ಪ್ರವಾಸಿಗರ ಮೆಚ್ಚುಗೆ ಗಳಿಸಿದ್ದ 'ಜೈ' ಹುಲಿ ಕಳೆದ 3 ತಿಂಗಳಿನಿಂದ ನಾಪತ್ತೆ

ನವದೆಹಲಿ: ದೇಶದ ಖ್ಯಾತ ಹುಲಿ ಜೈ ಕಳೆದ ಮೂರು ತಿಂಗಳಿನಿಂದ ನಾಪತ್ತೆಯಾಗಿದ್ದು ಯಾವುದೇ ಸುಳಿವು ದೊರೆತಿಲ್ಲ ಎಂದು ಹುಲಿ ಹುಡುಕಾಟ ನಡೆಸಿರುವ ಮಹಾರಾಷ್ಟ್ರ ಅರಣ್ಯ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ.

ಬಾಲಿವುಡ್ ನ ಬ್ಲಾಕ್ ಬಸ್ಟರ್ ಶೋಲೆ ಚಿತ್ರದಲ್ಲಿ ಅಭಿನಯಿಸಿದ್ದ ಅಮಿತಾಬ್ ಬಚ್ಚನ್ ಗೆ ಇರಿಸಿದ್ದ ಹೆಸರನ್ನು ಈ ಹುಲಿಗೆ ನೀಡಲಾಗಿತ್ತು. ಜೈ ಹುಲಿ ಏಪ್ರಿಲ್ 1 ರ ನಂತರ ಮಹಾರಾಷ್ಟ್ರದ ನಾಗಪುರ ಸಮೀಪದ ಉಮ್ರೆದ್ ಕರಹಂಡ್ಲ ಅಭಯಾರಣ್ಯಿಂದ ಇದ್ದಕ್ಕಿದ್ದಂತೆ ಕಾಣೆಯಾಗಿತ್ತು.

ಜೈ ಹುಲಿಗಾಗಿ ಮಹಾರಾಷ್ಟ್ರ ಅರಣ್ಯಾಧಿಕಾರಿಗಳು ದಕ್ಷಿಣ ರಾಜ್ಯಗಳಲ್ಲಿ ಭಾರೀ ಹುಡುಕಾಟ ನಡೆಸಿದ್ದರು. ಆದರೂ ಹುಲಿಯ ಬಗ್ಗೆ ಯಾವುದೇ ಸುಳಿವು ದೊರೆತಿಲ್ಲ. ಇಂದು ವಿಶ್ವ ಹುಲಿ ದಿನಾಚರಣೆ ಹಿನ್ನೆಲೆ ಕಳೆದು ಹೋದ ಹುಲಿಗಾಗಿ ಅಭಯಾರಣ್ಯದ ಸಿಬ್ಬಂದಿ ನೆನೆದಿದ್ದಾರೆ.

ಜೈ ಹುಲಿಗೆ ಎಲೆಕ್ಟ್ರಾನಿಕ್ ಟ್ರಾನ್ಸ್ ಮೀಟರ್ ಕೊರಳಲ್ಲಿದ್ದರೂ ಅದು ಕಾರ್ಯ ನಿರ್ವಹಿಸದಿರುವುದು ಅಧಿಕಾರಿಗಳಿಗೆ ಹುಲಿಯ ಜೀವಿತಾವಧಿ ಮೇಲೆ ಶಂಕೆ ಹುಟ್ಟಿಸಿದೆ. ಇನ್ನು ಜೈನ ಸುಳಿವು ನೀಡಿದವರಿಗೆ ಮಹಾರಾಷ್ಟ್ರ ಸರ್ಕಾರ 50 ಸಾವಿರ ನಗದು ಬಹುಮಾನ ಘೋಷಿಸಿದೆ.

ಈ ಬಹುಮಾನಕ್ಕಾಗಿ ಹುಲಿಯ ಹುಡುಕಾಟದಲ್ಲಿ ಸುತ್ತಮುತ್ತಲ ಗ್ರಾಮಸ್ಥರು ತೊಡಗಿದ್ದಾರೆ.

7 ವರ್ಷ ಪ್ರಾಯದ ಈ ಹುಲಿ 250 ಕೆಜಿ ತೂಕವಿತ್ತು. ಪ್ರವಾಸಿಗರ ಮೆಚ್ಚಿನ ಜೈ ಹುಲಿ ಇದೀಗ ನಾಪತ್ತೆಯಾಗಿರುವುದರಿಂದ ಪ್ರವಾಸಿಗರು ಆತಂಕ್ಕೆ ಒಳಗಾಗಿದ್ದಾರೆ.