ಇರಾನ್ ಮೇಲೆ ಯುಎಸ್ ನಿರ್ಬಂಧದ ಭೀತಿ: ಚಾಬಹಾರ್ ಬಂದರು ಅಭಿವೃದ್ಧಿ ಮೇಲೆ ಕಪ್ಪು ಛಾಯೆ?

ನವದೆಹಲಿ: ಅಮೆರಿಕಾ ಇರಾನ್ ಮೇಲೆ ನಿರ್ಬಂಧ ವಿಧಿಸುವ ಭೀತಿ ಎದುರಾಗಿದ್ದು, ಭಾರತ-ಇರಾನ್ ನ ಮಹತ್ವಾಕಾಂಕ್ಷಿ ಯೋಜನೆಯಾದ ಚಾಬಹಾರ್ ಬಂದರು ಅಭಿವೃದ್ಧಿಯ ಯೋಜನೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. 

ಅಮೆರಿಕಾದ ನೀತಿಯಿಂದಾಗಿ ಬಂದರು ಅಭಿವೃದ್ಧಿಗೆ ಅಗತ್ಯವಿರುವ ಉಪಕರಣಗಳನ್ನು ಪೂರೈಕೆ ಮಾಡಲು ಉತ್ಪಾದಕರು ಹಿಂದೇಟು ಹಾಕುತ್ತಿದ್ದು, ಬಂದರು ಅಭಿವೃದ್ಧಿ ಯೋಜನೆಯ ಮೇಲೆ ಕರಿ ಛಾಯೆ ಆವರಿಸುವ ಪರಿಸ್ಥಿತಿ ಎದುರಾಗಿದೆ. ಪಾಕಿಸ್ತಾನ್ನವನ್ನು ಹೊರಗಿಟ್ಟು ಕೇಂದ್ರ ಏಷ್ಯಾದೊಂದಿಗೆ ಸಂಪರ್ಕ ಸಾಧಿಸುವ ಬಂದರು ಅಭಿವೃದ್ಧಿ ಯೋಜನೆಯನ್ನು ಅಫ್ಘಾನಿಸ್ಥಾನ, ಇರಾನ್, ಭಾರತ ಕೈಗೊಂಡಿದ್ದವು. ಆದರೆ ಅಮೆರಿಕಾದ ನೂತನ ಅಧ್ಯಕ್ಷರಾಗಿ ಡೊನಾಲ್ಡ್ ಟ್ರಂಪ್ ಅಧಿಕಾರ ವಹಿಸಿಕೊಂಡ ನಂತರ ಇರಾನ್ ಹಾಗೂ ಅಮೆರಿಕಾ ದ್ವಿಪಕ್ಷೀಯ ಸಂಬಂಧದಲ್ಲಿ ವ್ಯತ್ಯಾಸ ಉಂಟಾಗಿದ್ದು, ಅಮೆರಿಕಾ ಮತ್ತೆ ಇರಾನ್ ಮೇಲೆ ನಿರ್ಬಂಧ ವಿಧಿಸುವ ಭೀತಿ ಎದುರಾಗಿದೆ. 

ಡೊನಾಲ್ಡ್ ಟ್ರಂಪ್ ಅಧಿಕಾರಕ್ಕೆ ಬರುತ್ತಿದ್ದಂತೆಯೇ ಇರಾನ್ ಮಧ್ಯಪ್ರಾಚ್ಯ ರಾಷ್ಟ್ರಗಳಿಗೆಲ್ಲಾ ಅಪಾಯಕಾರಿ ರಾಷ್ಟ್ರ ಎಂದು ಆರೋಪಿಸಿದ್ದರು. ಅಷ್ಟೇ ಅಲ್ಲದೇ ನಿರ್ಬಂಧ ವಿಧಿಸುವುದಾಗಿಯೂ ಎಚ್ಚರಿಕೆ ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಬಂದರು ಅಭಿವೃದ್ಧಿ ಯೋಜನೆಗೆ ಅಗತ್ಯವಿರುವ ಉಪಕರಣಗಳನ್ನು ಪೂರೈಕೆ ಮಾಡಲು ಉತ್ಪಾದಕರು ಹಿಂದೇಟು ಹಾಕುತ್ತಿದ್ದು, ಬಂದರು ಅಭಿವೃದ್ಧಿ ಯೋಜನೆಯ ಮೇಲೆ ಕರಿ ಛಾಯೆ ಆವರಿಸುವ ಪರಿಸ್ಥಿತಿ ಉಂಟಾಗಿದೆ.