ವುಹಾನ್ ಲ್ಯಾಬ್ ನಲ್ಲಿ 3 ಜೀವಂತ ಕೊರೋನಾ ವೈರಸ್ ಪ್ರಭೇದ, ಆದರೆ ಕೋವಿಡ್-19 ಗೆ ಹೊಂದಾಣಿಕೆಯಾಗುತ್ತಿಲ್ಲ!

ಬೀಜಿಂಗ್: ಚೀನಾದ ವುಹಾನ್ ಲ್ಯಾಬ್ ಮನುಕುಲಕ್ಕೆ ದುಸ್ವಪ್ನವಾಗಿ ಕಾಡುತ್ತಿದ್ದು, ಕೊರೋನಾ ವೈರಸ್ ಗೆ ಸಂಬಂಧಿಸಿದಂತೆ ಆಗಾಗ್ಗೆ ಬೆಚ್ಚಿ ಬೀಳಿಸುವ ಮಾಹಿತಿಯನ್ನು ಹೊರಹಾಕುತ್ತಿದೆ. 

ಇತ್ತೀಚಿನ ವರದಿಯ ಪ್ರಕಾರ ವುಹಾನ್ ಲ್ಯಾಬ್ ನಲ್ಲಿ ಕೊರೋನಾ ವೈರಸ್ ನ 3 ಜೀವಂತ ವೈರಸ್ ಪ್ರಭೇದಗಳು ಪತ್ತೆಯಾಗಿದೆ. ಆದರೆ ಈ ಮೂರೂ ಪ್ರಭೇದದ ವೈರಾಣುಗಳು ಕೋವಿಡ್-19 ರೋಗ ಉಂಟುಮಾಡುವ ವೈರಾಣುಗಳಿಗೆ ಹೊಂದಾಣಿಕೆಯಾಗುತ್ತಿಲ್ಲ. 

ಇದು ಹೊಸ ಮಾಹಿತಿಯಾಗಿದ್ದು, ಅಲ್ಲಿನ ನಿರ್ದೇಶಕರೇ ಇದನ್ನು ಬಹಿರಂಗಪಡಿಸಿದ್ದಾರೆ. ಚೀನಾದ ಸರ್ಕಾರಿ ಸ್ವಾಮ್ಯದ ವಾಹಿನಿಗೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡಿರುವ ವುಹಾನ್ ಲ್ಯಾಬ್ ನ ನಿರ್ದೇಶಕ ವಾಂಗ್ ಯಾನ್ಯಿ, ಸಾರ್ಸ್ ಸಿಒವಿ-2 ತಮ್ಮ ಲ್ಯಾಬ್ ನಿಂದಲೇ ಸೋರಿಕೆಯಾಗಿದೆ ಎಂಬುದು ಕಟ್ಟು ಕಥೆ ಎಂದು ಹೇಳಿದ್ದಾರೆ.    

ಈ ವೈರಸ್ ಪ್ರಾರಂಭವಾಗಿದ್ದು ವನ್ಯಜೀವಿಗಳಿಂದ ಎಂಬುದು ಅಂತಾರಾಷ್ಟ್ರೀಯ ಸಮುದಾಯದ ಅಭಿಪ್ರಾಯವಾಗಿದೆ. ಈ ವೈರಾಣುಗಳ ಬಗ್ಗೆ ಉತ್ತರ ಕಂಡುಕೊಳ್ಳಲು ಜಾಗತಿಕ ಮಟ್ಟದಲ್ಲಿ ಸಹಕಾರ ಅತ್ಯಗತ್ಯ ಎಂದು ಹೇಳಿದ್ದಾರೆ.  

ಈಗ ನಮ್ಮಲ್ಲಿ ಜೀವಂತ ವೈರಾಣುಗಳ 3 ಪ್ರಭೇದಗಳಿವೆ ಈ ಪೈಕಿ ಒಂದರಲ್ಲಿ ಸಾರ್ಸ್ ವೈರಸ್ ಗೆ ಶೇ.96 ರಷ್ಟು ಸಾಮ್ಯತೆ ಇದೆ ಆದರೆ ಕೋವಿಡ್-19 ಗೆ ಸಾಮ್ಯತೆಗಳು ಕಡಿಮೆ ಇವೆ ಎಂದು ವಾಂಗ್ ಯಾನ್ಯಿ ತಿಳಿಸಿದ್ದಾರೆ.