ಭಾರತದ ಬತ್ತಳಿಕೆ ಸೇರಲಿವೆ ವಿನಾಶಕಾರಿ ಎಂಐ-17 ಹೆಲಿಕಾಪ್ಟರ್ ಗಳು!

ನವದೆಹಲಿ: ಸೇನೆಯ ಆಧುನೀಕರಣಕ್ಕಾಗಿ ಮಹತ್ವದ ಹೆಜ್ಜೆ ಇಟ್ಟಿರುವ ಭಾರತ ಸರ್ಕಾರ ರಷ್ಯಾ ನಿರ್ಮಿತ ಎಂಐ-17 ಹೆಲಿಕಾಪ್ಟರ್ ಗಳನ್ನು ಖರೀದಿ ಮಾಡುವ ಕುರಿತು ವರ್ಷ್ಯಾಂತ್ಯದಲ್ಲಿ ಒಪ್ಪಂದ ಮಾಡಿಕೊಳ್ಳುವ ಸಾಧ್ಯತೆ ಇದೆ.

ಈಗಾಗಲೇ ಈ ಬಗ್ಗೆ ಭಾರತ ಮತ್ತು ರಷ್ಯಾ ಅಧಿಕಾರಿಗಳು ಚರ್ಚೆ ನಡೆಸುತ್ತಿದ್ದು, Mi-17ಸರಣಿಯ ವಿ5 ಹೆಲಿಕಾಪ್ಟರ್ ಗಳ ಖರೀದಿ ಸಂಬಂಧ ಮಾತುಕತೆ ನಡೆಸಿದ್ದಾರೆ. ಮೂಲಗಳ ವರ್ಷಾಂತ್ಯದ ವೇಳೆಗೆ ಈ ಮಹತ್ವದ ಒಪ್ಪಂದ  ಅಂತಿಮ ರೂಪ ಪಡೆಯಲಿದ್ದು, ಉಭಯ ದೇಶಗಳ ನಾಯಕರು ಒಪ್ಪಂದಕ್ಕೆ ಸಹಿ ಹಾಕಲಿದ್ದಾರೆ. ಭಾರತ ಮತ್ತು ರಷ್ಯಾ ನಡುವೆ ಈಗಾಗಲೇ ಎಂಐ-17 ಹೆಲಿಕಾಪ್ಟರ್ ಖರೀದಿ ಸಂಬಂಧ ಒಪ್ಪಂದ ಏರ್ಪಟ್ಟಿದ್ದು, ಹೆಚ್ಚುವರಿಯಾಗಿ 48  Mi-17 ವಿ5 ಹೆಲಿಕಾಪ್ಟರ್‌ಗಳನ್ನು ಖರೀದಿಸುವ ಸಂಬಂಧ ಮಾತುಕತೆ ನಡೆದಿದೆ.

ಒಪ್ಪಂದದ ನಿಯಾಮವಳಿ ಹಾಗೂ ಹೆಲಿಕಾಪ್ಟರ್‌ ಬೆಲೆಯ ಬಗ್ಗೆ ವರ್ಷಾಂತ್ಯದಲ್ಲಿ ನಿರ್ಧಾರವಾಗಲಿದೆ ಎಂದು ರಷ್ಯಾದ ರಕ್ಷಣಾ ಸಾಮಗ್ರಿ ರಫ್ತು ಸಂಸ್ಥೆಯ ಸಿಇಓ ಅಲೆಕ್ಸಾಂಡರ್ ಮಿಕೀವ್ ತಿಳಿಸಿದ್ದಾರೆ. Mi-8 ಮತ್ತು MI-17  ಸೇರಿದಂತೆ Mi ಸರಣಿಯ300 ಕ್ಕೂ ಹೆಚ್ಚು ಹೆಲಿಕಾಪ್ಟರ್‌ಗಳು ಈಗಾಗಲೇ ಭಾರತದ ಬಳಿ ಇವೆ. ಜೊತೆಗೆ 2016ರ ಜನವರಿಯಲ್ಲಿ ಭಾರತಕ್ಕೆ Mi-17 ವಿ5 ಮಾದರಿಯ 150 ಹೆಲಿಕಾಪ್ಟರ್‌ಗಳನ್ನು ಪೂರೈಕೆ ಮಾಡಿದ್ದೇವೆ ಎಂದು  ಅವರು ಮಾಹಿತಿ ನೀಡಿದ್ದಾರೆ.

Mi-17 ವಿ5 ವಿಶೇಷತೆ ಏನು?
ಇನ್ನು ಪ್ರಸ್ತುತ ಭಾರತ ಖರೀದಿಸಲು ಮುಂದಾಗಿರುವ ಎಂಐ-17 ವಿ5 ಹೆಲಿಕಾಪ್ಟರ್ ಗಳು ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿದ್ದು, ರಷ್ಯಾದ ಈ ಹಿಂದಿನ ಹೆಲಿಕಾಪ್ಟರ್ ಗಳಂತೆಯೇ ಇದೂ ಕೂಡ ವಿನಾಶಕಾರಿಯಾಗಿದೆ. ಈ  ಹೆಲಿಕಾಪ್ಟರ್‌ಗಳು ನೈಟ್ ವಿಷನ್ ತಂತ್ರಜ್ಞಾನ ಹೊಂದಿದ್ದು, ರಾತ್ರಿ ವೇಳೆಯಲ್ಲೂ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯ ಹೊಂದಿದೆ. ಅಂತೆಯೇ ಎಲ್ಲ ಹವಾಗುಣದ ರಾಡಾರ್, ಸ್ವಯಂಚಾಲಿತ ವ್ಯವಸ್ಥೆ ಸೇರಿದಂತೆ ಅತ್ಯಾಧುನಿಕ  ಅಂಶಗಳನ್ನು ಈ ಹೆಲಿಕಾಪ್ಟರ್ ಹೊಂದಿವೆ.