Gaganyaan ಗಗನಯಾತ್ರಿ ಪ್ರಶಾಂತ್ ನಾಯರ್ ನನ್ನ ಪತಿ: ಮಲಯಾಳಂ ನಟಿ ಲೀನಾ

ತಿರುವನಂತಪುರ: ಪ್ರಧಾನಿ ನರೇಂದ್ರ ಮೋದಿ ಅವರು ನಿನ್ನೆ ಮಂಗಳವಾರ ತಿರುವನಂತಪುರದಲ್ಲಿ ಗಗನಯಾನ ಮಿಷನ್‌ಗಾಗಿ ತರಬೇತಿ ಪಡೆಯುತ್ತಿರುವ ನಾಲ್ವರು ಗಗನಯಾತ್ರಿಗಳ ಹೆಸರು ಬಹಿರಂಗಪಡಿಸಿ ಅವರಿಗೆ ವಿಂಗ್ಸ್ ಹಸ್ತಾಂತರಿಸಿ ಶುಭ ಕೋರಿದರು. ನಾಲ್ವರು ಗಗನಯಾತ್ರಿಗಳಲ್ಲಿ ಒಬ್ಬರಾದ ಭಾರತೀಯ ವಾಯುಪಡೆಯ ಫೈಟರ್ ಪೈಲಟ್ ಪ್ರಶಾಂತ್ ಬಾಲಕೃಷ್ಣನ್ ನಾಯರ್ ಅವರನ್ನು ತಾನು ವಿವಾಹವಾಗಿರುವುದಾಗಿ ಮಲಯಾಳಂ ನಟಿ ಲೀನಾ ಬಹಿರಂಗಪಡಿಸಿಕೊಂಡಿದ್ದಾರೆ.

ಸ್ನೇಹಮ್ ಚಿತ್ರದ ನಟಿ ಲೀನಾ ಅವರು ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ತಮ್ಮ ಮತ್ತು ನಾಯರ್ ಇಸ್ರೋ ಅಧ್ಯಕ್ಷ ಎಸ್ ಸೋಮನಾಥ್ ಅವರೊಂದಿಗಿರುವ ಫೋಟೋವನ್ನು ಹಂಚಿಕೊಂಡಿದ್ದಾರೆ.

ನಾಲ್ವರು ಗಗನ್ಯಾನ್ ಗಗನಯಾತ್ರಿಗಳು ರಷ್ಯಾದ ಕೇಂದ್ರದಲ್ಲಿ ತರಬೇತಿ ಪಡೆದಿದ್ದಾರೆ. ನಟಿ ಲೀನಾ ಅವರು, ಜನವರಿ 17 ರಂದು ಮದುವೆಯಾಗಿರುವುದಾಗಿ ತಿಳಿಸಿದ್ದಾರೆ. ನಾಯರ್ ಅವರಿಗೆ ಪ್ರಧಾನಿಯವರು ಗಗನಯಾತ್ರಿ ವಿಂಗ್ಸ್ ನ್ನು ನೀಡಿರುವುದು "ಹೆಮ್ಮೆಯ ಐತಿಹಾಸಿಕ ಕ್ಷಣ" ಎಂದು ಲೀನಾ ಬರೆದುಕೊಂಡಿದ್ದಾರೆ.

"ಇಂದು, 27 ಫೆಬ್ರವರಿ 2024, ನಮ್ಮ ಪ್ರಧಾನಿ ಮೋದಿ ಅವರು ಭಾರತೀಯ ವಾಯುಪಡೆಯ ಫೈಟರ್ ಪೈಲಟ್, ಗ್ರೂಪ್ ಕ್ಯಾಪ್ಟನ್ ಪ್ರಶಾಂತ್ ಬಾಲಕೃಷ್ಣನ್ ನಾಯರ್ ಅವರಿಗೆ ಮೊದಲ ಭಾರತೀಯ ಗಗನಯಾತ್ರಿ ವಿಂಗ್ಸ್ ಪ್ರದಾನ ಮಾಡಿದರು. ಇದು ನಮ್ಮ ದೇಶಕ್ಕೆ, ನಮ್ಮ ಕೇರಳ ರಾಜ್ಯಕ್ಕೆ ಮತ್ತು ವೈಯಕ್ತಿಕವಾಗಿ ನನಗೆ ಹೆಮ್ಮೆಯ ಐತಿಹಾಸಿಕ ಕ್ಷಣವಾಗಿದೆ.

ನಾನು ಪ್ರಶಾಂತ್ ನಾಯರ್ ಅವರನ್ನು ಜನವರಿ 17ರಂದು ಮದುವೆಯಾಗಿದ್ದೇನೆ ಎಂದು ತಿಳಿಸಿದ್ದಾರೆ. ಕೇರಳದ ಪಾಲಕ್ಕಾಡ್ ಜಿಲ್ಲೆಯ ನೆನ್ಮಾರಾ ಮೂಲದ ನಾಯರ್ ಅವರ ಕುಟುಂಬ ಈ ಬಗ್ಗೆ ಪ್ರತಿಕ್ರಿಯೆಗೆ ಸಿಕ್ಕಿಲ್ಲ.