ ಗಡಿಯು ಪ್ರಸ್ತುತ ಎಫ್‌ಎಂಆರ್ ಹೊಂದಿದೆ. ಇದನ್ನು ಭಾರತದ ಆಕ್ಟ್ ಈಸ್ಟ್ ನೀತಿಯ ಭಾಗವಾಗಿ 2018 ರಲ್ಲಿ ಜಾರಿಗೆ ತರಲಾಯಿತು ಎಂದರು.

ಬುಡಕಟ್ಟು ಉಗ್ರಗಾಮಿಗಳು ಆಗಾಗ್ಗೆ ಗಡಿಯ ಮೂಲಕ ಭಾರತಕ್ಕೆ ಪ್ರವೇಶಿಸುತ್ತಾರೆ ಎಂದು ಆರೋಪಿಸುತ್ತಿರುವ ಇಂಫಾಲ್ ಕಣಿವೆ ಮೂಲದ ಮೀಟೈ ಗುಂಪುಗಳ ನಿರಂತರ ಬೇಡಿಕೆಯೆಂದರೆ ಗಡಿಯಲ್ಲಿ ಬೇಲಿ ಹಾಕುವುದು. ಬೇಲಿ ಇಲ್ಲದ ಅಂತರಾಷ್ಟ್ರೀಯ ಗಡಿಯ ಲಾಭ ಪಡೆದು ಭಾರತಕ್ಕೆ ಮಾದಕ ವಸ್ತುಗಳನ್ನು ಕಳ್ಳಸಾಗಣೆ ಮಾಡಲಾಗುತ್ತಿದೆ ಎಂದು ಮೀಟೈ ಗುಂಪು ಆರೋಪಿಸುತ್ತಿವೆ.

ಇದನ್ನೂ ಓದಿ: ಕೇಂದ್ರ ಸಚಿವ ಮುರುಗನ್ ವಿರುದ್ಧ ಡಿಎಂಕೆ ನಾಯಕನ ಹೇಳಿಕೆ: ಲೋಕಸಭೆಯಲ್ಲಿ ಗದ್ದಲ

ಇದೇ ವಿಚಾರವಾಗಿ ಟ್ವೀಟ್ ಮಾಡಿರುವ ಅಮಿತ್ ಶಾ, ನರೇಂದ್ರ ಮೋದಿ ಸರ್ಕಾರವು ತೂರಲಾಗದ ಗಡಿಗಳನ್ನು ನಿರ್ಮಿಸಲು ಬದ್ಧವಾಗಿದೆ. ಇಡೀ 1643 ಕಿಲೋಮೀಟರ್ ಉದ್ದದ ಭಾರತ-ಮ್ಯಾನ್ಮಾರ್ ಗಡಿಯಲ್ಲಿ ಬೇಲಿ ನಿರ್ಮಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಉತ್ತಮ ಕಣ್ಗಾವಲು ಅನುಕೂಲವಾಗುವಂತೆ, ಗಡಿಯಲ್ಲಿ ಗಸ್ತು ಟ್ರಾಕ್ ಅನ್ನು ಸಹ ಸುಸಜ್ಜಿತಗೊಳಿಸಲಾಗುವುದು" ಎಂದು ಅವರು ಟ್ವೀಟ್ ಮಾಡಿದ್ದಾರೆ.