ಅಭಿಮಾನಿಗೆ ಮತ್ತೆ ಕಪಾಳ ಮೋಕ್ಷ ಮಾಡಿ ಸುದ್ದಿಗೆ ಗ್ರಾಸವಾದ ಬಾಲಯ್ಯ!

ಹಿಂದೂಪುರ: ಟಾಲಿವುಡ್ ನ ಖ್ಯಾತ ನಟ ಹಾಗೂ ಟಿಡಿಪಿ ಶಾಸಕರಾದ ಬಾಲಕೃಷ್ಣ ಅವರು ಮತ್ತೆ ಅಭಿಮಾನಿಯೊಬ್ಬರಿಗೆ ಕಪಾಳ ಮೋಕ್ಷ ಮಾಡುವ ಮೂಲಕ ಸುದ್ದಿಗೆ ಗ್ರಾಸವಾಗಿದ್ದಾರೆ.

ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯ ಹಿಂದೂಪುರ ವಿಧಾನಸಭಾ ಕ್ಷೇತ್ರಕ್ಕೆ ಚುನಾವಣೆ ನಿಮಿತ್ತ ನಟ ಬಾಲಕೃಷ್ಣ ಪ್ರಚಾರಕ್ಕಾಗಿ ಆಗಮಿಸಿದ್ದರು. ಈ ವೇಳೆ ಮನೆ ಮನೆ ಪ್ರಚಾರ ಕೈಗೊಂಡಿದ್ದ ಅವರ ಪಕ್ಷದ ಭಿತ್ತಿ ಪತ್ರಗಳನ್ನು  ಜನರಿಗೆ ನೀಡುತ್ತಿದ್ದರು. ನಟ ಬಾಲಕೃಷ್ಣ ಬಂದ ಕಾರಣ ಜನರೂ ಕೂಡ ಸಾಕಷ್ಟು ಸಂಖ್ಯೆಯಲ್ಲಿ ಸೇರಿದ್ದರು. ಈ ವೇಳೆ ನೂಕುನುಗ್ಗಲಾಗಿ ಓರ್ವ ವ್ಯಕ್ತಿ ಬಾಲಯ್ಯ ಅವರ ಭದ್ರತಾ ಸಿಬ್ಬಂದಿಯನ್ನು ಮುಂದಕ್ಕೆ ತಳ್ಳಿದ್ದಾನೆ. ಇಷ್ಟಕ್ಕೇ  ಕೋಪಗೊಂಡ ಬಾಲಕೃಷ್ಣ ಕೂಡಲೇ ತಳ್ಳಿದ ವ್ಯಕ್ತಿಯ ಕಪಾಳಕ್ಕೆ ಹೊಡೆದು ಹಿಂದೆ ನಿಲ್ಲುವಂತೆ ಗದರಿದ್ದಾರೆ.

ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಈ ಹಿಂದೆಯೂ ಕೂಡ ಅಭಿಮಾನಿಯೊಬ್ಬರಿಗೆ ನಟ ಬಾಲಕೃಷ್ಣ ಕಪಾಳ ಮೋಕ್ಷ ಮಾಡಿ ಸುದ್ದಿಗೆ ಗ್ರಾಸವಾಗಿದ್ದರು. ನಂದ್ಯಾಲ್ ಕ್ಷೇತ್ರ ಉಪ ಚುನಾವಣೆ ನಿಮಿತ್ತ ಪ್ರಚಾರ ಕೈಗೊಂಡಿದ್ದ ಬಾಲಕೃಷ್ಣ ತಮ್ಮೊಂದಿಗೆ ಅಭಿಮಾನಿಯೊಬ್ಬ ಸೆಲ್ಫಿ  ತೆಗೆದುಕೊಳ್ಳಲು ಮುಂದಾದಾಗ ಆತನ ಕಪಾಳಕ್ಕೆ ಹೊಡೆದಿದ್ದರು.