ಹರ್ಯಾಣ ವಿಧಾನಸಭೆ ಚುನಾವಣೆ ದಿನಾಂಕ ಮುಂದೂಡುವಂತೆ ಆಯೋಗಕ್ಕೆ ಬಿಜೆಪಿ ಮನವಿ

ಹರ್ಯಾಣ: ಹರ್ಯಾಣ ವಿಧಾನಸಭೆ ಚುನಾವಣೆ ದಿನಾಂಕ ಮುಂದೂಡುವಂತೆ ಬಿಜೆಪಿ ಘಟಕ ಚುನಾವಣಾ ಆಯೋಗಕ್ಕೆ ಮನವಿ ಮಾಡಿದೆ.

ಅ.1 ರಂದು ಹರ್ಯಾಣ ವಿಧಾನಸಭಾ ಚುನಾವಣೆಗೆ ಮತದಾನವನ್ನು ನಿಗದಿಪಡಿಸಲಾಗಿದೆ. ಚುನಾವಣೆ ದಿನ ಮತ್ತು ನಂತರದ ದಿನದಂದು ರಜೆ ಇರುವುದರಿಂದ ಮತದಾನದ ಪ್ರಮಾಣ ಕಡಿಮೆಯಾಗಬಹುದು ಎಂಬ ಕಾರಣ ನೀಡಿ ಬಿಜೆಪಿ ಘಟಕ ಆಯೋಗಕ್ಕೆ ಮತದಾನದ ದಿನವನ್ನು ಮುಂದೂಡುವಂತೆ ಮನವಿ ಮಾಡಿದೆ.

ಮನವಿ ಪತ್ರವನ್ನು ರಾಜ್ಯ ಘಟಕದ ಮುಖ್ಯಸ್ಥರು ಚುನಾವಣಾ ಆಯೋಗಕ್ಕೆ ಕಳುಹಿಸಿದ್ದಾರೆ ಎಂದು ರಾಜ್ಯ ಬಿಜೆಪಿ ನಾಯಕರೊಬ್ಬರು ಹೇಳಿದ್ದು, ಹರಿಯಾಣದ ಮುಖ್ಯ ಚುನಾವಣಾ ಅಧಿಕಾರಿ ಪಂಕಜ್ ಅಗರ್ವಾಲ್, ಆಯೋಗ ಇ-ಮೇಲ್ ಮೂಲಕ ಶುಕ್ರವಾರ ಸಂವಹನದ ಪ್ರತಿಯನ್ನು ಸ್ವೀಕರಿಸಿದೆ ಎಂದು ಖಚಿತಪಡಿಸಿದ್ದಾರೆ.

ಬಿಜೆಪಿಯ ರಾಜ್ಯ ಚುನಾವಣಾ ನಿರ್ವಹಣಾ ಸಮಿತಿಯ ಸದಸ್ಯ ವರೀಂದರ್ ಗಾರ್ಗ್ ಮಾತನಾಡಿ, "ಅಕ್ಟೋಬರ್ 1 ರ ವಿಧಾನಸಭೆ ಚುನಾವಣೆ ದಿನಾಂಕದ ಮೊದಲು ವಾರಾಂತ್ಯದಲ್ಲಿ ರಜೆ ನೀಡಲಾಗುತ್ತದೆ ಮತ್ತು ನಂತರ ಕೆಲವು ರಜಾದಿನಗಳು ಮತದಾನದ ಶೇಕಡಾವಾರು ಪ್ರಮಾಣದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು ಎಂದು ನಾವು ಮನವಿ ಮಾಡಿಕೊಡಲು ಯತ್ನಿಸಿದ್ದೇವೆ. ರಜಾದಿನಗಳ ನಂತರ ದೀರ್ಘ ವಾರಾಂತ್ಯಗಳಲ್ಲಿ, ಜನರು ರಜೆಯ ಮೇಲೆ ಹೋಗುತ್ತಾರೆ" ಎಂದು ಹೇಳಿದ್ದಾರೆ.

"ಶನಿವಾರ ಸೆಪ್ಟೆಂಬರ್ 28 ಹಲವರಿಗೆ ರಜೆ ಇದೆ, ಭಾನುವಾರ ಮಾಮೂಲಿ ರಜಾದಿನ, ಅಕ್ಟೋಬರ್ 1 ರಂದು ರಾಜ್ಯದಲ್ಲಿ ಚುನಾವಣಾ ರಜೆಯಾಗಿದೆ. ಅಕ್ಟೋಬರ್ 2 ರಂದು ಗಾಂಧಿ ಜಯಂತಿಯ ನಂತರ ರಜಾದಿನವಾಗಿದೆ ಮತ್ತು ಅಕ್ಟೋಬರ್ 3 ರಂದೂ ಮಹಾರಾಜ ಅಗ್ರಸೇನ್ ಜಯಂತಿಯ ಕಾರಣ ರಜೆ ಇದೆ ಎಂದು ಬಿಜೆಪಿ ಹೇಳಿದೆ.

ಅಕ್ಟೋಬರ್ 1 ರಂದು ಹರಿಯಾಣದಲ್ಲಿ ಒಂದೇ ಹಂತದಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದೆ ಮತ್ತು ಅಕ್ಟೋಬರ್ 4 ರಂದು ಫಲಿತಾಂಶಗಳನ್ನು ಪ್ರಕಟಿಸಲಾಗುವುದು ಎಂದು ಚುನಾವಣಾ ಆಯೋಗ ಆಗಸ್ಟ್ 16 ರಂದು ಘೋಷಿಸಿತ್ತು.