ಭಾರತದ ಆರ್ಥಿಕತೆಯ ಟೈಯರ್'ಗಳು ಪಂಕ್ಚರ್ ಆಗಿವೆ: ಮಾಜಿ ವಿತ್ತ ಸಚಿವ ಪಿ ಚಿದಂಬರಂ

ನವದೆಹಲಿ; ಕೇಂದ್ರದ ಆಡಳಿತಾರೂಢ ಎನ್'ಡಿಎ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿರುವ ಕಾಂಗ್ರೆಸ್ ನಾಯಕ ಹಾಗೂ ಮಾಜಿ ವಿತ್ತ ಸಚಿವ ಪಿ.ಚಿದಂಬರಂ ಅವರು, ಭಾರತದ ಆರ್ಥಿಕತೆಯ ಟೈಯರ್'ಗಳು ಪಂಕ್ಚರ್ ಆಗಿವೆ ಎಂದು ಸೋಮವಾರ ಹೇಳಿದ್ದಾರೆ. 

ರಾಜಧಾನಿ ನವದೆಹಲಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿರುವ ಅವರು, ಪ್ರಧಾನಿ ಮೋದಿ ನೇತೃತ್ವದ ಎನ್'ಡಿಎ ಸರ್ಕಾರದ ಕೆಟ್ಟ ನೀತಿಗಳಿಂದಾಗಿ ನಾಲ್ಕು ಚಕ್ರಗಳ ಮೂರು ವಾಹನಗಳ ಟೈಯರ್'ಗಳು ಪಂಕ್ಚರ್ ಆಗಿವೆ ಎಂದು ಹೇಳಿದ್ದಾರೆ. 

ಕೇಂದ್ರದ ಕೆಟ್ಟ ನೀತಿಗಳಿಂದಾಗಿ ಇಂದು ದೇಶದ ರೈತ ವಲಯ ಸೇರಿದಂತೆ ಹಲವು ವಲಯಗಳಲ್ಲಿ ಸಾಕಷ್ಟು ಸಮಸ್ಯೆಗಳುಂಟಾಗಿವೆ. ಒಂದೆಡೆ ರೈತರು ತಾವು ಬೆಳೆದ ಬೆಳೆಗಳಿಗೆ ಫಲ ಸಿಗದೆ ಸಂಕಷ್ಟವನ್ನು ಅನುಭವಿಸುತ್ತಿದ್ದರೆ, ಮತ್ತೊಂದೆಡೆ ಯುವಕರು ನಿರುದ್ಯೋಗ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. 

ಭಾರತದ ಆರ್ಥಿಕತೆಯನ್ನು ಮುನ್ನಡೆಸುವ ನಾಲ್ಕು ಚಕ್ರಗಳ ಮೂರು ವಾಹನಗಳ ಚಕ್ರಗಳು ಹಾಳಾಗಿವೆ. ಮೊದಲನೆಯ ವಾಹನ ರಫ್ತಾಗಿದೆ. ಕಳೆದ ನಾಲ್ಕು ವರ್ಷಗಳಿಂದ ರಫ್ತು ಬೆಳವಣಿಗೆಗಳು ಋಣಾತ್ಮಕವಾಗಿದೆ. ಎರಡನೆಯ ವಾಹನ ಖಾಸಗಿ ಹೂಡಿಕೆ. ದೇಶದಲ್ಲಿ ಖಾಸಗಿ ಹೂಡಿಕೆ ಸಾವಿನಂಚಿನಲ್ಲಿದೆ. ಕಳೆದ ಮೂರು ವರ್ಷಗಳಿಂದ ಸಮಗ್ರ ಸ್ಥಿರ ಬಂಡವಾಳ ಶೇ.28.5ರಲ್ಲಿಯೇ ನಿಂತಿದೆ. ಮೂರನೇಯ ವಾಹನ ಖಾಸಗಿ ಬಳಕೆಯಾಗಿದ್ದು, ಕೆಲ ತಿಂಗಳ ಹಿಂದೆ ಏರಿಕೆಯಾಗಿದ್ದರೂ, ಅಂತಹ ದೊಡ್ಡ ಬೆಳವಣಿಗೆಗಳೇನು ಕಂಡು ಬಂದಿಲ್ಲ. 

ಏರಿಳಿತವನ್ನು ತೋರಿಸುತ್ತಿರುವ ಏಕೈಕ ಚಕ್ರವೆಂದರೆ ಅದು ಸರ್ಕಾರ ವೆಚ್ಚ. ಆದರೆ, ಇಲ್ಲಿಯೂ ಸರ್ಕಾರದ ಆಯ್ಕೆಗಳು ಸೀಮಿತವಾಗಿವೆ. ಆದರೆ, ಪ್ರಸ್ತುತ ಸರ್ಕಾರದ ಖಾತೆಗಳಲ್ಲಿಯೂ ಹಣದ ಕೊರೆತೆಯಿದ್ದು, ಒತ್ತಡಗಳು ಹೆಚ್ಚಾಗಿವೆ ಎಂದು ತಿಳಿಸಿದ್ದಾರೆ.