GST Collection: ಒಂದೇ ತಿಂಗಳಲ್ಲಿ 1.72 ಲಕ್ಷ ಕೋಟಿ ರೂ ಜಿಎಸ್‌ಟಿ ಸಂಗ್ರಹ, 2ನೇ ಗರಿಷ್ಠ ಮೊತ್ತ!

ನವದೆಹಲಿ: ವರ್ಷದ ಆರಂಭಿಕ ತಿಂಗಳಲ್ಲೇ ಜಿಎಸ್ ಟಿ ಸಂಗ್ರಹ ದಾಖಲೆ ಬರೆದಿದ್ದು, ಶೇ.10.4 ರಷ್ಟು ಏರಿಕೆಯಾಗಿ 1.72 ಲಕ್ಷ ಕೋಟಿ ರೂ.ಗೆ ಹೆಚ್ಚಿದೆ ಎಂದು ಹಣಕಾಸು ಸಚಿವಾಲಯ ಬುಧವಾರ ತಿಳಿಸಿದೆ.

ಹೌದು.. ಜನವರಿಯಲ್ಲಿ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಸಂಗ್ರಹವು ವಾರ್ಷಿಕ ಆಧಾರದ ಮೇಲೆ ಶೇ.10.4 ರಷ್ಟು ಏರಿಕೆಯಾಗಿ 1.72 ಲಕ್ಷ ಕೋಟಿ ರೂ.ಗೆ ಹೆಚ್ಚಿದೆ. ಇದು ಒಂದು ತಿಂಗಳಲ್ಲಿ ಇದುವರೆಗಿನ ಎರಡನೇ ಅತಿ ದೊಡ್ಡ ಸಂಗ್ರಹವಾಗಿದ್ದು, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಅಂದರೆ 2023-24ರಲ್ಲಿ 1.70 ಲಕ್ಷ ಕೋಟಿ ಅಥವಾ ಅದಕ್ಕಿಂತ ಹೆಚ್ಚು ಸಂಗ್ರಹವಾದ ಮೂರನೇ ತಿಂಗಳಾಗಿದೆ. 2023ರ ಏಪ್ರಿಲ್‌ನಲ್ಲಿ ಅತ್ಯಧಿಕ ಅಂದರೆ 1.87 ಲಕ್ಷ ಕೋಟಿ ರೂ.ಗಳಷ್ಟು ಮಾಸಿಕ ಜಿಎಸ್‌ಟಿ ಸಂಗ್ರಹವಾಗಿತ್ತು.

ಇದನ್ನೂ ಓದಿ: ಬಜೆಟ್ 2024: ವಿತ್ತ ಸಚಿವರ ಮುಂದಿದೆ 'ಭಾರತೀಯ ಉದ್ಯೋಗ'ಗಳ ಸಂದಿಗ್ಧತೆ!

ಹಣಕಾಸು ಸಚಿವಾಲಯವು, “ಜನವರಿ 2024 ರಲ್ಲಿ (31-01-2024 ರಂದು ಸಂಜೆ 5 ಗಂಟೆಯವರೆಗೆ) ಒಟ್ಟು ಜಿಎಸ್‌ಟಿ ಆದಾಯವು 1,72,129 ಕೋಟಿ ರೂಪಾಯಿಯಾಗಿದೆ ಎಂದು ತಿಳಿಸಿದೆ. ಇದು ಜನವರಿ 2023 ರಲ್ಲಿ ಸಂಗ್ರಹಿಸಲಾದ 1,55,922 ಕೋಟಿ ರೂಪಾಯಿಗಿಂತ 10.4 ಶೇಕಡಾ ಹೆಚ್ಚು. ಪ್ರಸಕ್ತ ಹಣಕಾಸು ವರ್ಷದಲ್ಲಿ, ಏಪ್ರಿಲ್ 2023 ರಿಂದ ಜನವರಿ 2024 ರವರೆಗೆ, ಒಟ್ಟು ಒಟ್ಟು GST ಸಂಗ್ರಹವು ವಾರ್ಷಿಕ ಆಧಾರದ ಮೇಲೆ 11.6 ಪ್ರತಿಶತದಷ್ಟು ಹೆಚ್ಚಾಗಿದೆ.

ಈ 10 ತಿಂಗಳಲ್ಲಿ ಈ ಅಂಕಿ ಅಂಶವು ಒಂದು ವರ್ಷದ ಹಿಂದೆ 14.96 ಲಕ್ಷ ಕೋಟಿ ರೂಪಾಯಿಗಳಿಂದ 16.69 ಲಕ್ಷ ಕೋಟಿ ರೂಪಾಯಿಗಳಿಗೆ ಹೆಚ್ಚಾಗಿದೆ. ಇದು 12ನೇ ತಿಂಗಳಿನಲ್ಲಿ 1 ಲಕ್ಷ ಕೋಟಿಗೂ ಅಧಿಕ ಜಿಎಸ್‌ಟಿ ಸಂಗ್ರಹವಾಗಿದ್ದು, 2023 ರ ಏಪ್ರಿಲ್‌ನಲ್ಲಿ 1.87 ಲಕ್ಷ ಕೋಟಿ ರೂ.ಗಳ ಮಾಸಿಕ ಜಿಎಸ್‌ಟಿ ಸಂಗ್ರಹವು ಅತ್ಯಧಿಕವಾಗಿದೆ . ಜನವರಿಯಲ್ಲಿ ಎಸ್‌ಜಿಎಸ್‌ಟಿ 39,476 ಕೋಟಿ, ಐಜಿಎಸ್‌ಟಿ 89,989 ಕೋಟಿ ಮತ್ತು ಸೆಸ್ 10,701 ಕೋಟಿ ಸಂಗ್ರಹವಾಗಿದೆ.

ಇದನ್ನೂ ಓದಿ: ನಿರುದ್ಯೋಗ ಕುರಿತ ಅಂಕಿಅಂಶಗಳನ್ನು ಕೇಂದ್ರ ಸರ್ಕಾರ ಮರೆಮಾಚುತ್ತಿದೆ: ರಾಜಕೀಯ ಅರ್ಥಶಾಸ್ತ್ರಜ್ಞ ಪರಕಾಲ ಪ್ರಭಾಕರ್

ಬಜೆಟ್‌ಗೂ ಮುನ್ನ ಬಂದಿರುವ ಈ ಅಂಕಿ ಅಂಶಗಳು ಸರ್ಕಾರದ ನೈತಿಕ ಸ್ಥೈರ್ಯ ಹೆಚ್ಚಿಸಬಹುದು. ತೆರಿಗೆ ವಂಚನೆ ಪ್ರಕರಣಗಳ ತನಿಖೆಯಲ್ಲಿ ಜಿಎಸ್‌ಟಿ ಅಧಿಕಾರಿಗಳು ನಿರ್ಲಕ್ಷ್ಯ ವಹಿಸುತ್ತಿದ್ದಾರೆ ಎಂಬ ಆರೋಪಗಳೂ ಕೂಡ ಕೇಳಿಬರುತ್ತಿವೆ.