"ಮಾಹಿ ರೀತಿ ಮಾಡಿ": ಮಹೇಂದ್ರ ಸಿಂಗ್ ಧೋನಿ ಜನ್ಮದಿನಾಚರಣೆಗೆ ಮುಂಬೈ ಪೊಲೀಸರಿಂದ ವಿನೂತನ ರೀತಿಯ ಶುಭಾಶಯ 

ನವದೆಹಲಿ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ, ವಿಕೆಟ್ ಕೀಪರ್ ಮಹೇಂದ್ರ ಸಿಂಗ್ ಧೋನಿಗೆ ಇಂದು 39 ನೇ ಜನ್ಮದಿನದ ಸಂಭ್ರಮ. ಈ ನಡುವೆ ಇದನ್ನೆ ಕೊರೋನಾ ಕುರಿತ ಜನಜಾಗೃತಿಗೆ ವಿಶಿಷ್ಟವಾಗಿ ಬಳಸಿಕೊಂಡಿರುವ ಮುಂಬೈ ಪೊಲೀಸರು ಮಹೇಂದ್ರ ಸಿಂಗ್ ಧೋನಿಗೆ ವಿನೂತನ ಶೈಲಿಯ ಶುಭಾಶಯ ಕೋರಿದ್ದಾರೆ.

ಮಹೇಂದ್ರ ಸಿಂಗ್ ಧೋನಿ ಹೆಸರಿನಲ್ಲಿರುವ ಪ್ರಾರಂಭಿಕ ಅಕ್ಷರಗಳನ್ನು ಬಳಸಿಕೊಂಡಿರುವ ಮುಂಬೈ ಪೊಲೀಸರು ಕೊರೋನಾ ತಡೆಗೆ ಮುನ್ನೆಚ್ಚರಿಕಾ ಕ್ರಮ MSD-Maintain Social Distancing ಎಂದು ಬರೆದಿದ್ದಾರೆ.

ಮುಂಬೈ ಪೊಲೀಸರ ಟ್ವೀಟ್ ಹ್ಯಾಂಡಲ್ ನಲ್ಲಿ ಮಾಹಿ ರೀತಿ ಮಾಡಿ- ನಾಟ್ ಔಟ್ ಆಗಿರಿ, ಕೂಲ್ ಆಗಿರಿ, ಕೊರೋನಾ ವೈರಸ್ ನ್ನು ಸ್ಟಂಪ್ ಮಾಡಿ ( "Do it the 'Mahi Way' - Stay 'Not Out', Stay Cool & Stump #coronavirus.)  ಎಂದು ಬರೆಯಲಾಗಿದೆ.

ಜನ್ಮದಿನಾಚರಣೆಯ ಹಿನ್ನೆಲೆಯಲ್ಲಿ ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಧೋನಿಗೆ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದ್ದು, ವೆಸ್ಟ್ ಇಂಡೀಸ್ ನ ಡ್ವೇನ್ ಬ್ರಾವೋ ಧೋನಿಗಾಗಿ ಅವರ ವೃತ್ತಿ ಜೀವನದ ಯಶಸ್ಸುಗಳನ್ನು ತಿಳಿಸುವ ಹೆಲಿಕಾಫ್ಟರ್ 7 ಹಾಡನ್ನು ಡೆಡಿಕೇಟ್ ಮಾಡಿ ಶುಭಾಶಯ ಕೋರಿದ್ದಾರೆ.