ಹೋಂವರ್ಕ್ ಮಾಡಿಲ್ಲವೆಂದು ಮಕ್ಕಳನ್ನು ಬೆತ್ತಲೆ ಮಾಡಿದ ಶಿಕ್ಷಕರು

ಮುಂಬೈ: ಹೋಂವರ್ಕ್ ಮಾಡಿಲ್ಲ ಎಂಬ ಕಾರಣಕ್ಕೆ ಮಕ್ಕಳನ್ನು ಬೆತ್ತಲೆ ಮಾಡಿ ಶಿಕ್ಷೆ ನೀಡಿರುವ ಘಟನೆಯೊಂದು ಮಲ್ವಾನಿಯ ಗೇಟ್ ನಂ.5ರಲ್ಲಿ ನಡೆದಿದೆ.

ಮಕ್ಕಳಿಗೆ ಬೆತ್ತಲೆ ಶಿಕ್ಷೆ ನೀಡಿರುವ ವಿಡಿಯೋ ವಾಟ್ಸ್ ಅಪ್ ಗಳಲ್ಲಿ ಓಡಾಡುತ್ತಿತ್ತು. ಈ ವಿಡಿಯೋವನ್ನು ನೋಡಿದ ಮುಂಬೈ ಪೊಲೀಸ್ ಆಯುಕ್ತ ದತ್ತ ಫಡ್ಸಲ್ಗಿಕರ್ ಅವರು, ಇದೀಗ ಪ್ರಕರಣ ಸಂಬಂಧ ಶಿಕ್ಷಕರ ವಿರುದ್ಧ ಎಫ್ ಐಆರ್ ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ.

ಪ್ರಸ್ತುತ ವಾಟ್ಸ್ ಅಪ್ ಗಳಲ್ಲಿ ಓಡಾಡುತ್ತಿರುವ ವಿಡಿಯೋ ಪ್ರಕಾರ, ಟ್ಯುಟೋರಿಯಲ್ ತರಗತಿಗೆ ಹೋಗುತ್ತಿದ್ದ 2 ಹಾಗೂ 3ನೇ ತರಗತಿಯ ಇಬ್ಬರು ಮಕ್ಕಳು ಅಲ್ಲಿ ಶಿಕ್ಷಕರು ನೀಡಿದ್ದ ಹೋಂವರ್ಕ್ ಮಾಡಿಲ್ಲ. ಹೀಗಾಗಿ ಇದಕ್ಕೆ ಕೋಪಗೊಂಡಿರುವ ಶಿಕ್ಷಕರು ಮಕ್ಕಳಿಗೆ ಬೆತ್ತಲಾಗಿ ಹೊರಗೆ ನಿಲ್ಲುವಂತೆ ಹೇಳಿದ್ದಾರೆ. ಇದರಂತೆ ಮಕ್ಕಳು ಬೆತ್ತಲಾಗಿ ನಿಂತು ಶಿಕ್ಷೆ ಅನುಭವಿಸಿದ್ದಾರೆ. ಈ ವಿಡಿಯೋವೀಗ ಮುಂಬೈ ಪೊಲೀಸರಿಗೆ ಸಿಕ್ಕಿದ್ದು, ಪ್ರಕರಣವನ್ನು ಪೊಲೀಸ್ ಆಯುಕ್ತರು ಗಂಭೀರವಾಗಿ ಪರಿಗಣಿಸಿ, ತನಿಖೆಗೆ ಆದೇಶಿಸಿದ್ದಾರೆ. ಈವರೆಗೂ ಯಾರೊಬ್ಬರನ್ನು ಬಂಧನಕ್ಕೊಳಪಡಿಸಿಲ್ಲ ಎಂದು ತಿಳಿದುಬಂದಿದೆ.