ಕಲಿಕೆಯ ಪ್ರಕ್ರಿಯೆಯನ್ನು ಎಂದಿಗೂ ಬಿಡಬೇಡಿ: ಯುವಕರಿಗೆ ಮೋದಿ ಸಲಹೆ

ನವದೆಹಲಿ: ದೇಶದಲ್ಲಿರುವ ಯುವಜನತೆ ಕಲಿಕೆಯ ಪ್ರಕ್ರಿಯೆಯನ್ನು ಎಂದಿಗೂ ನಿಲ್ಲಿಸಬಾರದು, ದೇಶ ಕಟ್ಟುವಲ್ಲಿ ಸ್ವಾಮಿ ವಿವೇಕಾನಂದ ಅವರ ಚಿಂತನೆ ಎಂದಿಗೂ ಪ್ರೇರಣೆಯಾಗಿರಲಿದೆ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಗುರುವಾರ ಹೇಳಿದ್ದಾರೆ.

ಕನ್ಯಾಕುಮಾರಿಯ ವಿವೇಕಾನಂದ ಕೇಂದ್ರದಲ್ಲಿ ಆಯೋಜನೆ ಮಾಡಲಾಗಿದ್ದ ಸ್ವಾಮಿ ವಿವೇಕಾನಂದ ಅವರು ಜನ್ಮದಿನಾಚರಣೆ ಕಾರ್ಯಕ್ರಮದಲ್ಲಿ ವಿಡಿಯೋ ಕಾನ್ಫರೆನ್ಸ್ ಮುಖಾಂತರ ಮಾತನಾಡಿರುವ ಅವರು, ಭಾರತ ಯುವಜನತೆಯನ್ನು ಹೊಂದಿರುವ ದೇಶವಾಗಿದ್ದು, ದೇಶಕಟ್ಟುವಲ್ಲಿ ಸ್ವಾಮಿ ವಿವೇಕಾನಂದ ಅವರ ಚಿಂತನೆ ಎಂದಿಗೂ ಪ್ರೇರಣೆಯಾಗಿರಲಿದೆ ಎಂದು ಹೇಳಿದ್ದಾರೆ.

ಜನವರಿ 12 ಸಾಮಾನ್ಯ ದಿನವಲ್ಲ. ಸ್ವಾಮಿ ವಿವೇಕಾನಂದ ಅವರ ಶಕ್ತಿ ಹಾಗೂ ಅವರ ಚಿಂತನೆ ಪ್ರತೀಯೊಬ್ಬರ ಮಿದುಳಿಗೂ ಆಕಾರವನ್ನು ನೀಡಿದೆ. ಆಧ್ಯಾತ್ಮಿಕತೆ ಎಂಬುದು ಕೇವಲ ಧರ್ಮದೊಂದಿಗಷ್ಟೇ ಸಂಬಂಧವನ್ನು ಹೊಂದಿಲ್ಲ. ಮಾನವೀಯತೆಯೊಂದಿಗೂ ಸಂಬಂಧವನ್ನು ಹೊಂದಿದೆ. ಕೆಲ ಜನರು ಇದನ್ನು ಧರ್ಮವೊಂದಕ್ಕೆ ಮಾತ್ರ ಸಂಬಂಧ ಹೊಂದಿದೆ ಎಂದು ಹೇಳುತ್ತಾರೆಂದು ತಿಳಿಸಿದ್ದಾರೆ.

1984ರಲ್ಲಿ ಭಾರತ ಸರ್ಕಾರ ಸ್ವಾಮಿ ವಿವೇಕಾನಂದ ಅವರ ಜನ್ಮ ದಿನವನ್ನು 'ರಾಷ್ಟ್ರೀಯ ಯುವಕರ ದಿನ'ವನ್ನಾಗಿ ಘೋಷಣೆ ಮಾಡಿತ್ತು, ಬಳಿಕ 1985 ರಿಂದ ನಿರಂತವಾಗಿ ಇದನ್ನು ಆಚರಿಸಿಕೊಂಡು ಬರಲಾಗುತ್ತಿದೆ.