ಕೇಳದೆ ನೀರು ಕುಡಿದಿದ್ದಕ್ಕೆ ಯುವಕನಿಗೆ ಅಮಾನವೀಯ ಶಿಕ್ಷೆ: ಎಎಸ್ಐ, ಪೇದೆ ಅಮಾನತು

ಭೋಪಾಲ್: ಕೇಳದೆ ನೀರು ಕುಡಿದಿದ್ದಾನೆಂಬ ಕಾರಣಕ್ಕೆ ಯುವಕನೊಬ್ಬನಿಗೆ ಚಲಿಸುವ ರೈಲಿನಲ್ಲಿ ಅಮಾನವೀಯವಾಗಿ ಶಿಕ್ಷೆ ನೀಡಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಇದೀಗ ಇಬ್ಬರು ಎಎಸ್ಐಗಳು ಹಾಗೂ ಪೇದೆಯನ್ನು ಅಧಿಕಾರಿಗಳು ಅಮಾನತು ಮಾಡಿರುವುದಾಗಿ ಗುರುವಾರ ತಿಳಿದುಬಂದಿದೆ.
ಸರ್ಕಾರಿ ರೈಲ್ವೆ ಸಹಾಯಕ ಉಪ ನಿರೀಕ್ಷಕರಾಗಿ ಕೆಲಸ ಮಾಡುತ್ತಿದ್ದ ಕೆ.ಎಸ್. ಜಾಧೋನ್, ರೈಲ್ವೆ ರಕ್ಷಣಾ ಪಡೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅನಿಲ್ ರಾಯ್ ಹಾಗೂ ಪೇದೆ ಮಧುಸೂದನ್ ಎಂಬುವವರನ್ನು ಅಧಿಕಾರಿಗಳು ಅಮಾನತು ಮಾಡಿದ್ದಾರೆಂದು ಹೇಳಲಾಗುತ್ತಿದೆ.

ಮಾರ್ಚ್ 25 ರಂದು ಈ ಅಮಾನವೀಯ ಘಟನೆ ನಡೆದಿತ್ತು. ತಮ್ಮ ಅನುಮತಿ ಇಲ್ಲದೆ ನೀರಿನ ಬಾಟಲ್ ತೆಗೆದುಕೊಂಡು ನೀರು ಕುಡಿದಿದ್ದ ಎಂಬ ಕ್ಷುಲ್ಲಕ ಕಾರಣಕ್ಕೆ ಯುವಕರ ಗುಂಪೊಂದು ಸುಮಿತ್ ಎಂಬ ಯುವಕನನ್ನು ಚಲಿಸುತ್ತಿದ್ದ ರೈಲಿನ ಕಿಟಕಿಗೆ ಕಟ್ಟಿ ಹಿಗ್ಗಾಮುಗ್ಗಾ ಥಳಿಸಿದ್ದರು.

ರೈಲಿನ ಕಿಟಕಿಗೆ ಸುಮತ್ ನನ್ನು ಕಟ್ಟಿದ್ದರೂ ಕೂಡ ಇದು ಚಾಲಕನ ಗಮನಕ್ಕೆ ಬಂದಿರಲಿಲ್ಲ. ರೈಲು ತಡೆ ರಹಿತವಾಗಿ ಸುಮಾರು ನಾಲ್ಕು ಗಂಟೆಗಳ ಕಾಲ ಓಡಿತ್ತು. ನಂತರ ರೈಲು ಇಟಾರ್ಸಿ ನಿಲ್ದಾಣಕ್ಕೆ ಬಂದು ನಿಂತಾಗ ರೈಲು ಹತ್ತಲು ನಿಂತಿದ್ದ ಪ್ರಯಾಣಿಕರು ಸುಮಿತ್ ನನ್ನು ನೋಡಿ ಗಾಬರಿಗೊಂಡು ಆತನನ್ನು ರಕ್ಷಿಸಿದ್ದರು, ಇಷ್ಟಾದರೂ ಸುಮಿತ್ ಗೆ ಶಿಕ್ಷೆ ನೀಡಿದ್ದ ಗುಂಪು ಮತ್ತೆ ಸುಮಿತ್ ನನ್ನು ಹೊಡೆಯಲು ಆರಂಭಿಸಿದ್ದರು. ನಂತರ ಸ್ಥಳೀಯರೇ ಆತನನ್ನು ರಕ್ಷಿಸಿದ್ದರು.

ಪ್ರಕರಣ ಸಂಬಂಧ ರೈಲ್ವೇ ರಕ್ಷಣಾ ದಳ ಆರೋಪಿಗಳ ವಿರುದ್ಧ ಭಾರತೀಯ ದಂಡ ಸಂಹಿತೆ ಪ್ರಕಾರ ಸೆಕ್ಷನ್ 307, 153 ರ ಅಡಿಯಲ್ಲಿ ಎಫ್ಐಆರ್ ದಾಖಲಿಸಿಕೊಂಡಿತ್ತು. ಇದೀಗ ಪ್ರಕರಣ ಸಂಬಂಧ ಕ್ರಮ ಕೈಗೊಂಡಿರುವ ಅಧಿಕಾರಿಗಳು  ಕರ್ತವ್ಯ ನಿರತ ಇಬ್ಬರು ಎಎಸ್ಐ ಗಳು ಹಾಗೂ ಓರ್ವ ಪೇದೆಯನ್ನು ಅಮಾನತು ಮಾಡಿದೆ.