ಭಕ್ತರ ಹರಕೆಯ ಮುಡಿಯನ್ನು ಕದ್ದೊಯ್ದ ಕಳ್ಳರು!

ವಿಜಯವಾಡ: ಬೃಹತ್ ಪ್ರಮಾಣದಲ್ಲಿ ಸಂಗ್ರಹವಾಗಿದ್ದ ಭಕ್ತರು ನೀಡಿದ್ದ ಹರಕೆಯ ಮುಡಿಯನ್ನು ಕದ್ದೊಯ್ದಿರುವ ಘಟನೆ ಆಂಧ್ರಪ್ರದೇಶದ ಶ್ರೀಶೈಲಂ ನ ಮಲ್ಲಿಕಾರ್ಜುನ ಸ್ವಾಮಿ ದೇವಾಲಯದಲ್ಲಿ ನಡೆದಿದೆ. 

ಕಿಟಕಿಗೆ ಹಾಕಲಾಗಿದ್ದ ಕಬ್ಬಿಣದ ಕಂಬಿಗಳನ್ನು ಮುರಿದು, ಭಕ್ತಾದಿಗಳು ಮುಡಿ ನೀಡಿರುವ ಕಲ್ಯಾಣ ಕಟ್ಟೆಗೆ ಪ್ರವೇಶಿಸಿರುವ ಕಳ್ಳರು, ಭಕ್ತರ ಮುಡಿಯನ್ನು ತುಂಬಿಸಿಟ್ಟಿದ್ದ ಹುಂಡಿಯನ್ನು ಒಡೆದು, ಕಳ್ಳತನ ನಡೆಸಿದ್ದಾರೆ. ಇದೇ ಮಾದರಿಯಲ್ಲಿ ಎರಡನೇ ಹುಂಡಿಯನ್ನು ಒಡೆಯಲು ಹೋಗಿ ಅರ್ಧದಲ್ಲೇ ಪ್ರಯತ್ನವನ್ನು ಕೈಬಿಟ್ಟಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. 

ಇಷ್ಟಾರ್ಥ ಸಿದ್ಧಿಗಾಗಿ ಹರಕೆ ಹೊತ್ತು ಭಕ್ತರು ಮಲ್ಲಿಕಾರ್ಜುನ ಸ್ವಾಮಿ ದೇವಾಲಯದಲ್ಲಿ ನೀಡುವ ಮುಡಿಯನ್ನು ವಾರ್ಷಿಕ ಹರಾಜು ಮಾಡಲಾಗುತ್ತದೆ. ಅತಿ ಹೆಚ್ಚು ಮೊತ್ತಕ್ಕೆ ಬಿಡ್ ಮಾಡುವವರಿಗೆ ದೇವಾಲಯದ ಕಲ್ಯಾಣ ಕಟ್ಟೆಯಲ್ಲಿ ಸಂಗ್ರಹವಾಗಿರುವ ತಲೆಕೂದಲನ್ನು ನೀಡಲಾಗುತ್ತದೆ. ಗುತ್ತಿಗೆ ಪಡೆದವರು ಬೃಹತ್ ಪ್ರಮಾಣದಲ್ಲಿ ಭಕ್ತಾದಿಗಳಾ ಹರಕೆಯ ಮುಡಿ ಸಂಗ್ರಹವಾಗುವವರೆಗೂ ಹುಂಡಿಯಲ್ಲಿ ಸಂಗ್ರಹಿಸುತ್ತಾರೆ. ಈ ರೀತಿ ಸಂಗ್ರಹಿಸಲಾಗುವ ಕೂದಲಿಗೆ ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ಬೇಡಿಕೆ ಇದೆ. 

ಘಟನೆ ಬಗ್ಗೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಕಳ್ಳತನವಾಗಿರುವ ಹರಕೆಯ ಮುಡಿಯ ಮೌಲ್ಯವನ್ನು ಅಂದಾಜು ಮಾಡಲಾಗುತ್ತಿದ್ದು, ಸಿಸಿಟಿವಿ ದೃಷ್ಯಾವಳಿಗಳನ್ನೂ ಪರಿಶೀಲಿಸಲಾಗುತ್ತಿದೆ.