ತ್ರಿಪುರಾದ ಮುಂದಿನ ಮುಖ್ಯಮಂತ್ರಿ ಬಿಪ್ಲಾಬ್ ಕುಮಾರ್ ದೆಬ್

ಅಗರ್ತಲ: ತ್ರಿಪುರಾ ಬಿಜೆಪಿ ಅಧ್ಯಕ್ಷ ಮತ್ತು ಹೊಸದಾಗಿ ಆಯ್ಕೆಗೊಂಡ ಶಾಸಕ ಬಿಪ್ಲಾಬ್ ಕುಮಾರ್ ದೆಬ್ ಪಕ್ಷದ ಶಾಸಕಾಂಗ ಪಕ್ಷದ ನಾಯಕರಾಗಿ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ತ್ರಿಪುರಾ ಮುಖ್ಯಮಂತ್ರಿಯಾಗಿ ನೇಮಕಗೊಳ್ಳಲಿದ್ದಾರೆ.

ಈ ವಿಷಯವನ್ನು ಕೇಂದ್ರ ಸಚಿವ ನಿತಿನ್ ಗಡ್ಕರಿ ತಿಳಿಸಿದ್ದಾರೆ.

ಇಂದು ನಡೆದ ಸಭೆಯಲ್ಲಿ ಬಿಜೆಪಿ ಶಾಸಕ ಸುದೀಪ್ ರಾಯ್ ಬುರ್ಮನ್ ಬಿಪ್ಲಾಬ್ ಅವರ ಹೆಸರನ್ನು ಸೂಚಿಸಿದರು. ಬುಡಕಟ್ಟು ಜನಾಂಗದ ಶಾಸಕರು ಮುಖ್ಯಮಂತ್ರಿಯಾಗಬೇಕೆಂದು ಮೈತ್ರಿಪಕ್ಷ ಇಂಡಿಜಿನಸ್ ಪೀಪಲ್ಸ್ ಫ್ರಂಟ್ ಆಫ್ (ಐಪಿಎಫ್ ಟಿ) ತ್ರಿಪುರಾ ಒತ್ತಾಯಿಸಿತ್ತು.
ಬಿಜೆಪಿ ಶಾಸಕ ಜಿಶ್ನು ದೆಬ್ಬರ್ಮ ಉಪ ಮುಖ್ಯಮಂತ್ರಿಯಾಗಿ ನೇಮಕಗೊಂಡಿದ್ದಾರೆ.

ರಾಜ್ಯಪಾಲ ತತಾಗತ್ ರಾಯ್ ಮುಂದೆ ಡೆಬ್ ಸರ್ಕಾರ ರಚನೆಗೆ ಹಕ್ಕು ಮಂಡಿಸಲಿದ್ದಾರೆ.  ಐಪಿಎಫ್ ಟಿಯ ಯಾವೊಬ್ಬ ಸದಸ್ಯರೂ ಸಭೆಯಲ್ಲಿ ಭಾಗಿಯಾಗಿರಲಿಲ್ಲ. ಸರ್ಕಾರದಲ್ಲಿ ಪ್ರಮುಖ ಹುದ್ದೆ ನೀಡದಿದ್ದರೆ ಸರ್ಕಾರ ರಚನೆಯಲ್ಲಿ ಮೈತ್ರಿ ಮಾಡಿಕೊಳ್ಳುವುದಿಲ್ಲ ಎಂದು ಐಪಿಎಫ್ ಟಿ ನಿನ್ನೆ ಬೆದರಿಕೆಯೊಡ್ಡಿತ್ತು. ತಮ್ಮ ಬೇಡಿಕೆಯನ್ನು ಈಡೇರಿಸದಿದ್ದರೆ ಬಾಹ್ಯ ಬೆಂಬಲ ನೀಡುವುದಾಗಿ ಹೇಳಿತ್ತು.

60 ಸದಸ್ಯ ಬಲದ ತ್ರಿಪುರಾ ವಿಧಾನಸಭೆಯಲ್ಲಿ ಬಿಜೆಪಿ ಮತ್ತು ಐಪಿಎಫ್ ಟಿ  43 ಸೀಟುಗಳನ್ನು ಹೊಂದಿದೆ. ಬಿಜೆಪಿ 35 ಮತ್ತು ಐಪಿಎಫ್ ಟಿ 8 ಸ್ಥಾನಗಳನ್ನು ಹೊಂದಿದೆ. ಫೆಬ್ರವರಿ 18ರಂದು 60ರಲ್ಲಿ 59 ಸ್ಥಾನಗಳಿಗೆ ಚುನಾವಣೆ ನಡೆದಿತ್ತು.