ಉತ್ತರ ಭಾರತದಲ್ಲಿ ಭೂಕಂಪನ: ವರದಿ ಕೇಳಿದ ರಾಜನಾಥ ಸಿಂಗ್

ನವದೆಹಲಿ: ರಾಜಧಾನಿ ದೆಹಲಿ ಸೇರಿದಂತೆ ಉತ್ತರ ಭಾರತದ ಹಲವೆಡೆ ಸೋಮವಾರ ರಾತ್ರಿ ಲಘು ಭೂಕಂಪನ ಸಂವಿಸಿದ್ದು, ಈ ಹಿನ್ನಲೆಯಲ್ಲಿ ಭೂಕಂಪನ ಕುರಿತಂತೆ ಕೇಂದ್ರ ಗೃಹ ಸಚಿವ ರಾಜನಾಥ ಸಿಂಗ್ ಅವರು ವರದಿ ಸಲ್ಲಿಸುವಂತೆ ಅಧಿಕಾರಿಗಳಿಗೆ ಮಂಗಳವಾರ ಸೂಚನೆ ನೀಡಿದ್ದಾರೆ.

ಭೂಕಂಪನ ಹಿನ್ನಲೆಯಲ್ಲಿ ಉತ್ತರ ಭಾರತದ ಹಲವೆಡೆ ಹೈಅಲರ್ಟ್ ಘೋಷಣೆ ಮಾಡಲಾಗಿದ್ದು, ಯಾವುದೇ ಸಮಯದಲ್ಲಿ ಮತ್ತೆ ದುರ್ಘಟನೆಗಳು ಸಂಭವಿಸಿದರೂ ಕಾರ್ಯಾಚರಣೆಗೆ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ದಳದ ಸಿಬ್ಬಂದಿಗಳು ಸಿದ್ಧರಿರುವಂತೆ ಸೂಚನೆ ನೀಡಲಾಗಿದೆ ಎಂದು ತಿಳಿದುಬಂದಿದೆ.

ಭೂಕಂಪನ ಕುರಿತಂತೆ ಕಳೆದ ರಾತ್ರಿ ಟ್ವಿಟರ್ ನಲ್ಲಿ ಪ್ರತಿಕ್ರಿಯೆ ನೀಡಿರುವ ರಾಜನಾಥ ಸಿಂಗ್ ಅವರು, ಉತ್ತರಾಖಂಡ ಹಾಗೂ ಇನ್ನಿತರೆ ಉತ್ತರ ಭಾರತದ ರಾಜ್ಯಗಳಲ್ಲಿ ಭೂಕಂಪನ ಸಂಭವಿಸಿರುವ ಹಿನ್ನಲೆಯಲ್ಲಿ ಗೃಹ ಸಚಿವಾಲಯ ಪರಿಸ್ಥಿತಿಯನ್ನು ಅವಲೋಕಿಸುತ್ತಿದೆ ಎಂದು ಹೇಳಿದ್ದಾರೆ.

ಪರಿಸ್ಥಿತಿ ಬಿಗಾಡಿಯಿಸಿರುವುದೇ ಆದರೆ, ಎನ್ ಡಿಆರ್'ಎಫ್ ಸಿಬ್ಬಂದಿಗಳು ತಯಾರಾಗಿದ್ದು, ಘಟನಾ ಸ್ಥಳಗಳಿಗೆ ಕೂಡಲೇ ಧಾವಿಸಿ ಕಾರ್ಯಾಚರಣೆ ನಡೆಸಲಿದ್ದಾರೆ. ಹೈಅಲರ್ಟ್ ಆಗಿರುವಂತೆ ಎನ್'ಡಿಆರ್'ಎಫ್ ಪಡೆಗೆ ಸೂಚನೆ ನೀಡಲಾಗಿದ್ದು, ಪರಿಸ್ಥಿತಿ ಕುರಿತಂತೆ ವರದಿ ಸಲ್ಲಿಸುವಂತೆ ರಾಜನಾಥ್ ಸಿಂಗ್ ಅವರು ಸೂಚನೆ ನೀಡಿದ್ದಾರೆಂದು ಗೃಹ ಸಚಿವಾಲಯದ ವಕ್ತಾರ ಹೇಳಿದ್ದಾರೆ.

ಭೂಕಂಪನ ಸಂಭವಿಸಿದ ಮಾಹಿತಿ ತಿಳಿಯುತ್ತಿದ್ದಂತೆಯೇ ಎರಡು ಎನ್'ಡಿಆರ್'ಎಫ್ ಪಡೆಯ ತಂಡಗಳನ್ನು ಘಜಿಯಾಬಾದ್ ನ ರುದ್ರಪ್ರಯಾಗ್ ಕಳುಹಿಸಲಾಗಿತ್ತು. ಮತ್ತೊಂದು ತಂಡ ಕೂಡ ತಯಾರಾಗಿದ್ದು, ಪರಿಸ್ಥಿತಿ ಬಿಗಾಡಿಸಿದರೆ ತಂಡವನ್ನು ಕಳುಹಿಸಲಾಗುತ್ತದೆ ಎಂದು ಎನ್'ಡಿಆರ್'ಎಫ್ ಪ್ರಧಾನ ನಿರ್ದೇಶಕ ಆರ್.ಕೆ. ಪಚ್ನಂದ ಅವರು ತಿಳಿಸಿದ್ದಾರೆ.